CAPÇALERA: publicitat jornalet
CAPÇALERA2: FAI-TE SOCI

Jornalet, gaseta occitana d'informacions

Dissabte, 20 de julh

Federacion dels Ensenhaires de Lenga e Cultura d'Òc (FELCO)

Dissabte, 29.4.2017 03h00

Novèla circulara “lengas regionalas”: salvats pel gong


Comentaris 8 comentaris    
Dolent Fluix Bo Molt bo Fabulós (3 vòtes)
carregant En cargament


Es fait. Longtemps promesa e pas mai esperada dempuèi qualques meses, la circulara relativa a l’ensenhament de las lengas e culturas regionalas n° 2017-72 del 12 d’abrial de 2017 ven de paréisser al Butletin Oficial de l’Educacion Nacionala del 13 d’abrial passat.
 
Foguèrem los primièrs estonats quand, lo 15 de març passat, lo ministèri contactèt la FELCO e la FLAREP (Federacion per las Lengas Regionalas dins l’Ensenhament Public que ne sèm membres amb d’autras associacions d’ensenhaires e de parents obrant per l’ensenhament de diferentas lengas de França) per lor anonciar que trabalhava sus una circulara novèla e qu’un acamp se tendriá mens d’una setmana après, lo 20 de març, al ministèri, per ne parlar. Lo maraton començava: tres setmanas d’escambis estrèits e de tensions per ensajar de metre sus pè un tèxt que siá pas un recuòl per rapòrt a las circularas de 2001 e 2003.
 
O sabiam plan que, dempuèi la mesa en plaça de la refòrma del collègi lo corpus reglamentar enquadrant l’ensenhament de nòstras lengas èra flac e que rectorats, directors departamentals e caps d’establiments avián sovent tendéncia a “doblidar” son existéncia. Sabiam en mai dempuèi qualques meses e un recors dels catalans de l’APLEC davant lo tribunal administratiu de Montpelhièr a prepaus del non respècte per l’administracion de l’Educacion Nacionala de la reglamentacion sus l’ensenhament bilingüe, que la justícia administrativa remetiá bravament en causa las circularas precedentas e que lo quite Conselh d’Estat aviá demandat (en 2005!) al ministèri d’abrogar la circulara 2001-167 portant sus l’ensenhament bilingüe, butant lo tribunal administratiu a considerar qu’aquel tèxt aviá pas cap de valor. Notam al passatge qu’aquela decision del Conselh d’Estat respondiá a una ataca de la Societat dels agregats qu’aparentament aima pas las lengas regionalas; avèm pas encara la reaccion d’aquela societat a la creacion d’una agregacion de lengas regionalas, justament…
 
Lo primièr projècte de tèxt mandat pel ministèri lo 17 de març representava clarament un recuòl per rapòrt a l’existent e, de nòstre vejaire, un dangièr per nòstres ensenhaments. Ne faguèrem un estudi critic menimós e comencèrem de fargar d’arguments per demandar una autra redaccion.
 
L’acamp del 20 de març foguèt rassegurant, lo sénher Noblecourt, director de cabinet de la ministra explicant qu’èra pas question per el de faire paréisser un tèxt qu’auriá pas l’adesion de las associacions representativas e qu’èra lèste a discutir de cadun dels punts que voldriam joslevar.
Las doas setmanas seguentas foguèron doncas consacradas a un fum d’escambis entre las associacions membres de la FLAREP per adobar e melhorar lo tèxt ministerial per tal de dire que siá pas un recuòl per nòstras lengas. Escambis, navetas amb lo ministèri fins al 10 d’abrial e, enfin, un tèxt.
 

Que ditz?
 

— Primièr, ven confimar la validitat dels dispositius d’ensenhament bilingüe a paritat orària e las possibilitats d’iniciacion. Melhor, dins la draia de la lei de refondacion de l’escòla de 2013, exprimís la volontat de favorizar e desvolopar l’ensenhament bilingüe dins lo primari tant coma dins lo segondari e encoratja la concertacion e l’informacion pel desvolopament de sits semondent aquel ensenhament.
 
— En mai, tant sul plan de l’ensenhament bilingüe coma sul plan de l’ensenhament opcional o d’iniciacion, balha un encastre tecnic pro clar per çò qu’es del oraris minima. Es un esclargiment util e important dins l’encastre de la refòrma del collègi.
 
— Una autra causa —e es essencial per nosautres—  es que la circulara tòrna afirmar l’importànça dels Conselhs Academics de las Lengas Regionalas (CALR): tòrna dire que devon èsser recampats dos còps l’an al minimum e que son associats a la definicion e a l’actualizacion de la mapa academicas de las lengas que deu permetre de fargar de percors coërents de la mairala al bachelierat. Amai, accepta la demanda que fasèm dempuèi d’ans de comissions tecnicas que se pòscan acampar entre doa plenàrias del CALR.
 
— Enfin, lo tèxt subordona pas l’existéncia d’aquel ensenhament a la signatura de convencions entre collectivitats territorialas e rectorats quitament se, solide, los encoratja. Es quicòm de fòrça important per l’ensenhament de l’occitan que, sus l’ensems del territòri, mai d’una academia beneficia pas d’una convencion.
 

Alara òc, lo tèxt es pas perfèit
 
Esperàvem en particular d’i véser figurar la question de la formacion dels ensenhaires e l’afirmacion d’una ofèrta generalizada que militam per ela dempuèi bèla pausa.
Regretam tanben, plan segur, qu’aquel tèxt arribèsse tant tard e foguèsse estat redigit dins una tala urgéncia… e podèm estimar qu’aquel govèrn qu’aviá tant promés faguèt pas tot son possible per ensajar de realizar sas promesas, de la ratificacion de la Charta europenca a aquela circulara, en passant per una lei, als moments ont sabiá que se podriá pas faire o que se fariá amb de concessions minimalas de sa part.
 

Rai, avèm al mens quicòm

Un tèxt que nos balha un encastre un pauc mai solid e de possibilitats de desvolopament.

Un tèxt que sa difusion permetrà de faire d’informacion e de pedagogia —e un pauc de pression— alprèp de l’administracion — e aquò fa totjorn mestièr.
 
E o sabèm, coma de costuma, lo combat es pas acabat. A nautres de nos tornar mobilizar dins los meses venents per ensajar de tirar quicòm mai per l’ensenhament de nòstra lenga.
 
Legir sus nòstre sit lo comunicat en francés e lo comunicat de la FLAREP.


 
abonar los amics de Jornalet
 




 



publicitat
BANER1-2-3: DGPL TRADUCTOR



Comentaris

2 de mai 20.08h

#7 La realitat es que sem venguts de felibres. Aqueles felibres passeïsts que fasian tan rire l'alara joine moviment occitan de las annadas setanta. E mai que mai sem venguts de Catòias . Per aqueles qu'an legit "Lo Libre De Catòia" de Joan Bodon , es tras qu'espantant de constatar cossi tot çò que ditz de la religion "legitima e vernaculària" sevrada en van per quauques innocents perduts, se pòt ara aplicar a la lènga nòstra. E saique o-sabia plan lo Bodon quand escriguèt aquel r... Legir la seguida


Valora aquest comentari:   votar positiu 11   votar negatiu 0
Respondre comentari replica Comentari inadequat   Formulari d'abús de comentari

2 de mai 14.48h

#6 Bon, ben, anam nos penjar alora ? Ai pas besonh qu'un m'explique la situation de la lenga, ai d'aurelhas per auvir. Mas d'aqui a me plorar, l'i a de distància. Prefero doncas que los collèges de la FELCO contunhen de se batre per desvolopar la preséncia de l'oc dins lo servici public, car, o fagueson pas, veio pas quau o faria a lor plaça. Es pas totas las grands declaracions sus l' Estat jacobin que fai ren que nos aimar pas que riscan d'aguer de resultas mai concretas.


Valora aquest comentari:   votar positiu 1   votar negatiu 0
Respondre comentari replica Comentari inadequat   Formulari d'abús de comentari

2 de mai 12.46h

En 2021, farà setanta ans despuèi la lei Deixonne que vos trason brisetas per mesuras radicalas. I cresètz encara ? Mès enfin, vos fisetz pas pus dals politicians : aquò son parpèlas d'agaças per eles nòstras lengas "pas regionalas". Esperavan coma moriguèsson los vectors naturaus de comunicacion.
E ara, au mai s'amudiràn per l'espaci public quelas lengas (ja fach !), au mai perdràn tota legitimitat dinc l'opinion publica. Enfin... o cranhisse emb dau temps. Poirem provar ce que vold... Legir la seguida


Valora aquest comentari:   votar positiu 4   votar negatiu 0
Respondre comentari replica Comentari inadequat   Formulari d'abús de comentari

30 d'abril 11.01h

#4 Saique l'enemic N°1 de la democracia es la Marina, i-a pas de dobte sus aquò. Mas l'enemic N°1 de la lenga occitana es l'estat jacobiniste parisenc, qu'a ren de democratic rapòrt a las lengas regionalas. E lo Macron minhon, coma totis los autres pretendents (per pas dire sospirants !) al pòste de rei-president de la republica francimanda de Paris fai pas excepcion a la règla, e o-sabètz plan.


Valora aquest comentari:   votar positiu 20   votar negatiu 0
Respondre comentari replica Comentari inadequat   Formulari d'abús de comentari

29 d'abril 21.30h

La Marina de segur, o rescond pas, escobilharà tot aquò per la politica "french only". Macron, a pas dich res, perqué seriá contra. Arrestatz de delirar, l'enemic N°1 es Marina!!!


Valora aquest comentari:   votar positiu 9   votar negatiu 5
Respondre comentari replica Comentari inadequat   Formulari d'abús de comentari

29 d'abril 11.46h

#2 Puslèu qu'aquestas palhàssas de candidats que lo primièr n'a res a boldre e que l'autra pissa sus tota forma de democracia, la question vertadièra es de saber se los rectors d'acadèmia la van prene al seriós.

... de tan mai que sèm gaireben a la fin de l'annada escolària ...

... e qu'aqueles rectors s'en van anar d'aicí 1 a 2 meses ...

E doncas de se demandar puslèu se la circulària va pas demorar dins un cartonàs/tirador/letra/cauçeta/preservatiu (soslinhatz l'afirmacion cor... Legir la seguida


Valora aquest comentari:   votar positiu 5   votar negatiu 2
Respondre comentari replica Comentari inadequat   Formulari d'abús de comentari

29 d'abril 07.46h

E pensatz vertadièrament qu'un còp elegits lo Macron o la Marina van prene aquel tèxt al seriós ?


Valora aquest comentari:   votar positiu 18   votar negatiu 4
Respondre comentari replica Comentari inadequat   Formulari d'abús de comentari

29 d'abril 07.46h

E pensatz vertadièrament qu'un còp elegits lo Macron o la Marina van prene aquel tèxt al seriós ?


Valora aquest comentari:   votar positiu 16   votar negatiu 5
Respondre comentari replica Comentari inadequat   Formulari d'abús de comentari

5 -10 -20 -tots
1




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat
BANER2: 468x60 Aran TV

Perfil

Federacion dels Ensenhaires de Lenga e Cultura d'Òc (FELCO)

Federacion dels Ensenhaires de Lenga e Cultura d'Òc (FELCO) logo rss

La Federacion d’Ensenhaires de Lenga e Cultura d’Òc (FELCO) regropa las associacions academicas d’ensenhaires d’occitan (CREOs, AELOC per Ais-Marselha e APLR per Niça) de l’Educacion Nacionala francesa.

mai d'informacions

contactar l'autor

Mai d'articles

Archius




D'autres articles


Jornalet, gaseta occitana d'informacions