Bandièra01 1180x150: Comuna de Tolosa

Opinion

N’i a pro!

La protèsta de Montpelhièr, per rapòrt a las protèstas passadas, mobilizèt pas gaire los occitans. Mai d’una rason a-n’aquò: marrida causida de la data, guirguilhs al dintre d’Anem Òc, comunicacion flaca, reivindicacions neblosas, recuperacion per Saurel d’aquel “recampament festiu”, abséncia dels occitans descorats per la manca de resultats de las protèstas passadas, e la tièra es pas acabada.
 
Aprèp veire la mobilizacion magrinèla, e doncas los ressons encara mai magres dins los mèdias, aprèp ausir los manifestaires dire lor colèra davant lo trajècte caluc que los faguèt caminar al mitan de barris desèrts, podèm èsser segurs que, lo còp que ven se n’i a un, i aurà encara mens de monde mobilizats...
 
Es temps de se demandar se contunham aital, o s’ensajam de far quicòm nòu e cossí. Çò que vau dire es mon vejaire, es tanben lo resson de çò que me diguèron maitas personas, pendent e aprèp la protèsta.
 
Sèm fòrça que n’avèm pro de las divisions, dels guirguilhs estèrles, de las batèstas politicianas, de las recuperacions de totas menas, de las organizacions que mèsclan interés corporatista e interés general.
 
Nos cal ara fargar una estructura democratica, al dessús de las institucions qu’existisson, e financièrament independenta, coma faguèron los Catalans amb l’Assemblea Nacionala Catalana qu’es a l’encòp plurala, democratica e apolitica, e fòrta de sos 80 000 sòcis.
 
Nos devèm metre d’acòrdi sus 1 o 2 objectius clars, pan-occitans e que pòscan èsser compreses per l’ensemble de la populacion; foncionar sul principi d’una persona = una votz; iniciar d’accions divèrsas e mediatisadas a d’endreits diferents del territòri occitan, de tal biais de manténer la pression suls poders publics o las institucions.
 
Siá sèm capables d’analisar nòstras errors passadas , d’obrar amassa per assegurar l’avenidor de nòstra lenga e de nòstra cultura, e de botar aquel interés al dessús de tot lo demai, siá nos aprèstam a veire nòstras valors far lo darrièr badalh.
 
Se partejatz aquel sentiment, se sètz prèstes a vos engatjar dins la creacion d’un organisme aital e s’avètz d’idèias sus son fonccionament, digatz-o!

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Lafontan
19.

La "CONVENCION" (CLO): (http://david-grosclaude.com/.../et-apres-le-24-octobre.../) me sembla anar dins lo sens de çò que prepausas Evelyne Houlès, s'agis de recampar tot lo monde al delà de las "botigas". Alavètz amb "CLO", "Marcha", e l'ANOC" d'Iniciativas son ja presas, devon se rescontrar e apitar la formula la mai eficaça per l'unitat. Sonque una remarca per Acampada oficiala de l'ANÒc : https://www.facebook.com/events/1645972898978668/ e MARCHA - Platafòrma de la Societat Civila Occitana los objectius van al delà de la lenga. Fasèm una amassada fondatritz en convidar tot lo monde. Plan segur la question del poder es importanta, lo principi "una persona / una votz" me sembla lo bon biais per anar dins lo sens de l'esperit d'aquel organisme e debria èsser pausat coma prealable.

  • 0
  • 1
Lafontan
18.

#4 L'Anoc a un objectiu diferent mai politic al sens larg, cap a l'autodeterminacion, o ditz clarament, per la lenga s'agis d'apitar una Convencion especifica que podrà recampar tot lomonde çò qu'es pas lo cas de l'ANOC .

  • 0
  • 1
Felip Martèl Montpelhier
17.

#5 Una manif amb coma mot d'ordre Occitania vs França auria fach venir quauques desenas de marchaires (dont la meitat de flics en borgés) e una centena de CRS. Lo problma dau 24 èra pas sa manca de radicalitat.

  • 0
  • 0
Cantournet Danis Montpelhièr
16.

#15 Macarel faguèt estampar 3000 afichas qu'avèm difusit sus las fièiras, dins cada comanda Internet e a las botigas; avèm fait estampar 8000 pegasolets qu'avèm difusit, e parli pas dels camisets qu'avèm prepausat a 5€ a las associacions e als benevòls de l'Estivada . La setmana abans la protèsta ai empegat, e pagat qualqu'un de ma pòcha per m'ajudar a empegar 1000 afichas oficialas. E tu, de qu'as fait ?

  • 9
  • 1
FJ12
15.

#14 Segur ! es a dire la camioneta Macarel (una galejada) coma lo camisòt "special manif" Macarel èran plan dins la drailha de la manif, tranquilòt e plan planeta. Me seriai mancat una contribucion o una proposicion abans la manif per dire au monde de se bolegar, un slogan que faria mosca per tocar lo govèrnament ? Lo silenci es paraula d'aur pels romegaires de servici post-manif. Ai agachat çò que se passèt, parli de las chifras, dins las autras regions, per las lengas regionalas : la situacion semblaria complicada de pertot. Mas urosament sias aquí per nos guidar, adara.

  • 3
  • 7

Escriu un comentari sus aqueste article