CAPÇALERA: HISTÒRIA DE LA CUINA CATALANA I OCCITANA
CAPÇALERA2: FAI-TE SOCI

Jornalet, gaseta occitana d'informacions

Dimècres, 13 de novembre

Federacion dels Ensenhaires de Lenga e Cultura d'Òc (FELCO)

Dimècres, 18.1.2017 03h00

Costat deputats e senators: lo pichon juec de las questions e de las respòstas


Comentaris 3 comentaris    
Dolent Fluix Bo Molt bo Fabulós (5 vòtes)
carregant En cargament


Maria Joana Verny, representant la FÈLCO al collòqui Lengas regionalas de l'Assemblada Nacionala, lo 4 de junh de 2014




Etiquetas
educacion, elegits, ensenhament, fèlco, politica

Seguir lo trabalh dels elegits: una constanta per la FELCO
 
La FELCO es quauque ren que fasèm despuèi pron temps: far conóisser als elejuts nacionaus, dins las doas assemblaas, los problèmas que rescontram suu terrenh, e que nos semblan de justifiar que l’elejut pause una question, escricha (lo mai sovent) o orala, au ministèri concernat (per nosautres, essencialament lo de l’Educacion Nacionala, la Cultura respondon tanben, a l’escasença, mas a d’autres).
 
Aviam fach un premier bilanç d’aquelas questions e de las respòstas qu’obtenian aicí-meme en julhet de 2014.
 
Aüra que s’avesinam vès la fin d’una legislatura, fin febrier per precisar, es benlèu pas inutil de completar aqueu premier examen.
 
En assenhalant que totes los elements, e las questions coma las respòstas, lo curiós o pòt trobar suu sit FELCO CREO, actualizat despuèi las debutas de la legislatura en 2012: 199 questions, contra 205 per la legislacion precedenta, es a dire una chifra constanta. Lo trabalh de recensament precís per lo Senat es en trinc.
 
Avèm acompanhat aqueu corpus
 

— d’un bilan sintetic de las intervencions dels deputats occitans classaas per departament, region, grop politic, tèma de l'intervencion, seguit d'un bilanç de las intervencions dels deputats de las autras regions.
 
d'un tablèu excel qu'analisa totes los contenguts, e que dona las colors politicas dels elegits, lor departament d'origina e, de segur, lo tèma de la question pausaa.
 
 
Las questions foguèron subretot pausadas en debuta de legislatura
 
Lo ritme s’es puèi ralentit perque la debuta de la legislatura foset marcat per un trabalh intense sus la lei escòla: aqueu trabalh coordonat interlengas nos permetet d’obténer la preséncia de las LR dins una lei que las ignorava a la debuta. Batèsta tanben per los pòstes au CAPES, menaçats, amb obtencion d’una session suplementària (en 2014 ont l’i aguet 2 recrutaments de 4 pòstes), puèi nos permetet de n’obténer 5 puèi 6.
 
Me limitarei aquí a quauques remarcas suus darriers desvolopaments. Aurem escasença de tornar sus un bilan global dau periòd 2012-2017 e ne profitarem per interpelar los candidats a la presidenciala e a las legislativas.
 
 
Quinas questions dempuèi 2014?
 
Globalament, despuèi julhet de 2014, son estaas pausaas 29 questions a l’Assemblaa, e 24 au Senat, bona part per d’elejuts occitans (12 a l’Assemblaa, 11 au Senat) e tochant sieie l’occitan directament, sieie la question de las lengas regionalas en generau. Chau notar totun un relenquiment dau ritme de las questions en 2016 (una a l’Assemblaa…) Es verai que la question es estaa abordaa dins d’autres contextes, per exemple la discussion de la PPL Le Roux, que n’avèm çai tanben parlat.
 
Se precisam lo contengut de las questions, veèm que los subjectes mai abordats son
 
— la reforma dau collègi (5 questions a l’assemblaa, 6 au Senat),
 
— los pòstes au CAPES (8 dins chascuna de las doas assemblaas).
 
Venon puèi de questions
 
—  sus la formacion dels mèstres, resumaa, d’alhors, a l’estatut de l’ISLRF, çò es lo sector associatiu, coma se i aviá pas besonh de formacion dins las 32 ESPE de nòstre espaci. Aquelas questions (4) son curiosament pausaas per de deputats alsacians del grop Les Républicains.
 
— Autra question regulara, la presa en charja per una comuna dels fraisses liats a l’afectacion d’un enfant dins una classa ont l’i a un ensenhament de lenga regionala, quand l’escòla de la comuna de residéncia n’a pas.
 
— Doas questions a l’assemblaa sus l’agregacion –s’acapita que nos prometon de ne crear una dins las setmanas que venon (veirem ben)-
 
— de questions isolaas sus d’autres subjèctes (la Charta, l’opcion Lenga regionala als bacs tecnologics…).
 
Mens de questions pausaas au ministèri de la cultura, a respècte de çò que se povia observar einant julhet de 2014,
 
mens de questions dictaas per lo localisme (lo “santongés” contra lo peitavin, e, naturalament, lo provençau contre la resta dau monde).
 
Per la màger part, las questions son donc lo rebat de las demandas que la FELCO fasiam als elejuts. Ne fasèm pas un motiu de fiertat particulara: es una estrategia qu’avèm chausit de menar, entre autras, sembla que las autras associacions occitanistas an fach de chausias diferentas.
 
 
Las colors politicas
 
Per quant a la color d’aquelos que pausan las questions, a l’assemblaa, la gaucha ne semonde lo mai (15 PS, 2 Ecologistas, sus un totau de 24), per contra au Senat, es la drecha qu’es mai presenta, (5 LR e 2 UDI contra 3 PS): aquí, çò que jua es la color diferenta de la majoritat senatoriala, e benlèu lo fach qu’intervenèm mai dau costat dels deputats que non pas d’aqueu dels senators.
 
A totas aquelas questions, l’art de respondre per los nuls.
 
A las 29 questions correspondon en aparéncia 20 respòstas –mas 7 son fachas a de questions pausaas avans julhet de 2014, pròva que tot fenís qu’arriba.
 
Aquestas respòstas son lo mai sovent estereotipaas, coma o aviam ja notat en son temps.
 
Son tanben mens precisas que las que dona en generau lo ministèri de la cultura quand es questionat. Es evident que l’otís mai utilizat carriera de Grenelle es la fotocopiaira.
 
Perqué pas, segur (après tot quand mai d’un deputat pausa la mema question, en seguent lo modèl porsut per l’associacion que l’a contactat, es pas totalament absurd de far la mema respòsta per totes).
 
Lo problèma comença quand la respòsta pren pas en compte l’especificitat de la question e fai mina de creire que s’amerita la mema respòsta qu’una autra question pausaa a un autre moment. Aquò dona sieie de respòstas vueidas, en pura lenga de bòsc tecnocratica (es lo cas sus la reforma dau collègi, suu mòde, tot vai ben, durmetz, brave monde), sieie de gags.
 
Un exemple de gag: la tradicion de las questions suu nombre dels pòstes au CAPES es ja anciana, anteriora, finda, a la reduccion ferotja de 2003.
 
Lo plumitiu de servici au ministèri (avèm la tentacion de suspechar qu’es lo meme despuèi aquela data, que que sieie lo ministre o lo conselhier charjat de sègre, de mai o mens luenh, la question de las lengas regionalas), lo plumitiu de servici, doncas, pòt aver lo sentiment rassegurant que fai pas mestier lo chambiar de la respòsta. Mas aquò dona de còps que l’i a de conséquéncias pintorescas.
 
La respòsta estandard es estaa longtemps que, tot comptat rebatut, lo nombre de pòstes correspondia als besonhs, e quitament despassava, de fach, aquelos besonhs.
 
Avèm evocat lo carcul viciós que permetia aquela aproximacion, e avèm manca pas sotalinhat lo fach que de tota evidéncia per aqueu monde, l’idèia de desvolopar amb de recrutaments un còs d’ensenhaires creat en 1991, logica que logica, èra pas pensabla. L’argument decisiu per elos, encara encuèi, es lo fach que la demografia dau còs ne fai un còs jove, ont las partenças a la retiraa (que los govèrns de drecha coma de gaucha consideran coma lo bon motiu per sucrar de pòstes…) son paucas.
 
E triomfalament explicavan en 2014 que l’i avia ren qu’una partença en retiraa prevista per la rentraa 2015. La FELCO s’eriam fach un plaser, après verificacion, d’assenhalar que lo nombre correcte èra de 6, e pas de 1.
 
Nòstres correspondents deputats començan de repercutar aqueu simple carcul tre lo mes de junh 2014. Dins nòstra cronica de julhet de 2014 escriviam: “Esperam amb curiositat de veire çò que cauprè dins las respòstas que fenirèn pron per venir, dins quauques meses o dins un an”. Siam pas estats decebuts.
 
A la fin de l’an, verai, lo ministèri a chambiat son argumentari, en afortissent que sols 12 capesians d’occitan avian mai de 60 ans. Mas visiblament a chalgut un moment per trobar aquela escapa, car encara en setembre de 2014, quatre deputats, Mesquida, Teissier, Fabre e Molac recebon la respòsta que sola una partença en retiraa es prevista
 
Brèu, lo factotum charjat de respondre avia pas integrat que la rusa qu’avia mai o mens marchat povia pus marchar, e que los deputats lor chalia benlèu dire aure.
 
Prepauso una explicacion materialista: las respòstas son redigias
 
1. après un disnar particularament excellent.
 
2. O après un gostaron de premiera ufèrt per la partença d’un collèga a la retiraa (o per un pantoflatge interessant au Conselh d’Estat,
 
3. o dins una entrepresa privaa o dins tota autra mena de fromatge melhor que lo servici d’un ministèri promés de tota evidéncia a una esperança de vita breva).
 
A chascun de chausir son ipotèsi en foncion de son mai o mens grand degrat d’indulgéncia.
 
Aquò dich, dins nostra cronica de julhet de 2014, avio escrich:
 
Siam pas en situacion de poer trenchar lo debat interessant sus çò que los caracteriza: incompeténcia o malonestetat. Son benlèu innocents, dins tots los sens que lo mot a en occitan. Mas poèm totun considerar qu’auriam besonh, e los elejuts nacionaus que nos sostenon encara mai, au respiech elementari qu’implicaria qu’un respondesse a las questions, e qu’un respondesse corrèctament”.
 
Franchament, vòlo pas dire, mas tròbo pas mielhs…
 




Jornalet es possible gràcias al sosten economic e jornalistic dels legeires e benevòls. Se podètz sosténer en venent sòci dels Amics de Jornalet o de l’associacion ADÒC, contribuiretz a far un mèdia mai independent e de melhora qualitat.



publicitat
BANER1-2-3: DGPL DICTADES



Comentaris

18 de genièr 18.26h

#2 Mercé per aquestas entresenhas inspiraas per una experiéncia directa. Aquo dich, universitari qu'universitari, sio pas completament estrangier a la vita reala, e sabo coma son fabricaas las non-respostas a las questions ; se fasèm ges d'illusion suu contengut de las respostas, e n'esperam pas una conversion massissa dels palotins dau ministèri. Co que comta es que de far pausar de questions ramenta als deputats l'existéncia de nostres problèmas, e compelis los palotins dau ministèri ... Legir la seguida


Valora aquest comentari:   votar positiu 18   votar negatiu 6
Respondre comentari replica Comentari inadequat   Formulari d'abús de comentari

18 de genièr 14.41h

Sembla que lo redactor de l'article çai-sus, quitament se siá un universitari), sapiá pas cossi foncciona l'administracion francimanda e cossi son faites las respònsas dels ministres a las questions parlamentarias !

Me permeti, compte tengut de la mia experéncia dins l'administracion francesa), de porgir qualques entresenhas.

Cada jorn i a un molon de questions escrichas e oralas (aquestas darreras legidas a las sesilhas de l'Assemblea Nationala o del Senat) que arriban als ministèris... Legir la seguida


Valora aquest comentari:   votar positiu 4   votar negatiu 2
Respondre comentari replica Comentari inadequat   Formulari d'abús de comentari

18 de genièr 12.15h

E los ratios :
Deputats occitans nombre total de las questions pausadas e nombre total de las questions qu’an trach amb l’occitan . = La pression occitana rapòrt a l’occitan
Totis los deputats nombre de questions pausadas e nombre total de las questions qu’an trach ambe la lengas minoritarias. = la pression generala rapòrt a las lengas minorizadas
O caldria aver tanben per las annadas anterioras, atal se poria siegre milhor amb un pichon grafa coma aiceste :

http://www.hostingpics.ne... Legir la seguida


Valora aquest comentari:   votar positiu 2   votar negatiu 14
Respondre comentari replica Comentari inadequat   Formulari d'abús de comentari

5 -10 -20 -tots
1




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat
BANER1-2-3: DGPL AN LAFONT

Perfil

Federacion dels Ensenhaires de Lenga e Cultura d'Òc (FELCO)

Federacion dels Ensenhaires de Lenga e Cultura d'Òc (FELCO) logo rss

La Federacion d’Ensenhaires de Lenga e Cultura d’Òc (FELCO) regropa las associacions academicas d’ensenhaires d’occitan (CREOs, AELOC per Ais-Marselha e APLR per Niça) de l’Educacion Nacionala francesa.

mai d'informacions

contactar l'autor

Mai d'articles

Archius




D'autres articles


Jornalet, gaseta occitana d'informacions