CAPÇALERA: publicitat jornalet
CAPÇALERA2: FAI-TE SOCI

Jornalet, gaseta occitana d'informacions

Dimars, 16 de julh

Gerard Joan Barceló

Dimenge, 20.7.2014 03h00

Causissi la patz


Comentaris 6 comentaris    
Dolent Fluix Bo Molt bo Fabulós (7 vòtes)
carregant En cargament


Al moment qu’escrivi aquestas linhas, pensi a mas originas argerianas: sens elas, me seriái tant interessat a çò de la dificultat de convivéncia dels pòbles e de las cresenças, en particular quand interferisson los desirs de dominacion?
 
Una causa es segura per ieu: non me pòdi taisar. Despuèi de setmanas que s’es agreujat lo conflicte israelopalestinian, assistissi a la pojada de l’asirança, non sonque dins los quites luòcs de la guèrra, çò qu’es de bon comprene, mas, probable pr’amor d’internet e dels malhums socials, de la multiplicacion dels imatges e de la globalizacion de l’informacion, pertot sul planeta, e doncas tanben en Occitània.
 
Pensi tanben a George Orwell e a Albert Camus que, d’esquèrra totes dos, se distancièron totun dels discorses estalinistas dominants en nom d’una reflexion prigonda sus la perversitat de l’opression, suls possibles manipòlis e mai dins la boca dels revolucionaris e, fin finala, sus la dignitat umana. Non oblidem jamai çò uman, que, per ieu, de fe crestiana evangelica, es tanben, en çò que ten de melhor, çò divin.
 
Soi tostemps estat favorable a l’independéncia de Palestina, per la meteissa rason qu’apuègi lo drech d’èsser liures dels occitans, dels catalans, dels còrses o de quin pòble que siá: la democracia. S’aquel pòble arabi se sent palestinian, non vòl integrar la comunitat aràbia israeliana, non vesi en nom de qué m’i opausariái – en cas que mon oposicion aguèsse qualque valor. Es tanben per ieu una evidéncia que los josieus, sovent secutats, son a l’encòp una religion e un pòble, amb totun de nuanças e una complexitat cambiadissa, segon l’istòria personala de cadun que pòt far variar los sentiments identitaris. Doncas, coma tot pòble, perqué non poiriá tanben aver son estat sus una tèrra que foguèt sieuna durant de sègles? “Una tèrra, doas legitimitats”, çò respondèt un jorn lo cantautor quebequés anglofòn Leonard Cohen, a l’encòp josieu cresent e monge bodista, dins una entrevista.
 
Quin espèr, enfin, quand, al mièg dels ans 1990, palestinians e israelians comencèron de se crear un avenidor de patz! Totòm semblava de pensar que los dos pòbles visquèran ensems, enfin! Per malastre, en 1995, la patz se tornèt alonhar amb l’assassinat del primièr ministre Yitzhaq Rabin per un fanatic israelian e l’eleccion del bellicista Benjamin Netanyahu. Gaireben 20 ans apuèi, cercam encara la patz, de biais gaireben desesperat.
 
Es la via de la patz que cal cercar, amb passion, amb testarditge. Non l’aconseguirem jamai se non vesèm la situacion coma es. Non compreni pas los qu’en nom de la condicion tragica dels palestinians dins la Lista de Gaza, en particular, oblidan las intencions de l’Hamas que cèrca de dominar lo pòble palestinian dins un estat islamic radical. De verai, es aquò, la lucha contra l’opression? Bailar lo poder a l’islamisme radical? De verai, caldriá, coma o desira l’Hamas e o vòlon tanben de militants que legissi tròp sovent, destruire l’estat d’Israèl? Condemnar a l’exili uèch milions de personas? Es aquò, una solucion umana?
 
Non podèm tanpauc presentar lo conflicte israelopalestinian de biais univòc coma una simpla guèrra de conquèsta. La reduccion del territòri qu’apelam uèi palestinian es tanben la consequéncia de las guèrras successivas, tre 1948, dels estats vesins arabis contra Israèl. Un cronicaire argerian crida per exemple, en se malfisar de l’instrumentalizacion islamista d’aquela guèrra, a la responsabilitat aràbia davant sas pròprias mancanças e a una solidaritat tan vertadièra coma critica non sonque amb Palestina mas amb la sofrença umana e l’oprimit, ont que siá.
 
Cèrtas, cossí non criticar l’apuèg bòrni de cèrtas autoritats josievas a la politica del govèrn d’Israèl, qué que faga? Mas podèm, totun, aprovar la pojada de l’asirança, non sonque contra lo govèrn israelian, contra la colonizacion illegala de Cisjordania o contra lo mesprètz de la dignitat del palestinian, mas tanben contra lo josieu? Volèm lo retorn de l’Euròpa mai sorna?
 
En mai d’aquò, nos cal de verai abandonar tot jutjament lucid davant los imatges que se propagan lèu-lèu dins nòstra civilizacion mediatica e que lor orror nos indigna? Sus Youtube avèm d’exemples de manipòlis de vidèos per d’islamistas e de jihadistas, çò que los israelians apèlan Pallywood. I a una guèrra dels imatges – quines que sián los camps que s’acaren – contra la quala una reflexion atentiva es necessària.
 
Coma òme mas tanben coma occitanista, non vòli pas un mond en guèrra amb de conflictes violents que menen a la pojada de totes los extremismes e, fin finala, a la pèrda de tota libertat. La pojada de l’islamisme radical, menaça liberticida, provòca mecanicament la pojada de l’islamofobia, instrumentalizada per l’extrèma drecha, menaça liberticida ela tanben. Bensai aquesta podriá ganhar sus totes los fronts, se puèjan a l’encòp antisemitisme e islamofobia.
 
Causissi doncas la patz, coma la causisson tanben de palestinians e d’israelians que refusan los extremismes bellicistas e cridan a la coexisténcia pacifica e justa de dos estats palestinian e israelian.
 
“Aüroses los qu’òbran per la patz: Dieu los apelarà sos filhs” (Matieu 5:9).



publicitat
BANER1-2-3: DGPL DICTADES



Comentaris

21 de julh 10.18h

#2 Las tèsis de Shlomo Sand son interessantas mas controvertidas, que los estudis genetics semblan de mostrar que, en general, las populacions josievas, malgrat una diversitat normala deguda al passatge del temps e a l'esparpalhament geografic, son d'originas mejanorientalas e que tanben las populacions palestinianas e los josieus d'orient tenon un patrimòni genetic diferent. Aquò empacha pas que i aguèt de segur de conversions: la Bíblia ela meteissa ne parla, amb d'exemples coma Caleb, N... Legir la seguida


Valora aquest comentari:   votar positiu 3   votar negatiu 2
Respondre comentari replica Comentari inadequat   Formulari d'abús de comentari

21 de julh 09.39h

#4 L'esperit de patz es tanben l'esperit de justícia, Farri.


Valora aquest comentari:   votar positiu 3   votar negatiu 0
Respondre comentari replica Comentari inadequat   Formulari d'abús de comentari

21 de julh 01.30h

Creigui sincèrament qu'ei ora de quitar de parlar de patz, e parlar de justícia e de drèts civius.


Valora aquest comentari:   votar positiu 3   votar negatiu 0
Respondre comentari replica Comentari inadequat   Formulari d'abús de comentari

20 de julh 14.30h

G. J. Barceló qu'a rason, encarats qui èm a la longor d'aqueth conflicte, a l'estanc de tot procèssus negociador e a la cristallizacion de la violéncia e de l'òdi dens amdús camps, entà nosautes ne s('ageish pas mei (solament) d'afirmar la nosta solidaritat, lo noste sostien, aus oprimits, aus palestinians, mes de ns'engatjar dens lo sostien a la patz.

Mes quan legi açò: "S’aquel pòble arabi se sent palestinian, non vòl integrar la comunitat aràbia israeliana..." que voi precisar... Legir la seguida


Valora aquest comentari:   votar positiu 3   votar negatiu 0
Respondre comentari replica Comentari inadequat   Formulari d'abús de comentari

20 de julh 12.17h

" coma tot pòble, perqué non poiriá tanben aver son estat sus una tèrra que foguèt sieuna durant de sègles? "
Disiau dins mon article recent :

" La preséncia mesma de l’Estat d’Israèl en Palestina e sa volontat d’expansionisme son lei consequéncias d’un mite religiós que vòu far creire que lei josieus forman un pòble unic, qu’es l’eiretier dirècte dei poblants dau Reiaume de Dàvid que governèt Jerusalèm cent ans abans Jèsus.
Lei recents trabalhs de l’istorian ... Legir la seguida


Valora aquest comentari:   votar positiu 12   votar negatiu 6
Respondre comentari replica Comentari inadequat   Formulari d'abús de comentari

20 de julh 10.35h

Nos dísetz que los jusius son a l'encòp una religion e un pòple. Mès un gascon (per exemple) que vodré se convertir au judaïsme, ne haré pas pr'autant partida dau pòple jusiu ? Es que pòdem pas destingar la religion jusiva e lo pòple israelit (los abitants d'Israèl) ?


Valora aquest comentari:   votar positiu 2   votar negatiu 0
Respondre comentari replica Comentari inadequat   Formulari d'abús de comentari

5 -10 -20 -tots
1




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat
BANER1-2-3: DGPL AN LAFONT

Perfil

Gerard Joan Barceló

Gerard Joan Barceló logo rss

Lingüista, professor agregat de gramatica e director de la revista electronica universitària Lingüistica Occitana. President de l'associacion Los amics de Jornalet

mai d'informacions

contactar l'autor

Categorias

Las mai...

Mai d'articles

Archius




Etiquetas

D'autres articles


Jornalet, gaseta occitana d'informacions