CAPÇALERA2: AMICS DE JORNALET

Jornalet, gaseta occitana d'informacions

Diluns, 23 d'abril

Gerard Joan Barceló

Dissabte, 13.1.2018 03h00

Sopar a Carcassona


Comentaris 15 comentaris    
Dolent Fluix Bo Molt bo Fabulós (7 vòtes)
carregant En cargament


Durant las vacanças de Calendas, passèri una nuèch a Carcassona, luènh ça que la de la toristica mas subrebèla Ciutat, per parlar amb mos amics Terric Lausa e Matiàs Gibèrt. Aquò foguèt, coma sovent entre nosautres, l’escasença de tornar inventar lo Mond mas en occitan, de fugir un temps nòstre eissilh lingüistic, nòstra insularitat occitanofòna dins un ocean de parlants de francés. Ben o sabèm totes, quand parlam occitan, l’Occitània de nòstres sòmis pren miraculosament vida.

Al restaurant, de la cosina occitana e mai mediterranèa, se capitèt coma aquò se passa tròp sovent, que la serveira nos creguèt, en nos escotant a conversar ansin en lenga nòstra, espanhòls, e nos demandèt a la fin del repais: “¿Para pagar?”. Fa mai d’un an, a Perpinhan, Terric Lausa e ieu charràvem en occitan lengadocian e lo serveire se sentiguèt obligat de nos portar lo menut... en catalan! Nòstras lengas son pas pus normalas dins nòstres païses.

Pr’aquò, darrièr nòstra taula de Carcassona, una familha de sud-catalans se partejavan lo sopar, mentre qu’una autra, francofòna, nos sorprenguèt al bèl mitan de la convèrsa. Una maire, còp sec, encoratgèt sa filha, una drolleta de benlèu cinc ans, a nos dire qualques mots en occitan. La mainadeta èra calandrona e la pauretona, timideta, nos gausèt pas parlar, bensai un pauc desvariada d’ausir la lenga occitana en defòra del quadre escolar.

Del temps que los catalans luchan per restituir lor govèrn legitim, qu’es nieus ara “Govèrn de la Republica”, sèm a luchar, totes, quinas que sián nòstras ideologias, per restituir nòstra lenga legitima, o almens per nos apressar d’una normalitat occitana.

E nos n’apressam, simplament, cada còp que fasèm la causida de parlar occitan.

E en ieu, après lo sopar de Carcassona, torna l’obsession que s’organize un jorn un collectiu “Parlem Occitan”, a l’imatge del “Parlemu Corsu” de mos compatriòtas còrses, que revendica l’usatge normal de la lenga insulara de pertot. Creem de ligam social en occitan per far una societat plenament occitana.


                                  
                      
           

fffff   fffff
  Retorn sus los articles precedents

A prepaus de la cooficialitat de la lenga còrsa, sio conscient dals empaches institucionals franceses, e fa de temps que non me fau pus gaire d’illusions sus la capacitat francesa de chambiar en favor de la reconeissença vertadiera de sa diversitat lingüistica. Totun, lo president Simeoni e los autres sobeiranistas manifèstan una solucion possibla: desvolopar l’usatge oficial dal còrs al nivèl de las institucions que dependon de la Collectivitat Territoriala de Corsega e non pas dirèctament de l’Estat. Aquò ajuariá a l’amplificacion d’una pression sociala que finiriá que forçariá las autoritats francesas d’evolucionar.

M'alègro de la reüssia de la peticion de Change.org en favor dal nom Provença en plaça de “Region Sud” o de “Provença-Alps-Còsta d’Azur”. Aüra siam a aperaquí 11 000 signaturas. Sio d’acòrdi amb los articles de Domergue Sumien e de Laurenç Revèst que nos expausan clarament dins aquest jornal la complexitat dal problèma, mas creo encara que “Region Provença” es la chausia pragmaticament mai eficaça, se lo territòri sèrva sos limits administratius actuals.
 
     



abonar los amics de Jornalet



publicitat



Comentaris

21 de genièr 11.26h

Esperi un article Caminar pel campèstre o a la montanha, fait d'experiéncias de rescontras occitanas positivas e optimistas dins le biotòp natural...bota! Cal anar...


Valora aquest comentari:   votar positiu 0   votar negatiu 0
Respondre comentari replica Comentari inadequat   Formulari d'abús de comentari

19 de genièr 13.56h

Parlem occitan!
1 - la cibla/buta/tòca
Aquò va plan s'es adreiçat a de monde que le saben parlar.
De rementar que la cibla es, a la gròssa, le monde de mai de 60 ans, la màger part en retirada amb multiplas activitats, de qualas la caminada conviviala e activa.
Cal quitar l'occitanisme sedentari, intellectual, de lectura o d'escritura, e jònher les occitans que se bolègan... Cal se socializar amb les occitans naturals.
Atencion! Serà de patés, de francitan e de francés a tot còp, co... Legir la seguida


Valora aquest comentari:   votar positiu 0   votar negatiu 0
Respondre comentari replica Comentari inadequat   Formulari d'abús de comentari

18 de genièr 17.01h

#12 Com-ple-ta-ment d'acòrd emb de vos, Mossur "Mèfi" ! Una lenga sans variacion, sans accent, sans sintassa tipicament occitana, sans contengut culturau es un còrs mòrt, un supòrt sans anma !
Solament, i a quicòm que brandussa e ne'n convendretz coma ieu : son pas gaire nombrosas, amai son rascassas en arguments, las reacions en d'aqueles detalhs ; vrais problèmas finalament que, de fes emb de vos, aigregem dinc tau o tau article.

L'occitanisme sembla que prengue pas conciença de ca... Legir la seguida


Valora aquest comentari:   votar positiu 1   votar negatiu 0
Respondre comentari replica Comentari inadequat   Formulari d'abús de comentari

18 de genièr 11.43h

Tant que l'occitanitat del biais de parlar, de l'accent latin als occitanismes (dits decas de francés), serà mespretzat, despretzat, o apretzat com estrangèr, i aurà pauc de perspectivas per un revitalizacion de l'occitan. L'occitanisme restrenht a l'occitan demòrara isolat, se se trenca (tronca) de l'occitanitat, e serà una resisténcia fòra-sol, artificiala e mòrt-viva.
Cal restaurar una normalitat e una fiertat locala e nacionala de nòstra identitat lengatgièra.


Valora aquest comentari:   votar positiu 1   votar negatiu 0
Respondre comentari replica Comentari inadequat   Formulari d'abús de comentari

16 de genièr 12.17h

Dualisme lingüistic francés/occitan e Contunh francés/francitan/occitan de fait.

Existe un contunh gradual fonologic, sintactic, lexical, amb una occitanitat variabla ligada a l'apertenéncia geografica, sociologica e generacionala.
L'occitanitat, çò es le grad d'occitanitat pòt se mesurar e se representar per un diagramma de Kiviat, o en radar, estèlla o telaranha.

Passar d'una resisténcia a una reconquista, es un estrategia dels passes petits pragmatica.
"Parlem occitan!" es un lemm... Legir la seguida


Valora aquest comentari:   votar positiu 2   votar negatiu 0
Respondre comentari replica Comentari inadequat   Formulari d'abús de comentari

16 de genièr 10.49h

(Adreiçe queste comentari a chasca enternauta, mès tanben als especialistas de la lenga, als actors culturaus e politicas se revendiquent militants de nòstra identitat comuna, una e divèrsa)

Aicí, qu'un torista o novèl abitant vengue dau ròde de Lion o Granòbla o Lille, vos ditz que sètz marselhés. Anatz a Marselha o Tolon, me diràn que parle coma un tolosan o un gitan. Vau en Auvèrnha, me dison que vène dau "Miègjorn" o dau "Sud" (es a dire Provença per eles).
Es passat gairebe... Legir la seguida


Valora aquest comentari:   votar positiu 4   votar negatiu 0
Respondre comentari replica Comentari inadequat   Formulari d'abús de comentari

14 de genièr 19.09h

#2 alavètz que'vs cau préner las causas en man de bitara enlà per'mor qu'ei ua doça mes shens escap casuda. Qu'espèri la susvivença deu balear e de tots los idioms catalans atau com espèri la de tots los idioms occitans


Valora aquest comentari:   votar positiu 0   votar negatiu 0
Respondre comentari replica Comentari inadequat   Formulari d'abús de comentari

14 de genièr 06.25h

#7 suggestions immersivas e cataliticas
Sopar a l'ostal de retirada, sortir amb las amicalas de retirats...
Seretz estonats...de far parlar " patoès "


Valora aquest comentari:   votar positiu 0   votar negatiu 0
Respondre comentari replica Comentari inadequat   Formulari d'abús de comentari

13 de genièr 22.34h

Parlem occitan ! D'acòrdi mès consí tornar metre un iniciat a l'occitan, que fonciona en francés per automatisme? I a pas res mai de vergonha, se non que de dificultats a identificar.
Aquò pertòca globalament les ancians, n'es pas?
* l'atge de la servièira?...


Valora aquest comentari:   votar positiu 0   votar negatiu 0
Respondre comentari replica Comentari inadequat   Formulari d'abús de comentari

13 de genièr 16.52h

#5 Me cal comprendre que Lausa es un fan de hard-rock, que Braceló festeja (o desira) una victòria mentre que Gibèrt es un fan de "Star Trek" e que saluda los autres fans?
Me sembla pas clar. Fauta d'explicacions mai claras, vau dedusir que saludan a lor biais totes los que d'un biais o d'un autre s'inerèssan a la lenga occitana.


Valora aquest comentari:   votar positiu 3   votar negatiu 0
Respondre comentari replica Comentari inadequat   Formulari d'abús de comentari

5 -10 -20 -tots
1
-
2 >




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat

Perfil

Gerard Joan Barceló

Gerard Joan Barceló logo rss

Lingüista, professor agregat de gramatica e director de la revista electronica universitària Lingüistica Occitana. President de l'associacion Los amics de Jornalet

mai d'informacions

contactar l'autor

Categorias

Las mai...

Mai d'articles

Archius




Etiquetas

D'autres articles


Jornalet, gaseta occitana d'informacions