CAPÇALERA: publicitat jornalet
CAPÇALERA2: FAI-TE SOCI

Jornalet, gaseta occitana d'informacions

Dissabte, 17 d'agost

Gerard Joan Barceló

Dimenge, 18.10.2015 03h00

Brèva letra a mon escolan jihadista


Comentaris 4 comentaris    
Dolent Fluix Bo Molt bo Fabulós (6 vòtes)
carregant En cargament


O aprenguèri fa mai d’una setmana de la boca d’una collèga, e encara uei aquò m’es pas de creire. Tu, mon escolan de cinquena, que t’ensenhèri fa cinc ans, siás devengut jihadista.

Non sai se me legiràs un jorn, e bensai es tròp tard per que me legiscas dins aquesta vida, pasmens, tre que saupèri la nòva, te volguèri escriure.

Me remembri de tu. Ai pas oblidat ton uelh senèstre que pareissiá bòrni. Te costava d’escriure, te costava de legir, te costava de comptar, te costava d’èsser atentiu en classa. Tei companhs se trufavan de tu ò tu risiás amb elei amb un rire de bòn comunicar, mai te cresiáu brave, e s’encara siás viu, bensai encara o siás un pauc, quora matas pas, quora torturas pas, quora viòlas pas.

Fasiá lòng temps que non sabiáu ren de tu, fasiá d’annadas que non t’aviáu crosat, ni dins lo collègi qu’aviás quitat, ni per lei carrieras de nòstra vilòta.

Se pòs, diga-m’o, que se passèt? Quin marrit rescòntre te vantèt lei meritis dau jihad armat d’una organizacion criminala? Cu te convenquèt d’anar enlai temptar una aventura que trobavas pas aicí? Una nòva esperança a l’encòp dins lei luchas guerrieras e dins un faus paradís?

Regardi nòstra vilòta. Quina esperança te pòt balhar? L’indústria nucleara que ne’n depend tota l’economia? Una populacion vielhassosa e sensa anma que la tempta l’extrèma drecha? Lei comèrcis barrats dau centre que lei remplaçan leis afrosei zònas comercialas perifericas?

Se siás partit enlai, te sentiás d’aicí? Quina identitat podiás aver? La francesa de lei gents que t’aman pas pr’amòr que ta familha es d’autra part?  Te’n siás anat, as preferit una identitat mai luenchenca qu’a tu te semblava mai pròcha.

A l’intrada de la vilòta bandejan de bandieras provençalas. Lei coneissiás? Sabiás çò que representan?

Per tant, t’ai escrich en provençau, en occitan de Provença. Me disi que siás partit pr’amòr que te trobavas entre dos vuejes. Lo vueje de França, l’estat que se pren per una nacion e nos empedís d’èsser cu siam. Lo vuege d’Occitània, que poiriá existir mai encara o fai pas pr’amòr que siam tròp timids... ò avèm paur... de far paur, devesits e resignats.

Pasmens, per ieu, ven a nautres de lo bastir, lo país ont totei se reconescam de la mesma tèrra frairala, sensa que degun cèrque de negar cu siam, per fin que çò comun e çò plurau sigan un, e que de liames qu’agam tescuts ensems nos uniscan. Non vòli pas que d’autres que tu s’inventen d’identitats murtrieras mentre que certans se replegan sus la de París; siás, ò èras, de nòstre país.

Siás partit pr’amòr que te pensavas guerrier arabomusulman; èras occitan sensa o saupre.



publicitat
BANER1-2-3: DGPL TRADUCTOR



Comentaris

18 d'octòbre 11.40h

Experiéncia tragica partejada, qu'un de mos escolans es mòrt en Siria. Per un ensenhaire, que sa tòca es de desvolopar los dròlles, es un fracàs tarrible. Per ma part, l'expliqui per la violéncia generala del sistèma escolar francés que permet pas als enfants fragils de trobar sa plaça dins la societat. Los tenents d'una pedagogia doça i son tròp isolats.


Valora aquest comentari:   votar positiu 20   votar negatiu 3
Respondre comentari replica Comentari inadequat   Formulari d'abús de comentari

18 d'octòbre 10.01h

Los musulmans, los crestians, los josièus, tot aquò son de mots, que causificas idèas imagenàrias. I a son que de musulmans, de catolics, de d'atèus e d'autres subjèctes umans encara que non dintran dins aquestas categorias aproximativas. Cada còp que procedissèm a una generalizacion, coma per exemple "los Occitans", los "Franceses", non sabèm pas mai de qué parlam. Coneissèm unes Occitans, unes Franceses, unes musulmans… Cada còp que procedissèm a una generalizacion, lo diable e... Legir la seguida


Valora aquest comentari:   votar positiu 9   votar negatiu 2
Respondre comentari replica Comentari inadequat   Formulari d'abús de comentari

18 d'octòbre 09.29h

200 ans de colonisacion de l'Africa dau Nòrd per los occidentaus, quò pòd pas s'oblidar. La França es anada chas los musulmans emben lo canon sens oblidar lo temps de las crotzadas. Un vielh paisan disia dau temps que fasia son servici militari au moment de la conquesta d'Algeria : "preniam lòrs afars e apres, l'armada nos en balhava un pauç. D'aquel pauc, i en avia pron per nos sadolar".
Pertant fuguet un temps ente los arabes, berberes e autres populacions transmetian lo saber d... Legir la seguida


Valora aquest comentari:   votar positiu 9   votar negatiu 6
Respondre comentari replica Comentari inadequat   Formulari d'abús de comentari

18 d'octòbre 04.18h

Bèu bon Dieu de la patria que de justificacions faussas e enganarèlas ! se l'escolan u n pauc butat , quer compren ren de ren , es vengut jihadista, ei pas per lei rasons çai-dessùs enonciadas,mai ven d'una contrada luencha onte sei gents iletrats parlavan arab e e èran de religion moametana, que non podiá s'integrar manca pas s'assimilar e amb aquesta religion retrograda restada au XIV° sègle amb sei guerras de religion que sei sectators salafistas noirisison un complèxe d'inferiori... Legir la seguida


Valora aquest comentari:   votar positiu 12   votar negatiu 19
Respondre comentari replica Comentari inadequat   Formulari d'abús de comentari

5 -10 -20 -tots
1




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat
BANER1-2-3: DGPL TRADUCTOR

Perfil

Gerard Joan Barceló

Gerard Joan Barceló logo rss

Lingüista, professor agregat de gramatica e director de la revista electronica universitària Lingüistica Occitana. President de l'associacion Los amics de Jornalet

mai d'informacions

contactar l'autor

Categorias

Las mai...

Mai d'articles

Archius




Etiquetas

D'autres articles


Jornalet, gaseta occitana d'informacions