Bandièra01 1180x150: Comuna de Tolosa

Opinion

Belfast: es mòrt lo pairin de Belfast Oèst

31 de genièr 2017: dos òmes mascats avançan dusca a una caissa recobèrta per lo drapèl irlandés amb las tres colors. Lèvan en l’aire lors pistolets e tiran ueit còps. Es mòrt Victor Notarantonio la velha, aquel ser, l’IRA es vengut far onor a un de sos soldats. Mas quina IRA? L’IRA vertadièra (RIRA)? L’IRA provisòria (qu’es desmobilizada pasmens)?
 
Victor Notarantonio èra “lo pairin de Belfast Oèst” segon de jornalistas angleses. E atal aviá mai d’un amic dins lo mitan republican d’ara, e mai una granda familha, aquò fai que los franctiraires poirián venir de mai d’una capèla.
 
Lo sexagenari, sortit d’una familha italoïrlandesa coma n’i a qualques unas dins lo Nòrd, era un amic dempuéi l’enfança de Gerry Adams, lo cap de Sinn Féin. Son sortits del meteis quartièr republican de Belfast. Èra amic de Gerry mas pas de son frairon Liam. Notarantonio l’avià quitament “kneecapingat” (tirat de balas dins los genolhs) i a longtemps en nom de l’IRA. Dempuèi, lo fraire (e lo paire) indigne foguèt empresonat per viòls.
 
Mas Victor Notarantonio es conegut per d’autres afars. En 2006, lo pòble republican descobriguèt amb estabosiment que Denis Donaldson, un dels caps de l’IRA, èra un traïdor dempuèi 20 annadas. 3 meses puèi, lo mariòl èra executat per un comando de l’IRA vertadièra dins son ostal de Glenties (Donnegal).
 
Durant l’enquèsta, la Gàrdia irlandesa trobèt de detadas... de Victor Notarantonio dins lo cottage. E Notarantonio èra un “provo” autres còps. E pas un moderat! Abans de jónher los dissidents de l’IRA vertadièra coma son nebot Joe O’Connor (assasinat per los provos en l’an 2000)?
 
Ca que la, Notarantonio foguèt inculpat mas capitèt de se tirar de la rodena per “manca de pròvas”.
 
Dempuèi, “l’èrba podiá pas possar dins Belfast Oèst sens que o saupèsse, tant val dire” segon un jornalista del jornal anglés Sunday Telegraph

 

 


abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Sidòni
2.

#1 D'alhors existís «jambisation» en francés qu'elh mai es bastit sobre lo modèl de l'italian «gambizzazione». Aquí lo liam dau Wiccionari : https://fr.wiktionary.org/wiki/jambisation

  • 1
  • 0
Sidòni
1.

«Kneecapping» (linha 16) se poiriá mai dire «cambisacion/chambisacion» en occitan, sobre lo modèl de gambizzazione en italian, ièu prepause tanben «desrotular» (kneecap en englés = rotula)... ;-)

  • 1
  • 0

Escriu un comentari sus aqueste article