CAPÇALERA: publicitat jornalet
CAPÇALERA2: FAI-TE SOCI

Jornalet, gaseta occitana d'informacions

Dimècres, 18 de setembre

Eric Roulet

Dimècres, 6.6.2012 03h00

Ilègia deu "Jornalet"


Comentaris 8 comentaris    
Dolent Fluix Bo Molt bo Fabulós (14 vòtes)
carregant En cargament


A la debuta, quan lo Ferriòl Macip me parlèt deu Jornalet, trobèri la causa de plan. Mes pensèri de tira que l’ahar anava estar de las mau-aisidas: qué díser de mei que non pas çò que se tròba de pertot dens la premsa generau? Que mei qu’aqueras "informacions" tornadas contadas tot lo long deu jorn, shens estanc, d’una radiò a l’auta e tostemps çò medishas…

Qué pòt estar la plaça d’un jornau occitan au mitan d’aqueth rambalh e com s’eslissar enter tots aqueths gigants de la premsa que manejan lo monde e los esperits?

Tanben, on trobar l’informacion? Es pas la gloriosa AFP (agéncia França-premsa) que va portar horrèra au Jornalet, e fau pas qu’ic sii, se non perqué lo Jornalet?

Atau lo camin èra deus estrèits, e esperavi de véser…

Esturi susprés… Susprés de la capacitat deu Jornalet de contar causas que nos tiran de la sopa jornalistica de cada dia shens egau estar en trencadura dab l’informacion de las granas…

Valent a díser que s’escadut de poder parlar de l’informacion internacionau e nacionau shens tornar préner çò que pertot se ditz: un punt de vista deu monde que sii nòste e nos aparten…

Se divem parlar de l’espeliment d’una premsa occitana, pòt pas sonqu’estar aquò: lo miralh d’una legidura pròpria.

Ja, aquò m’estonèt. Mes i a mei qu’aquò: com parlar deu son canton dens un espaci occitan de 31 departaments, com har perqué cadun s’i pusquí sentir a l’ostau, shens aver clavat la pòrta?

Lo Jornalet qu’a, solide, una exigéncia de contar cada parçan d’Occitania: pausicion indispensabla que non pas de prepausar çò que digun mei pòt provesir. Mes endelà, i a dens l’idèia occitanista lo refús de la provincializacion. La valor de l’eveniment n’a pas de relacion directa dab l’endrèit on se passa, çò que compta, es l’eveniment… Aquí s’estuja una trapadèra: d’un costat parlar de pertot e de tots e de l’aut eishivar de càder dens una "literatura de l’endrèit". Esturi susprés: se tròba dens Jo Jornalet ressons de pertot, mes ressons que nos pòden concernir tots. Fin finau, descubrèri dab suspresa que las navèras de Niça (1000 km de l’ostau) me podèvan interessar: a l’endrèit shens las parets, se tròba l’universau.

De mei, se pausava lo problèma de la lenga: eishivar lo francés revirat! Har fisança aus legidors per compréner una lenga occitana dens lo son esperit e dens la sua diversitat, es har fisança a la lenga occitana, a sa possibilitat de legir lo monde de uei dab sas paraulas… Bròia escasuda pr’aquò, lo Jornalet.

Mes endessús de tot, çò que mancava a la còla occitanista, èra un lòc de debatuda vertadèira e publica. Mancava talament que digun mei ic demandava o mei lèu ic exigiva… Quan i a pas nat contra-poder, nat escambi de las idèias, una filosofia mei poderosa arriba de s’impausar e la paraula se clava. La linha "deu partit" acaba de s’embarrar a l’entorn d’una aristocracia navèra convençuda de sa mission…

Las cronicas deu Jonalet son un vent de frescumi: de setmana en setmana, de cronica en cronica, de comentari en comentari, es una soscada occitanista liura que s’espelís. O milhor de díser que s’i vèi de las idèias occitanistas: enfin! Podem esperar d’acabar dab la pensada unica e trencar la linha deu partit unic!

Los hòrabandits de tota mena diven tornar e tornar parlar: sem pas obligats de pertajar las medishas idèias per davançar amassa e la cultura d’Òc caminarà dens la pluralitat milhor que non pas en estujar dolorosament sas diferéncias…

"Je ne suis pas d’accord avec ce que vous dites, mais je me battrai jusqu’à la mort pour que vous ayez le droit de le dire." (Atribuit a Voltaire)



publicitat
BANER1-2-3: DGPL AN LAFONT



Comentaris

8 de junh 09.23h

#5 Completament en acòrdi dab tu sus aquò "filhòl" ^^, es ço que me soi dit far 13 ans quora dintreri a Radio Occitania (que me sentissi pas un pionnier tanpauc) me soi dich "an fach causa, an bastit aquel afar far 17 ans a ieu d'ensajar d'ajudar amb ço que podi menar de pujar d'unes escalons.
Aprep t'ai ja dich de cara ço que pensi del teu trabalh (e soi segur que te soi presa un fum de criticas tanben) e demori sus l'idea d'unitat (e pensi que lo jornalet pot ajudar a pegar mai l'unitat... Legir la seguida


Valora aquest comentari:   votar positiu 1   votar negatiu 2
Respondre comentari replica Comentari inadequat   Formulari d'abús de comentari

8 de junh 09.15h

#6 Crési que m'as mau entendut, la critica quora es positiva es bona de prendre, ço qu'aimi pas son las gens que te contan consi faire lo teu trabalh e que i'entendon que chìc : per tornar prener lo teu eisemple : Oc se vau en ço del maselièr pot diser "es bona aquela carn" o "es ora, es pas de buòu es de gos" aquò es normau, las gens que fan aquò amb los medias me geinan pas a l'encontrari podon faire avançar (dins una certa mesura que capitarem pas de contentar totun) per contra vas ... Legir la seguida


Valora aquest comentari:   votar positiu 1   votar negatiu 2
Respondre comentari replica Comentari inadequat   Formulari d'abús de comentari

7 de junh 18.20h

"En çò del criticaires, me demandi tot temps, qu'un s'ensajet un jorn a faire mestier de media per coneisser la realitat nòstra ? "Escoti los medias" me diretz : vos respondrai ieu ai vist totes los episodis de Dr House, es que podi faire lo metge per aquela rason ?"

Comprèni pas plan aquela remarca. Lo que crompa de la carn chas lo maselièr a pas besonh d'èstre maselièr per sabeire se la carn es bona o pas. A partir del moment qu'a pagat, en tant que consomator, es en drech d'exigir lo... Legir la seguida


Valora aquest comentari:   votar positiu 3   votar negatiu 0
Respondre comentari replica Comentari inadequat   Formulari d'abús de comentari

7 de junh 13.07h

#4 Be pensi qu'as plan arrason. Es pionèrs ena comunicacion en occitan que comencèretz en ua epòca fòrça mès complicada. Complidada quant a mejans e complicada quant a escadences de difusion per tot eth país. Totun, mercés ath trabalh des pionèrs, des prumères ràdios e mèdies occitans, que ne podem seguir eth camin.

Eth bonur de "Jornalet" b'ei qu'ei nascut ena epòca 2.0, en tot profitar es possibilitats qu'er encastre numeric mos balhe. Qu'ei ací on podem ligar tot eth país de ... Legir la seguida


Valora aquest comentari:   votar positiu 4   votar negatiu 0
Respondre comentari replica Comentari inadequat   Formulari d'abús de comentari

7 de junh 12.12h

Me permeti de faire una remarca (sense cercar garolhas, anem esser clar sosteni lo projecte de l'amic Farri dempuèi que me parlet de lo faire espelir veire quitament abanç que dempuèi que lo coneissi me parla d'aquel fantasme vengut realitat).

Tant soi d'acòrdi amb l'analisi que cal parlar de tot en occitan, tant quora legissi aquela reaccions, me demandi se los que fan aquela mena de criticas an ja pausada l'aurelha sus un media occitan : lo trabalh que fan de longa Radio Pais e dempuèi ... Legir la seguida


Valora aquest comentari:   votar positiu 2   votar negatiu 1
Respondre comentari replica Comentari inadequat   Formulari d'abús de comentari

7 de junh 00.03h

Sò completament esmogut, e pensi que tota era còlha tanben. Fòrça gràcies!


Valora aquest comentari:   votar positiu 5   votar negatiu 0
Respondre comentari replica Comentari inadequat   Formulari d'abús de comentari

6 de junh 17.54h

Efectivament, beròja escaduda/capitada per lo Jornalet qui se contenta pas de s'exprimir en òc mes qui relaia e basteish informacions interessantas.

Totun, n'ei pas que lo debut e soi segur que le Jornalet se melhorarà enqüèra a l'aviéner.
(Caleré per exemple integrar las hemnas en aqueth projècte : n'i a pas qu'ua sus un trentenat d'opiniaires !)


Valora aquest comentari:   votar positiu 6   votar negatiu 1
Respondre comentari replica Comentari inadequat   Formulari d'abús de comentari

6 de junh 17.36h

Laus partejat...

De mon punt de vista, lo Jornalet a capitat de fargar un vertadièr medià generalista de lenga occitana. La trapèla es que los Occitanistas s'interèssan mai que mai a son monilh. Quand se veson las estatitiscas de lectura dels articles, es clar los articles que tractan de las questions occitanas -e de lenga mai que mai- son plan mai presats que non pas los articles qu’evòcan las questions generalas de societat o d’actualitat internacionala. Aquò revèrta un manca de m... Legir la seguida


Valora aquest comentari:   votar positiu 6   votar negatiu 0
Respondre comentari replica Comentari inadequat   Formulari d'abús de comentari

5 -10 -20 -tots
1




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat
BANER1-2-3: DGPL AN LAFONT

Perfil

Eric Roulet

Eric Roulet logo rss

Creator, compositor e contaire de la companhia de musica occitana Gric de Prat. Pedagòg e especialista en educacion. Es adara musician e professor d'occitan

mai d'informacions

contactar l'autor

Categorias

Mai d'articles

Archius




D'autres articles


Jornalet, gaseta occitana d'informacions