CAPÇALERA2: FAI-TE SOCI

Jornalet, gaseta occitana d'informacions

Divendres, 22 de març

Gerard Joan Barceló

Dissabte, 11.7.2015 03h00

Las paradòxas grègas


Comentaris 16 comentaris    
Dolent Fluix Bo Molt bo Fabulós (8 vòtes)
carregant En cargament


Ben sabètz que nòstre continent a un nom grèc, generalament associat a una princessa feniciana, Εὐρώπη, que la raubèt Zeus, lo dieu concupiscent e polimòrf, sota la forma d’un taure. Paradoxalament, aquela princessa Euròpa raubada non passèt pas pel continent europèu al sens estricte, mas finiguèt qu’arribèt en Creta, ont foguèt maire del rei Minòs. La princessa raubada anèt pas en Euròpa, mas l’istorian grèc Erodòt (entre 484 e 420 abans Jèsus Crist) subdevesís lo Mond (Istòrias 4, 42) en tres partidas, la Libia (Africa), Λιβύη, Asia (pels grècs de l’Antiquitat, lo Pròche Orient), Ἀσίη, e Euròpa.

Ben sabètz que la cultura grèga portèt fòrça a la civilizacion grèga: lo concèpte de democracia, sos mites, son escultura e son arquitectura, sa literatura, la filosofia, sas matematicas, sa racionalitat scientifica. Paradoxalament, lo govèrn grèc de fa un decenni –ai oblidat l’an exacte– aguèt d’insistir, del temps del debat sus la Constitucion europèa, per que los tèxtes oficialas mençonèsson l’eiretatge de Grècia, coma se tot aquò semblèsse tròp luenchenc pels dirigents europèus.

Tanben ai una paradòxa grèga personala: soi uèi ellenista mas vesitèri Grècia solament un còp, durant un viatge escolar en 1988. Èra la fin de mos estudis al collègi e se capitava qu’èri en aqueles tempses lo sol latinista dins una classa d’ellenistas. Percorrérem mai que mai los luòcs mai famoses de l’Antiquitat ellenica, de l’acropòli d’Atenas a Micenas, del teatre d’Epidaure al santuari de Dèlfes, mas ja me pausavi una question: quin èra de verai lo país que vesitàvem? Encara uèi, me frustra fòrça de conéisser la literatura grèga classica mas pas gaire la cultura de uèi. Legissi lo grèc classic mas non parli pas lo grèc modèrne.

La mai granda paradòxa grèga es que sèm conscients de nòstres deutes civilizacionals al respècte de Grècia mentre que l’Istòria nos n’alonhèt fòrça. Per començar, los grècs se son pas jamai diches coma nosautres lor disèm: son encara uèi  Έλληνες. Se lor disèm “grècs”, es en causa dels romans que sovent los apelavan “Graeculi”, amb un sufixe pejoratiu. Los romans, ben o sabèm, manlevèron fòrça a la cultura grèga, e mai los romans cultes se parlavan grèc entre eles, mas, bensai interiorament espantats, se mesfisavan dels grècs e lor exprimissián de mesprètz. Puèi la division de l’Empèri roman entre Occident e Orient, e la casuda precòça de la part occidentala, nos separèt un pauc mai de Grècia. S’i mesclèt la religion: lo Scisma de 1054 devesiguèt los crestians entre catolics e ortodòxes. Fin finala, los grècs perdèron lor libertat dins l’Empèri otoman, e lor calguèt esperar de sègles abans de recobrar l’independéncia e encara mai de temps per viure dins una democracia.

Mentre que los liberistas vòlon castigar lo pòble grèc que n’es pas responsable, e l’enfonzar dins la pauretat per de reformas qu’empedisson tota creissença economica, ieu me pensi que nos cal trobar lo camin de la reconciliacion amb Grècia, pr’amor que se perdèm Grècia, perdèm tanben una granda part de çò que sèm. Los grècs ancians vesián lo Mond de manièra maniquèa, en opausant los barbars a eles meteisses. Se pòt, se deu criticar aquela vision que pòt menar al racisme, mas es interessant d’opausar, en general, civilizacion e barbariá.

Los europèus volèm èsser de barbars? Volèm renonciar a tot ideal de justícia en nom de l’idolatria de la divessa Moneda? Volèm provocar de guèrras pr’amor que sèm incapables d’agir segon los principis de la rason? O volèm mostrar que sèm una civilizacion? Volèm seguir los principis de democracia, d’umanisme e de justícia que los intellectuals e los pòbles d’Euròpa an portats pendent de sègles?

Ara vivèm una crisi prefonda. Es la kρίσις, çò es lo jutjament. Quin jutjament fasèm sus nosautres meteisses? Quin jutjament desiram que l’umanitat faga de nosautres?

Metam fin a las paradòxas grègas que tanben son las paradòxas europèas.



publicitat



Comentaris

14 de julh 08.14h

#14 Era pas son astrada !


Valora aquest comentari:   votar positiu 0   votar negatiu 0
Respondre comentari replica Comentari inadequat   Formulari d'abús de comentari

13 de julh 20.51h

#11 I a una continuitat ininterrompuda de civilizacion en Grècia, clarament explicada per los istorians: epòca primitiva, epòca micenèa, epòca "geometrica" o "escura", epòca classica, epòca ellenistica, epòca bizantina, epòca modèrna o otomana, epòca contemporanèa.


Valora aquest comentari:   votar positiu 2   votar negatiu 0
Respondre comentari replica Comentari inadequat   Formulari d'abús de comentari

13 de julh 20.43h

#12 Seriá estat melhor qu'Anatolia demorèsse dins l'Emperi Bizantin.


Valora aquest comentari:   votar positiu 1   votar negatiu 0
Respondre comentari replica Comentari inadequat   Formulari d'abús de comentari

13 de julh 08.46h

De còps qu'auraitz còrdas los que son de penjar dins aquel afar son los ancians menaires grècs qu'an tripatolhat los comptes, los menaires europencs qu'an fach mina de vèire res....


Valora aquest comentari:   votar positiu 0   votar negatiu 0
Respondre comentari replica Comentari inadequat   Formulari d'abús de comentari

13 de julh 08.19h

Auria estat milhor que Grècia damoressa dins l'emperi Otoman ....


Valora aquest comentari:   votar positiu 0   votar negatiu 5
Respondre comentari replica Comentari inadequat   Formulari d'abús de comentari

12 de julh 21.14h

Me pausi sovent de questions sus la continuitat de la Grècia antica (tala que la nos aprenon dins lo sistèma educatiu francés) dins la Grècia modèrna. Per èstre clar, me sembla una reconstitucion nacionalista grega.
La penetracion eslava a partir del s. VI, sens parlar de la preséncia longa dels albanés (quantes grècs se dison "arvaniti" uòi) e dels aromans, nimai de l'ocupacion turca... de qu'es la Grècia de uòi ?

D'un vejaire economic, lo foncionament corromput de l'Estat (barrej... Legir la seguida


Valora aquest comentari:   votar positiu 3   votar negatiu 0
Respondre comentari replica Comentari inadequat   Formulari d'abús de comentari

12 de julh 17.28h

#9 L'economia al servici de l'uman, non çò invèrs, es verai.


Valora aquest comentari:   votar positiu 2   votar negatiu 0
Respondre comentari replica Comentari inadequat   Formulari d'abús de comentari

12 de julh 15.55h

#3 “segur es pas una moneda fòrta que calia a Grecia, nimai als país dichs del sud". Es pas a cap de país que cal una moneda fòrta. Çò que cal es una moneda pensada per respondre als besonhs dels ciutadans dins la ciutat, e non pas una moneda qu'apara una oligarquia deslocalizada qu'internacionala. Las bancas devon servir los pòbles, e non pas lo contrari. Es pas ieu ni Marx qu'o disiam primièr, mas Abraham Lincoln, president dels EUA, qu'o disïiá ja, e que ne crebèt assassinat.


Valora aquest comentari:   votar positiu 2   votar negatiu 0
Respondre comentari replica Comentari inadequat   Formulari d'abús de comentari

12 de julh 08.49h

#7 Lo pòble Grèc patís de segur, pr'aquò patís de las irresponsabilitats de sos govèrns desempuèi mai de vint ans.
I aguèc 321 Milhards de prestat a Grècia a l'encontra d'aquò Grècia devia endralha reformas Sul fonccionaris 40%, suls impaus, e un fum d'autras causas que fuguèron pas fachas.
E ara se se far un tresen plan d'ajuda per Grècia, cal èsser segur que i aurà reformas còp sec e pas dins 15 ans.
Segur lo pòble patís, mas es lo govèrn grec que desgalha las ajudas. e enq... Legir la seguida


Valora aquest comentari:   votar positiu 1   votar negatiu 1
Respondre comentari replica Comentari inadequat   Formulari d'abús de comentari

11 de julh 21.30h

#5 Es probable una question de valors, mas precisament las mieunas son de veire la realitat del pòble grèc, non pas de crear de vanas polemicas, luènh de la vida vidanta de la populacion.

Despuèi los cinc ans de politica d'austeritat (que sembla pas encara sufisenta per la trista Union Europèa), lo PIB grèc a reculat del 25%, lo salari minim es passat de 680 èuros a sonque 580, lo 25% de la populacion activa es al caumatge (lo 60% dels joves), tornan de malautiás coma lo paludisme. Lo... Legir la seguida


Valora aquest comentari:   votar positiu 15   votar negatiu 3
Respondre comentari replica Comentari inadequat   Formulari d'abús de comentari

5 -10 -20 -tots
1
-
2 >




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat
BANER2: 468x60 Aran TV

Perfil

Gerard Joan Barceló

Gerard Joan Barceló logo rss

Lingüista, professor agregat de gramatica e director de la revista electronica universitària Lingüistica Occitana. President de l'associacion Los amics de Jornalet

mai d'informacions

contactar l'autor

Categorias

Las mai...


Mai d'articles

Archius




Etiquetas

D'autres articles


Jornalet, gaseta occitana d'informacions