CAPÇALERA: Eth Ligam occitan Youtube

Jornalet, gaseta occitana d'informacions

Dimars, 11 d'agost

Eric Roulet

Dimècres, 23.10.2013 03h00

L’Amassada: Per de qué héser?


Comentaris 5 comentaris    
Dolent Fluix Bo Molt bo Fabulós (7 vòtes)
carregant En cargament


Òmi d’Oc! As drèit a la paraula!
Parla!

 
Quan lo Conselh Regionau d’Aquitània creèt l’Amassada[1], quauquas annadas alà, ja me deishèt pensatiu… De hèit, dempui la debuta, i avè destriga,  enter los membres qu’avèvan lo drèit de participir a las comissions, e los autes …. Una seleccion que se volèva, solide, apitada dab critèris daus bons, mes guardats dens lo mistèri dau cabinet regionau… S’aurà falut bàter per i estar…
 
L’Amassada, se vòu un Conselh: un lòc per soscar la politica de miar de cap a la cultura occitana en Aquitània: un moment per se véser, per se parlar, per se compréner e davançar tots dau medish camin. A díser de vertat, n’a pas jamei estat atau, mes egau,  i avè de faiçon regulara las amassadas de comission que permeteva d’escambiar…
 
Que hèi au mens dus ans, a nòsta coneishença, que non i a pas ajut mei nada comission… Serv pas d’arren d’amassar los que son sau tarrenc davant d’apitar una politica?
 
Egau estúrim, d’aqueste temps, convidats a las “Plénières” anualas. Aqueras rencontras, redusidas a una mija jornada sonque,  vasèren  lo moment causit per presentar la politica definida per lo nòste Conselh Régionau: lo temps de la bona paraula…
 
Lo moment causit estant en plena jornada e en plena setmana, solide que sonque los (si-disents) professionaus i podevan participir: los autes, praubòts, que s’an de ganhar la biaça! Siim seriós: la politica de la cultura d’Òc  es un ahar tròp importanta per i mesclar los vejaires daus uns e daus autes!
 
Miam pas lo combat per la cultura occitana dempui mei de trenta ans per atau recuélher lo mesprés de la Mossurèra: balhar las ideias nòstas per l’avançada de la cultura occitana en Aquitània es un drèit! Lo poder regionau nos diu consultar e enténer. Nosauts  los petits! Los que son ni elegits, ni professionaus o experts autò-proclamats. Aqueste drèit lo volurem tornar conquesir: hasurim de las prepausicions, demanderem de las rencontras  per sonque gahar, un còp de mei… lo silenci.
 
Solide, lo “poder totpoderós” conta sus la laissèra e lo flaquèir…
 
Recebúrim aqueste matin la navèra convòca a la “Plénière 2013”: atau com las annadas passadas se va debanar en setmana e en jornada… I seràn anonçadas las navèras comissions e los navèths organismes creats, que pas jamei, solide, n’entenúrim a parlar, que pas jamei, solide, nos i demandèren de soscar!
 
Atau de nos rassegurar, se parla dens la convòca de “nous interroger collectivement sur les orientations que prendra la politique linguistique occitane pour les années à venir”.
 
De qui se trufa la Region Aquitània? Au cap de tres ans de silenci, shens nada consulta, tira dau capèth  “una politica” tota aprestada, tota pensada e servida a l’aprovacion dau pòble reconeishent?
 
Èi tostemps ajut paur daus que vòlen lo bonur daus autes shens los i demandar lor avís!  Que s’estuja darrèir?
 
Lo bon Diu occitanista es pas encara vasut: lo bonur nòste, l’apitaram nosauts…. Amassa!



[1] L’Amassada es lo “Conseil de développement pour la langue occitane en Aquitaine” que volèva amassar las ideias atau de definir una politica culturau occitana en Aquitània.



publicitat
BANER1: Amics campanha covid



Comentaris

23 d'octòbre 14.17h

Per nosautes, estudiants nihilistas, l'Amassada èra sustot lo mejan de minjar un bon repaish pagat per la region e de demandar un chic mei de pan o una auta botelha de vin a Ricarèrra...


Valora aquest comentari:   votar positiu 12   votar negatiu 0
Respondre comentari replica Comentari inadequat   Formulari d'abús de comentari

23 d'octòbre 13.13h

L'article comença ja per una fauta : a la debuta, tot lo monde podia participar a las comissions, e la termièra entre membre de l'Amassada e non-membre èra fosca. D'individuals èran presents a las comissions, vòli dire pas representents d'associacions o que que sia. De dire que calguèt gular per se far entendre a aquesta espòca es d'una marrida fe evidenta pel monde qu'i èran. Las causas cambièron un pauc après per contra.

Suspausi qu'es dich aqui sonque per afirmar que i foguèron p... Legir la seguida


Valora aquest comentari:   votar positiu 12   votar negatiu 2
Respondre comentari replica Comentari inadequat   Formulari d'abús de comentari

23 d'octòbre 10.33h

Es pas bòn d'aver de memòria !
Fa de mal a las cervèlas de pensar que lo mond, nosautres, se fasèm rotlar dins la farina. Tant es melhor de surfar sus l'actualitat e creire a las promessas qu'aurem eissubliaas dins 3 ans !


Valora aquest comentari:   votar positiu 1   votar negatiu 0
Respondre comentari replica Comentari inadequat   Formulari d'abús de comentari

23 d'octòbre 10.12h

Excellent article !
Es parier a un nivèu geografic mai pichin, a l'escala d'una ciutat coma Niça. Entorn de li annadas 1997, 1998 la comuna de Niça recampèt toi lu actors culturals de l'airau de Niça sota lo nom de "États généraux de l'identité niçoise". Una jornada, lo dissabta -emb un past a miègjorn regalat en toi au Castèu de Niça-, consagrada a la lenga occitana a Niça, amb una conferença, d'atalhiers-comissions tematics cargats de notar li doleanças e demandas dei diferent... Legir la seguida


Valora aquest comentari:   votar positiu 3   votar negatiu 0
Respondre comentari replica Comentari inadequat   Formulari d'abús de comentari

23 d'octòbre 09.49h

Es coma la "Convencion occitana" qu'acampèt a Besièrs de mond entorn de 2001, 2002... D'escambis, debats amb totes los partits occitanistas, militants, intellectuals de Lengadòc e quitament d'un pauc mai larg a l'entorn. Amb un apèl al sosten financièr...
Que se passèt pel cap de los que l'organizèron per plus donar de nòvas aital ?...


Valora aquest comentari:   votar positiu 1   votar negatiu 0
Respondre comentari replica Comentari inadequat   Formulari d'abús de comentari

5 -10 -20 -tots
1




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat
BANER 3 teveoc

Perfil

Eric Roulet

Eric Roulet logo rss

Creator, compositor e contaire de la companhia de musica occitana Gric de Prat. Pedagòg e especialista en educacion. Es adara musician e professor d'occitan

mai d'informacions

contactar l'autor

Categorias

Mai d'articles

Archius




D'autres articles


Jornalet, gaseta occitana d'informacions