CAPÇALERA2: FAI-TE SOCI

Jornalet, gaseta occitana d'informacions

Divendres, 22 de febrièr

Fabien Lecuyer

Dimenge, 2.4.2017 03h00

Lenga, cultura, bastit


Comentaris Un comentari    
Dolent Fluix Bo Molt bo Fabulós (11 vòtes)
carregant En cargament


Avans que d’anar mai luenh, voudriá avisar mos legeires: mos gosts en matèria d’arquitectura son tan modèrnes e avantgardistas coma queles dau Prince Charles d’Anglatèrra! Quò es clar?
 
Pense que Bretanha e Occitània son a chaplar los patrimònis arquitecturaus. Simplament. E pense qu’aqueste chaple es comparable au chaple lingüistic e culturau.
 
Chau dire la vertat: quand arribam dins una vila, quitament una vila mejana, çò prumèir, chau traversar 1 km de zònas comercialas òrras, monstrosas, avant que d’arribar en vila vertadèira. Monstrosas.... Aquò es pas de o dire! Pertot las mesmes ensenhas luminosas. Las mesmas colors que tira l’uèlh! E aprèp? Aprèp arribam dins de centres de vilas abandonats. Dins las zònas toristicas, los centres de vilas son “loungizats” amb fòrça estanquets a la mòda, “lounge” coma se ditz ara. Dins las zònas mai ruralas i a pus res, res, levat las pancartas “Se vend”. E la vida doncas? La vida sociala? Los dròlles a galopar per las charrèiras? Ara, son puslèu a galopar per las seccions a Carrefour, pechaire! Cresètz vosautres que nòstres enfants auràn un imaginari patrimoniau coma lo nòstre amb tot aquò? Quò m’estonariá! Ieu, foguère elevat dins un ostau en tèrra, una canhessa, coma n’i a tant e mai en Bretanha. Mos pròpris enfants son eslevats dins un ostau en barena. En barena bretona! E pas la barena chinesa coma s’impòrta en Bretanha ara! Mas quantes mainatges bretons o occitans an aqueste astre? Miladius! Quantes mainatges vivon dins lo betum, las botissas, los blòcs? Per z-eles, i aurà pas de sovenenças arquitecturalas patrimonialas. Res! Res qu’una odor de pintura fresca. Per aquò, n’ai pas achabat amb ma descripcion. Aprèp aver traversat Bricoraland e lo centre de vila desèrt, i a encara 1 km de lotjaments de l’autre costat. Sabe pas coma es en Occitània mas en Bretanha quò es carnaval! Chasque colhon vòu aver son “ostau d’arquitècte” a z-el, lo mai bistòrt possible ben segur. Comprenètz, chasque fadat “deu poder exprimir sa creativitat” amb sa barraca. E, aitau, vesèm un “mas provençau” a Saint-Berieu/Sant-Brieg amb dos-tres palmèirs e un ostau alsacian a Marselha. Zo! No Limit! Quina vergonha, bona gent!
 
Pasmens, quand anam en Bascoat vesèm de lotjaments a la mòda dau país. Perqué quò es possible alai e pas aicí, miladieus? En Bretanha dins quauques comunas, avèm l’astre d’aver de lotjaments a la mòda dau país tanben. Amb d’ostaus en tèrra, coma a Romillë, dins lo país de Rene/Roazhon. Per exemple a Romillë, tanben que los HLM son en tèrra!
 
A Silfieg (País Pourlet -56-), dins l’ecolotjament d’Oglenn ar Vourc’h, las botissas e lo PVC son enebits e fòrça ostaus son en tèrra. Aqueste lotjament es devengut un curiositat mondiala.
 
Ai parlat daus dròlles mas, maugrat tot, quin serà lor environament breton o occitan dins de ciutats en betum gaireben identicas a Orilhac, Vesoul o Loudia (Bretanha), sens las lengas nòstras, lo galò, lo breton e l’occitan, e amb Black M. dins las aurelhas e Minecraft sus l’smartphone?
 
Vòle pas d’aqueste avenidor desencarnat. Vòle pas d’una Bretanha o Occitània “foirfouillizadas”. Sèm a chaplar nòstre patrimòni, nòstra richesa, nòstra arma. Chau faire pression sus las comunas per metre fin au chaple arquitecturau.
 
Coma en Corsega, chau metre fin a la costabravizacion de las nòstras còstas e la foirfouillizacion de las vilas nòstras! E chau impausar una reïdentitarizacion dau bastir!
 
 
 
 


abonar los amics de Jornalet
 



publicitat



Comentaris

3 d'abril 14.07h

Article sensible, realista. Erós de legir un article recampant queles tèmas !
Finalament, viram de lònga au torn dau meme problèma : nòstra identitat verbala amai gestuala, imaginària, collectiva, culinària, architecturala e mai encara, vos save ieu. De qué podèm faire còntra l'abestiment generau, lo materialisme e l'endividualisme, la manca de vida, de solidaritat e de creacion familhalas, comunautàrias, esperitualas ? Tant de gaubi, de saupre-faire e de saupre-viure perduts ! Tant ... Legir la seguida


Valora aquest comentari:   votar positiu 4   votar negatiu 0
Respondre comentari replica Comentari inadequat   Formulari d'abús de comentari

5 -10 -20 -tots
1




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat

Perfil

Fabien Lecuyer

Fabien Lecuyer logo rss

Jornalista breton, es alcap del setmanier en galo Runje

mai d'informacions

contactar l'autor

Mai d'articles

Archius




Etiquetas

D'autres articles


Jornalet, gaseta occitana d'informacions