CAPCALERA: Lo Diari

Jornalet, gaseta occitana d'informacions

Dijòus, 1 d'octòbre

Gabrièu Balloux

Dimècres, 19.8.2015 03h00

Hontanèirs e venas: reflexions idrogeologicas


Comentaris 6 comentaris    
Dolent Fluix Bo Molt bo Fabulós (1 vòte)
carregant En cargament


Coma vo’n pòdetz dobtar, en rason de ma formacion scientifica, èri sceptic au subjèit daus sorcièrs —los que cèrcan les honts, he, pas los qu’ensorcilhan les gents! M’a totjorn semblat prampó estrange qu’un òme pusqui detectar d’ipoteticas vibracions emanant de l’aiga: coma pòt i auger una vena en un endret precís pusque la napa freatica s’estampla pertot? E pus encara qu’un pendule pusqui vibrar sus un plan —sau lòc, passa encara, mès sau plan...
 
Mès èi vist una videò que m’a hèit còp sec realisar una causa: la tradicion sorcièra sembla concernar los terrens karstics! En efèit, la videò mochèva lo trabalh d’un sorcièr dens les Corbièras. E s’aquò me disha encara sceptic sus l’aspècte radiestesic de l’afar, bota legitima lo concèpte de “vena” que trobèvi pèc.
 
Explicacion: Dens un sistèma geologic qu’es pas karstic, les diferentas estratas que son apiladas pòden èster qualificadas d’aquifères o d’epontes. Un aquifère (calcari, sable, tèrra doça, grava) es una estrata contenent aiga dirèctament disponibla dens sons interstices; un eponte (ardila, marla) es una estrata quasi-impermeabla. Se la cocha en contacte demb l’èrt es un aquifère, la napa que conten es qualificada de napa freatica o libra; aquera napa, qu’es pas somesa a de constrentas de pression, s’estampla librament capvath tota l’estrata geologica. La napa se voita au crotzament aquifère/eponte/atmosfèra, sii tot lo long d’un riu, sii sus una linha de honts (lavetz disen qu’es una napa cluncada), mès totjorn dens un plan; un drenatge n’es jamèi rectilinhe coma n’en seré una rolha, e se voita pas en un sol punt! Donc pas de “vena”. Aquò son les leis de la fisica daus fluïdes, pardina!
 
Adara, gueitam çò que se passa sus calcari karstificat. Coma au sàbetz benlèu, un sistèma karstic se fòrma per la dissolucion dau calcari per aiga contenent CO2; los exemples bien coneishuts en País d’Òc son dens los Causses o mèi dens les Aupilhas. Lo fonccionament es bien diferent de çò presentat avant. Dens un karst, i a pauc de tèrra e l’aiga s’infiltra vistament dens la ròca; apui seguís lo hilat d’henudas creadas per la dissolucion de la ròca, que son de camins privilegiats e qu’apèran drains en francés (“drens” en òc?). Enfin, los escolaments se rejunhen e l’aiga sòrt per un exutòri o sorça karstica, dont lo debit es irregulari.
 
Comprénetz donc bien que, dens ’queth segond cas, les venas d’aiga an una vraia existéncia. E, solide, dens un contèxte ont lo sòu es tot ressecat sustot en estiu, vésem bien l’importància daus sorcièrs, que finalament cèrcan a localizar aqueras crebassas ont passa l’aiga.
 
Malurosament, i a probable un bèth punherat de gents que vesen les napas freaticas coma de changòts sosterrens, o qué sabi...
 
Aquò dit, quala es la part d’autò-suggestion shes los sorcièrs? E sustot la part de deduccion a partir de l’observacion de la natura: reperar los higuèirs o los juncs, l’orientacion dau terren... Qui n’en sap? Jo, n’en sabi res!



publicitat
BANNER1: IEO Arièja



Comentaris

21 d'agost 12.54h

#5
Pas de problèma, amèi trobèvi pas lo mòt per ''sourcier''... mès.... ''hontanèir'' lavetz ;)


Valora aquest comentari:   votar positiu 1   votar negatiu 0
Respondre comentari replica Comentari inadequat   Formulari d'abús de comentari

21 d'agost 00.03h

#2 Avèm reparada l'error, mila perdons Sr. Balloux!


Valora aquest comentari:   votar positiu 1   votar negatiu 0
Respondre comentari replica Comentari inadequat   Formulari d'abús de comentari

19 d'agost 21.38h

Deviái èstre sus mos 20 ans. Lo paire, que trobava l'aiga,çaquelà amb plan mens de precision que los " professionals"( que se fasián pagar, e que te podián dire , sens s'enganar tròp, la plondor, lo débit e que te sabi mai), me donèt un forcatèl d'aulanièr per véser se i arribavi ieu tanben. E ben,òc! A ieu tanben, qu"èri d'aquel temps(e o soi encara), racionalista, la poncha del forcatèl se capvirava pel sòl, sens que la posquèssi reténer, emai forcèssi.... Anatz i comprén... Legir la seguida


Valora aquest comentari:   votar positiu 5   votar negatiu 0
Respondre comentari replica Comentari inadequat   Formulari d'abús de comentari

19 d'agost 11.08h

#1
aqueth tipe sembla un franc tiraclaire que nos embabula bien... ''e crompatz moslibres per n'en saber mèi''... sabi pas s'es un vrai fisician d'alhurs.


Valora aquest comentari:   votar positiu 0   votar negatiu 0
Respondre comentari replica Comentari inadequat   Formulari d'abús de comentari

19 d'agost 10.41h

i a una mespresa a prepaus dau titre. inicialament èra ''sorcièrs'' en francés ''sourciers'' e pas ''sorciers'' que pòt se díser''broishs''


Valora aquest comentari:   votar positiu 0   votar negatiu 0
Respondre comentari replica Comentari inadequat   Formulari d'abús de comentari

19 d'agost 09.25h

La sciença vòl pas auver parlar de çò que l'òm pòd pas captar en defòra de nos sens. Pertant, i a daus ultra-violets e daus infra-rojas que nòstre uelh vei pas.
I a lo magnetisme;
I a subretot totas las contradiccions de la sciença; la sciença vòl tot explicar; Tròba totjorn de las esplicacions que son lo pus sovent nonmas de las ipotesas.
Sabetz perque las planetas viran dempuei la nuech dau temps sens jamai tombar las unas sur las autras alaidonc qu'au bot de quauquas annadas ... Legir la seguida


Valora aquest comentari:   votar positiu 1   votar negatiu 2
Respondre comentari replica Comentari inadequat   Formulari d'abús de comentari

5 -10 -20 -tots
1




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat
BANER3: Ràdio Occitània

Perfil

Gabrièu Balloux

Gabrièu Balloux logo rss

Etnobotanista, diplomat en agronomia-environament. Creator e redactor dau jornau electronic Lo Sarmonèir

mai d'informacions

Mai d'articles

Archius




D'autres articles


Jornalet, gaseta occitana d'informacions