CAPÇALERA: HISTÒRIA DE LA CUINA CATALANA I OCCITANA
CAPÇALERA2: FAI-TE SOCI

Jornalet, gaseta occitana d'informacions

Divendres, 6 de decembre

Federacion dels Ensenhaires de Lenga e Cultura d'Òc (FELCO)

Divendres, 22.5.2015 03h00

Reforma dels collègis, mesa a mòrt de las lengas regionalas


Comentaris 7 comentaris    
Dolent Fluix Bo Molt bo Fabulós (4 vòtes)
carregant En cargament


Sèm engatjats, la FELCO, dins una batèsta ferotja contra aquela reforma dels collègis que, se passava, nos escanariá complètament.
 
 
Immobilisme? una insulta per los collègas d’occitan
 
E tenèm a dire que nòstra posicion es pas portada per l’immobilisme o lo corporatisme coma los tenents de la reforma o voldrián faire creire, dempuèi de las mai nautas esfèras de l’estat. Estent la precaritat de nòstre ensenhament, que la reforma agreujariá mai encara, far de nosautres de privilegiats es una insulta.
 
L’interdisciplinaritat, la pedagogia de projècte, la gestion de l’eterogeneïtat, fai de decènnis que los ensenhaires d’occitan i son engatjats. Mas se pòt pas faire d’interdisciplinaritat sens de coneissenças disciplinàrias solidas, causa impossible amb una reforma que prevei pas d’autra plaça per un ensenhament de nòstras lengas que “lenga 2” (çò qu’es quasi jamai causit), e qu’escafa de fach las magras possibilitats representadas fins ara per lo perlongament al collègi dels ensenhaments bilingues dins lo primari, aquí ont n’i aviá, e la possibilitat de causir un ensenhament opcional, lo que, fins ara, aculhissiá lo mai d’escolans.
 
E quand vesètz la composicion d’aqueles famoses Ensenhaments Practics Interdisciplinaris:
 

— desvolopament durable
— sciéncia e societat
— còs, santat e securitat
— informacion, comunicacion e ciutadanetat
— cultura e creacion artisticas
— mond economic e professional
— lengas e culturas de l’Antiquitat
— lengas e culturas estrangièras o regionalas,
 
 
EPI que sa causida poiriá cambiar del temps de l’escolaritat al collègi, podètz èsser segurs, e mai se capitam de i impausar un pauc d’occitan, qu’es pas aital que se bastirà un estudi de la lenga!
 
 
Las menaças son plan aquí
 
Lo burèu de la FELCO las a resumidas dins un tract qu’es en linha e que pòt èsser tirat en aficha. Aquel tract se vòl un otís pedagogic per l’argumentacion dels collègas.
 
Rai… Nos diguèron, lo cabinet del Ministèri, que lo bilinguisme èra pas tocat per la reforma… Mas coma aquesta nos facha subretot per esparnhar d’oras que còstan, avèm pas l’assegurança que las oras utilizadas dins tal o tal establiment per ensenhar l’istòria-geografia en occitan (es aquò, en realitat, lo bilinguisme) als qualques escolans bilingues, seràn servadas per aquel usatge…
 
E es aquela mesa en concurréncia sauvatja que refusam, entre disciplinas e entre collègas, que la reforma vòl installar sota pretèxt d’autonomia dels establiments.
 
Nos parlan de “còlas pedagogicas” qu’auràn de libertat per causir lor aplicacion de la reforma, e sabèm plan qu’als professors d’occitan, lor agrada, quora o pòdon, de trabalhar amb los autres collègas. Malurosament, aquela possibilitat lor es pas totjorn aisida quora son afectats sus 2, 3 o 4 establiments! Cossí defendre sa disciplina dins aquelas situacions, amb un contèxt que fai créisser la demanda – legitima – d’atribucion dels mejans de mai en mai estequits a l’ajuda pedagogica als escolans en dificultat?
 
Sèm inquiets tanben per la rompedura de continuitat dels ensenhaments amb la disparicion de la possibilitat d’ensenhar la lenga en 6ena. Seriá pas una causa illegala, aquò, d’empachar que l’occitan siá ensenhat en 6ena? Alara que l’article L 312-10 del Code de l’Education indica “Les langues et cultures régionales appartenant au patrimoine de la France, leur enseignement est favorisé prioritairement dans les régions où elles sont en usage. Cet enseignement peut être dispensé tout au long de la scolarité selon des modalités définies par voie de convention entre l’Etat et les collectivités territoriales où ces langues sont en usage”?
 
 
Se far entendre
 
Pas aisit de se far entendre pels professors d’occitan, quand la premsa (e de còps l’opinion) se focaliza sus las letras classicas e, de còps que i a, fai una plaça desmesurada a de criticas reaccionàrias de la reforma… Sabètz, aqueles que pensan que la solucion a las dificultats del collègi es de triar, tre la 6ena, los escolans… O encara aqueles que se focalizan sus una vision estrecha dels programas d’istòria: ausiguèri un reac, l’autre jorn, sus France Culture evocar la plaça desmesurada donada a l’islam dins un país de cultura judeo-cristiana (sic…) Subretot que fa de decènnis que l’islam es ensenhat, tant coma las debutas del judaïsme e del crestianisme. Se vei plan aquí que las idèas politicas, d’aquesta passa, son plan brolhadas per un ambient general de remontada dels integrismes!
 
Alara? Alara nos sembla, a la FELCO, qu’en mai de nòstra accion especifica, en mai de nòstra accion amb las autras lengas de França, nos cal èsser presents – e vesedors – pertot ont se menan d’accions e i faire entendre nòstra pichòta musica, al mitan dels autres collègas.
 
 
Se mobilizar, encara e totjorn
 
I aguèt aqueste dimars 19 de mai un moviment nacional de protèsta contra la reforma.
 
La FELCO, coma associacion, prenguèt pas posicion sus la participacion a aquel moviment intersindical. Per contra, nos semblèt ESSENCIAL que los collègas que participarián a las manifestacions o fagan amb un drapèl occitan e qu’ensagen de se faire ausir dels responsables sindicals presents, dels medias... per presentar sas rasons especificas de manifestar.
 
Demanda plan ausida de la part de nòstres collègas: a Montpelhièr, a Marselha, a Tolosa, a Nimes, i èran los drapèls occitans e lo tract de la FELCO tirat en aficha. Mantun collèga foguèt entrevistat per la premsa, i aguèt d’entrevistas a l’emission de France3 Tolosa e a aquela de France3 Pays gardois, a Marselha, dins una video de La Marseillaise, la paraula es donada a una collèga d’occitan.
 
En Bretanha, tanben se parlèt de la menaça sus la lenga. Paraula portada per un sindicat d’ensenhaires.
 
Mas de la manif de Montpelhièr ont los professors de latin faguèron una magnifica operacion de comunicacion, ne tiri la conclusion qu’avèm encara de leiçons de prene! Agachatz las fòtos e comprendretz per que la premsa parlèt tant d’eles!
 
D’autras accions s’apreparan. Lo ministèri a fach paréisser lo decret, mai çò escrich se pòt corregir. Una manif en Peiregòrd, montada per un collectiu occitan ont son presents nòstres collègas. A Tolosa, lo CREO se vai recampar aqueste dissabte per envisatjar la seguida. Anecdòta amusanta: la FLAREP es convidada a dejunar dimècres que ven, lo 27 de mai, al Ministèri. I aurà qualqu’un de la FELCO dins la delegacion… Inedicha, la convidacion a dinnar! En 20 ans de passejadas a París, carrièra de Grenelle, nos èra pas encara arribat… Domatge que lo repais en question arribèsse una setmana après la publicacion al Jornal Oficial del decret e de l’arrestat que pòrtan sus l’aplicacion de la reforma… Enfin, vos contarem!
 
Pichòta revista de premsa en complement:
 
Article de Midi Libre (amb qualques errors que vos escaparàn pas…),
Emission sur France Bleu Toulouse.
Emission sus France Bleu Périgord
Lo blog de Viure al país.
Aquò d’aquí
Video de La Marseillaise
 
De completar per vos.



publicitat
BANER1-2-3: DGPL TRADUCTOR



Comentaris

24 de mai 18.17h

#6 Se discuti pas del contengut es que i a pas res de discutir. Es complet, ja o escriguèri.

E per èstre clar, vos daissi ara dins lo vòstre monològ, ara que soi dins los propaus de cafè del comèrci, me disi sonque val melhor pr'aquò que d'èstre dich falord e empresonat en Siberia...


Valora aquest comentari:   votar positiu 5   votar negatiu 6
Respondre comentari replica Comentari inadequat   Formulari d'abús de comentari

24 de mai 12.59h

A Joan-Francés. Perqué, alara que reconeisses que l'article es "plan documentat e complèt", discutas pas de son contengut puslèu que de tornar dire d'aproximacions e de mescladissas ! De qué ven faire Mélenchon al mitan dels responsables sindicals de l'Educacion Nacionala ?
"M'entresenhi coma pòdi que soi pas ensenhaire", dises ! e ben entresenha-te encara un pauc e espèra d'o aver tot comprés abans d'escriure !
E comença per espepissar de pròche los articles en linha sul sit de l... Legir la seguida


Valora aquest comentari:   votar positiu 8   votar negatiu 4
Respondre comentari replica Comentari inadequat   Formulari d'abús de comentari

23 de mai 17.57h

Compreni que n'avètz besonh, e lo problèma que sètz embarrats dins lo sistèma de l'educacion nacionala, es que del defòra avèm benlèu de mal a comprene l'energia que vos cal e lo temps que vos manja. Aquel article es plan documentat e complèt, es tras qu'util que sotalinha que la lucha que menètz es contra una politica que de lònga vòl la supression de l'ensenhament de l'occitan: la diminucion "demografica" del nombre d'ensenhaires d'occitan es una volontat de l'administracion centra... Legir la seguida


Valora aquest comentari:   votar positiu 6   votar negatiu 6
Respondre comentari replica Comentari inadequat   Formulari d'abús de comentari

23 de mai 11.36h

Joan Francés, per lo combat que menam, avèm pas besonh d'aproximacions o de lenga de fusta per cafè del comèrci, e mai sia de cafè de comerci occitan. Avèm besonh de dorsièrs tenguts, cada jorn, cada setmana, avèm besonh d'interpelar tal o tal sindicat sus tala o tala causa precisa que diguèt.


Valora aquest comentari:   votar positiu 11   votar negatiu 6
Respondre comentari replica Comentari inadequat   Formulari d'abús de comentari

23 de mai 09.45h

M'entresenhi coma pòdi que soi pas ensenhaire, e que fa bèl temps qu'ai renonciat a créser qu'aquel microcòsme aviá la capacitat de comprene lo monde de'n defòra.

E per çò qu'es dels sindicats francés, coma de las organizacions politicas francesas, coma ditz un amic provençal, cal pas doblidar qu'a la revolucion, dins l'amassada, los girondins èran a drecha e los jacobins a gaucha.


Valora aquest comentari:   votar positiu 5   votar negatiu 8
Respondre comentari replica Comentari inadequat   Formulari d'abús de comentari

22 de mai 22.17h

A Joan Francès Blanc : de qu'es aquò " los "collègas" ensenhaires, dels sindicats de l'ideologia jacobina" ? Pòs pas èsser mai clar ? Perdona-me, te coneissi pas, mas aqueles mantras de lenga de boès" sindicats jacobins nha nha nha...", aquò alassa e dona pas enveja al mond de se batre...
La FELCO sèm dins la batèsta, pas dins la deploracion. E aquò pren mai de temps !

Puèi, STP, ensaja d'apelar un cat un cat, de pas metre tot lo mond dins la mema banasta e de t'entresenhar sus las... Legir la seguida


Valora aquest comentari:   votar positiu 14   votar negatiu 4
Respondre comentari replica Comentari inadequat   Formulari d'abús de comentari

22 de mai 08.15h

E òc, son braves los "collègas" ensenhaires, dels sindicats de l'ideologia jacobina (me soveni de la lucha feròtja que deguèt menar lo professor d'occitan de Noisy le Grand, e l'adversari èra pas lo rectorat, mas los collègas e los sindicats - ganhèron los collègas quand l'ensenhaire deguèt prene la retirada)... Lo problèma vertadièr es la "concurréncia" installada per la refòrma.


Valora aquest comentari:   votar positiu 5   votar negatiu 9
Respondre comentari replica Comentari inadequat   Formulari d'abús de comentari

5 -10 -20 -tots
1




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat
BANER1-2-3: DGPL TRADUCTOR

Perfil

Federacion dels Ensenhaires de Lenga e Cultura d'Òc (FELCO)

Federacion dels Ensenhaires de Lenga e Cultura d'Òc (FELCO) logo rss

La Federacion d’Ensenhaires de Lenga e Cultura d’Òc (FELCO) regropa las associacions academicas d’ensenhaires d’occitan (CREOs, AELOC per Ais-Marselha e APLR per Niça) de l’Educacion Nacionala francesa.

mai d'informacions

contactar l'autor

Mai d'articles

Archius




D'autres articles


Jornalet, gaseta occitana d'informacions