CAPÇALERA: publicitat jornalet
CAPÇALERA2: FAI-TE SOCI

Jornalet, gaseta occitana d'informacions

Diluns, 22 de julh

Gerard Joan Barceló

Dimècres, 2.11.2016 03h00

Valença: perdam pas lo nòrd… ni l’èst!


Comentaris 7 comentaris    
Dolent Fluix Bo Molt bo Fabulós (12 vòtes)
carregant En cargament


O ai agut escrich, vivi dins un airal fòrça desoccitanizat. E mai los panèls a l’intrada de la vilòta de Pèiralata, fòrça mond son pas capables de los interpretar coma en provençal. Ni de reconéisser las bandièras provençalas. Quant al simbòl de la crotz occitana, es tan desconegut que de còps d’escolans me demandan s’es pas un signe religiós quand lo veson penjat a mon còl. Sèm tan luènh de las problematicas occitanistas que lo nom de la region Occitània, degun n’i parlèt pas, e mai s’aquesta es sonque a un desenat de quilomètres. La lenga nòstra, la podèm apelar occitan o provençai coma volèm, mas per las gents es sustot de patois, e es mòrta, e mai se qualques personas vièlhas la parlan encara, sens la transmetre, en privat e jamai per carrièras. Per carrièras, franc del francés, s’ausís sonque un pauc d’arabi dialectal o d’amazigh, de còps de turc o d’espanhòl. Un jorn, una dòna conversava en romanés al telefonet.
 
Mas que dire de Valença, mai al nòrd, entre las arpitanas Sant Estève e Grenòble? Se las circonstàncias de la vida m’avián fach restar en aquel canton d’Occitània, es fòrça probable qu’auriái pas jamai res sauput de la lenga occitana. Auriái probablament pensat que lo francés s’i parla despuèi totjorn, mas benlèu m’aurián estonat los mots de Frederic Mistral, en 2008, legits sus las parets de la catedrala valentinesa, per las funeralhas de ma mameta...
 
Mas tornarai pas escriure mon article de junh passat. En qué sèrv de plorinejar? E mai se me fisi pas gaire dels simbòls, i a una causa interessanta a Valença, lo pont Frederic-Mistral sus Ròse, que jonh la capitala  del Daufinat occitan a Vivarés, l’èst a l’oèst d’Occitània. Valença es entre lo Massís Central e l’espaci alpenc que lo comença Vercòrs, que se pòt devistar delà la plana, e la vila duèrb lo corredor rodanenc fins a Camarga e Marselha, en unissent lo nòrd e lo sud d’Occitània.
 
Geograficament entre nòrd e sud, oèst e èst, luòc de passatge fins a la Mediterranèa, Valença a doncas una posicion remarcabla. Tanben, representa los territòris que lo movement occitan oblida tròp sovent, lo nòrd e l’èst. L’autoritària reforma territoriala de las regions francesas sembla de refortir, d’un ponch de vista occitan, lo sud-oèst (Nòva Aquitània e la region qu’a pres lo nom d’Occitània), al detriment de la rèsta, del temps que d’occitanistas se senton abandonats, e mai traïts. En mai d’aquò, las regions Auvèrnhe-Ròse-Alps e Provença-Alps-Còsta d’Azur, las dirigisson ara de fòrças reaccionàrias, quora insensiblas a nòstra lucha, quora en favor de visions passadistas, folcloricas e desunidas de nòstra cultura.
 
“Perdam pas lo nòrd… ni l’èst!” Ansin poiriam dire se manifestèssem a Valença per la lenga occitana. Cèrtas, plaidegèri per Marselha, fa tres ans, e me pensi qu’encara es una bona causida. Mas uèi, cresi que Valença es una causida melhora per que tot lo movement occitan pòsca dire que, malgrat nòstres dobtes, malgrat nòstras tristas batèstas, malgrat nòstre amar descoratjament, sèm solidaris per defendre pertot nòstre drech de viure en occitan.
 
“Perdam pas lo nòrd… ni l’èst!”
 




Jornalet es possible gràcias al sosten economic e jornalistic dels legeires e benevòls. Se podètz sosténer en venent sòci dels Amics de Jornalet o de l’associacion ADÒC, contribuiretz a far un mèdia mai independent e de melhora qualitat.
 



publicitat
BANER1-2-3: DGPL TRADUCTOR



Comentaris

2 de novembre 16.39h

#5 Afanem nos dolçament : aqui una maxima que cal jamai doblidar.
e una autra atanben que se dits quand tot es clavat : es que se pòt pas far d'un autre biais ?

Per l'ora s'agis de botar en plaça un document de las bonas praticas que describessa los proces detalhats per far una manifestacion e esperar que siaguessa una capitada. Vòl pas dire que capitarà a cada còp, mas al pus mens aurem respectat las bonas praticas.
e se caldrà emprenhar de tot aquò e desgruna cada còp a-n-aquel sic... Legir la seguida


Valora aquest comentari:   votar positiu 0   votar negatiu 0
Respondre comentari replica Comentari inadequat   Formulari d'abús de comentari

2 de novembre 15.24h

A Tolosa o endacòm mai, la recèrca fa çò que pòt per demorar fondamentala.

Demandatz : "L'economia e la recercha au servici d'Occitania e daus occitans o bens d'estrangiers?". Res es pas al servici d'Occitania, estant qu'Occitania non es una entrepresa lucrativa. Estrangièrs, en terme de lucre, aquò vòl pas res dire. I a çò que rapòrta a d'investisseires, e çò que lor rapòrta pas. La recèrca en cultura e literatura (occitana o pas) non lor repòrta pas imediatament fòrça mone... Legir la seguida


Valora aquest comentari:   votar positiu 3   votar negatiu 0
Respondre comentari replica Comentari inadequat   Formulari d'abús de comentari

2 de novembre 12.12h

Article chanut de Monsur Barceló ! E per quant au tite : tot ce que sente despuèi d'annadas !
Ara, vejaicí ce que pense (mès Valença sola poiriá sufir per luòc de manifestacion venenta !).

Dos ais estrategics, doas futuras manifestacions (non pas lo meme jorn) :
- una linha Valença - Clarmont d'Auvèrnha - Limòtges - Bordèu ;
- la vila de Marselha.
Dos ais estrategics (de mon vejaire) que fau cavar. I a sustot una estrategia manifestadoira de desvolopar. Atencion : PREPARACION, pas s... Legir la seguida


Valora aquest comentari:   votar positiu 8   votar negatiu 0
Respondre comentari replica Comentari inadequat   Formulari d'abús de comentari

2 de novembre 11.55h

E l'accent occitan, i es, a Pèiralata e a Valença ? Cossí parlan francés, ailà ?


Valora aquest comentari:   votar positiu 0   votar negatiu 0
Respondre comentari replica Comentari inadequat   Formulari d'abús de comentari

2 de novembre 11.21h

Per pas perdre lo nòrd chaldria far daus centres economics e culturaus dins lo Massif Centrau.
L'òm pòd se damandar si las vilas alentorn dau Massif-Centrau coma Tolosa, Bordeu, Marselha son daus models de centre economics e culturaus emben lòrs universitarias e lòrs centres de recerchas copats de las realitats socialas e economicas, cloisonadas en categorias que se viesan de travers e dependentas per lòrs recerchas de sòus frances o européens.
L'economia e la recercha au servici d'Occ... Legir la seguida


Valora aquest comentari:   votar positiu 0   votar negatiu 2
Respondre comentari replica Comentari inadequat   Formulari d'abús de comentari

2 de novembre 09.43h

Es una excellènta idèa tanben. E l'accessibilitat, s'aquò deviá èstre un critèri, es perfiecha ailà.


Valora aquest comentari:   votar positiu 7   votar negatiu 0
Respondre comentari replica Comentari inadequat   Formulari d'abús de comentari

2 de novembre 08.18h

D'aqui l'importancia granda de bastir una estrategia de manifestacions..... (es pas lo primièr còp que n'en parli).

Cal subretot rassar tot çò qu'es sentimentalisme, victimizacion e servar lo cap al fresc per bastir l'estrategia. Es la sola eissida qu'avem !

Marcatz lo territòri !


Valora aquest comentari:   votar positiu 5   votar negatiu 0
Respondre comentari replica Comentari inadequat   Formulari d'abús de comentari

5 -10 -20 -tots
1




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat
BANER1-2-3: DGPL DICTADES

Perfil

Gerard Joan Barceló

Gerard Joan Barceló logo rss

Lingüista, professor agregat de gramatica e director de la revista electronica universitària Lingüistica Occitana. President de l'associacion Los amics de Jornalet

mai d'informacions

contactar l'autor

Categorias

Las mai...

Mai d'articles

Archius




Etiquetas

D'autres articles


Jornalet, gaseta occitana d'informacions