Bandièra01 1180x150: Comuna de Tolosa

Opinion

Jornalet: 3 meses per 3000€

Las informacions bancàrias e postalas dels Amics de Jornalet, pels legeires occitans de l'estat francés
Las informacions bancàrias e postalas dels Amics de Jornalet, pels legeires occitans de l'estat francés
Gerard Joan Barceló

Gerard Joan Barceló

Lingüista, professor agregat de gramatica e director de la revista electronica universitària Lingüistica Occitana. President de l'associacion Los amics de Jornalet

Mai d’informacions
Quand, fa quatre setmanas, escriviái un article que cridava a la mobilizacion generala per la premsa occitana, non imaginavi pas que la crida devenguèra mai concreta e sustot mai urgenta uèi. Laid temps per la premsa occitana, ara! Après lo barrament de La Setmana, que nos daissèt orfanèls a fòrça, es nòstre e vòstre solet quotidian occitan numeric, e solet quotidian tot cort, qu'es menaçat de clavar la botiga; e de la clavar abans 2019.

Farai una constatacion de bèl comprene: las caissas de Jornalet son voidas, e son director Ferriòl Macip Bonet, sens qui lo jornal pòt pas foncionar, es quasi sens ressorsas. En qual s'aprene? Lo retard enòrme de pagaments essencials a la vida de Jornalet e sustot a la vida de son director. M'entendretz plan, cresi: s'en causa de las caissas voidas de vòstre quotidian occitan Ferriòl Macip pòt pas pus viure corrèctament, val mai, de tot segur, qu'aqueste se cèrque un emplec que garentisca sa subrevivença de cada jorn. En d'autres mots, valdrà mai clavar Jornalet que sacrificar una persona.

Mas la fin de Jornalet, lo meteis an que la fin de La Setmana, seriá un desastre per la difusion normala de nòstra lenga encara injustament menaçada; e un autre còp que la nafrariá encara un pauc mai. Seriá una irreparabla reculada que non podètz pas imaginar, n'ai la certitud intima e prigonda.

L'associacion Los Amics de Jornalet o pòt pas acceptar. Malgrat las demandas de subvencions per ara sens nada responsa, nos resignam pas. Avèm doncas aguda l'idèa de cridar a un finançament participatiu d'urgéncia, e tant urgent qu'aqueste còp farem pas servir un micromecenatge normal, que podèm pas prene lo risc de pèrdre tota la soma se daveram pas çò que demandam. Volèm tanben limitar nòstras despensas. Pasmens, nos sembla legitim que sapiatz regularament l'evolucion del projècte. Avèm doncas creada una pagina Facebook, apelada "Jornalet: 3 meses per 3000€". La trobaretz sens mal amb un cercador d'Internet en picant "@jornaletsolidari". Almens cada setmana, la pagina farà lo bilanç dels dons recebuts, e ieu, coma publiqui cada setmana un article dins ma cronica d'opinion, vos n'assabentarai pereu sistematicament a la fin de cada publicacion miá.

Ja podèm mercejar los que de Catalonha e d'Occitània estant, an mandat quicòm tre qu'an sauput suls rets socials qu'alestissiam aquesta campanha, mas sèm encara tras que luènh dels 3000€ indispensables que cal amassar abans lo 15 de decembre. Alara cossí ajudar a vòstre jornal?

Se vivètz dins l'estat francés, podètz mandar un chèc o far un transferiment bancari als Amics de Jornalet, que, coma fasèm sistematicament, transferirem puèi totes los dons a Jornalet. Totas las informacions las traparetz sus la fòto qu'illustra mon article. Basta de clicar dessús per las aver totas. Mas se sètz residents dins l'estat espanhòl, o endacòm mai, bensai prefeririatz de donar via PayPal a l'ADÒC que gerís lo jornal occitan. En mai d'aquò, es possible de transferir vòstra contribucion sul compte de Jornalet.

Quina que siá vòstra causida, comptabilizarem del meteis biais vòstres dons. E totes seràn precioses perque totes nos donaràn l'espèr de poder contunhar.

Salvem Jornalet, comptam sus vosautres, e nos fisèm de vòstra solidaritat!

 
Donadas bancàrias:
 
La Banque Postale (Marselha)
IBAN: FR16 2004 1010 0912 8089 7Y03 009
Còde BIC: PSSTFRPPMON
Al nom de: Los Amics de Jornalet
 
Caixa d'Enginyers (Barcelona)
IBAN: ES79 3025 0001 1414 3339 8145
Còde BIC: CDENESBBXXX
Al nom de: Associacion entara Difusion d'Occitània en Catalonha
 


 



abonar los amics de Jornalet

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Thomàs Joan
19.

Amics,

I a de causas que compreni pas
1) Cossí se fa que dins l'edicion de uèi de Jornalet i a pas un apèl a donar per sostenir lo jornal, lo nòstre sol quotidian ?
2) que lo monde se pausan encara de questions ! Doni? Doni pas? Val la pena de se brandir las pelhas? Cal pas, Jornalet crebarà o crebarà pas? Se ne cal trachar o se ne fotre coma de las borassas? Aquel questionament me fa venir baug , me farà vomitar ! La question es pas aquela ! Volem òc o non una premsa en occitan? PAS MAI bordèl de dieuses !

Ieu vòli una premsa en occitan, setmanièra coma La Setman, quotidiana coma Jornalet. Aquela premsa me servís e servís la causa nòstra. L'utilisi en classa, la fau legir als amics, la legissi en familha, l'archivi, etc. N'avem besonh per çò qu'avèm besonh d'una lenga viva !
Apuèi se pausa la question de la qualitat, de las causidas dialectalas e que te sabi encara..... Mas aquò son de parpèlas d'agassa. Avèm besonh de l'aplech, de far viure la lenga e de trapar d'informacions que trapam pas enlòc. Qual pòt deman remplaçar los dorsièrs de la Setmana ? Los comptes renduts de viatge per lo monde? Las informacions sul país que cap d'autre jornal balha pas escanat qu'es pel parisianisme o per la salça franco francesa?
Nos cal una premsa, es evident, se volem comunicar, botar en plaça d'accions, etc.
Doncas, ieu mandi mon chèc sul pic

Una autra soscadissa que me fa cagar dempuèi bravament de temps es l'engatjament del monde. Totes los occitanistas son a repapiar: avèm pas res, i a pas de cinema, i a pas lo libre que me cal, i a pas de formacion, i a pas d'escòla occitana dins mon barri, l'occitan se vei pas, d-se legís pas, s'ausís pas, ...... E òc ! Aquò es normal ! E baste que dure fins qu'a çò que los Occitans se tiren las mans de las pòchas per bastir çò que vòlon !

Ronjat escriviá : " Çoò qu'a un pòble li es necite, lo demanda pas, lo pren !" (cit. de memòria)

  • 4
  • 0
Manas Roquetianas
18.

#17 òc, ara fa dos ans que la region nòstra s'apèla "Occitanie", emai que se trobèt de mond per se'n regausir ! E ben la lenga e los mediàs d'òc i crèban en accelerat coma pas jamai. Cercatz l'error, pecaire !

  • 13
  • 1
Lo Jaumèt
17.

E l'OPLO de que fai ? S'acontenta de demorar braces crosats coma a son acostuma ? O de finançar un enièma prèmi literari escur qu'interèssa pas diguns levat sos companhs que lo tocaràn ? E la Delga, presidenta de la fòrça pauc occitanofila region que se fai sonar "Occitanie" ?

  • 26
  • 3
Gerard Joan Barceló Pèiralata
16.

#15 Adieu-siatz! Mercés per vòstras proposicions, mas Jornalet censura fòrça pauc. En realitat, quand un comentari obten mai de 20 poces roges que de poces verds, s'escond automaticament, mas lo legeire a totjorn la possibilitat de lo legir en clicant dessús. Es pas una censura mas una moderacion collectiva dels legeires.

  • 10
  • 4
Lo raiòu Cevenas
15.

Avans que detalhe mas prepausicions...

Siái agut estat en desacòrdi emb dau ponch de vista defendut per certans opinants.
Mai d'una fes, m'an coflat las pocejadas rojas sans justificacions, amai la presença dals poces simplament.
Pro sovent, desaprove la causida de Jornalet d'escòndre, adonc de censurar, tau o tau comentari pretendut zenofòba e faissista, dau temps que d'autres comentaires atàcon violentament lo comentaire pretendut zenofòba e faissista.

Maugrat las diferenças d'opinion, maugrat queles poces que, segon ieu, son un gatgete parcializaire amai discriminatòri ; maugrat la manca generala de neutralitat de la redaccion, contunharai de sosténer Jornalet que, finalament, es l'organ mediatica pus panoccitan, pus enternacionau e pus modèrna que ieu conegue.

Queste comentari, lo despause perque voldriái emetre d'idèias que poiriáun traire d'aiga au molin collectiu de las prepausicions, per fin de contribuïr au manten d'una prèissa occitana contemporana, enformativament desconnectada de las campanadas mediaticas nacionalas politicament corrèctas. Sariá pecat, francament, que laissessiam, monde d'Òc, un mèdia endispensable e qualitós coma Jornalet petafinar dinc l'endiferença.

Vejaicí mas prepausicions de simple ciutadan. Vàlon ce que vàlon. Son pas paraulas d'evangèli.

1) l'apariament de la còla de Jornalet emb de la còla de la Setmana defuntada. Avisatz-vos un pauc de tot aqueste saber, de totas aquestas competenças professionnalas recampadas... Aquò pesariá quicòm ! Mutualizar materiau e competenças dinc un mème grand projèct que sariá LO projèct de prepausar au sénher Patric Roux, vice-president de l'ÒPLO, que fasiá recentament una crida a projècts. E ben... justament ! Aquí un de projèct ! Amai ! E sariá finançat per l'ÒPLO.
Tanben, lo novèl projèct (es a dire Jornalet/La Setmana) mai Òc Tele vendriáun los dos grands provesidors d'enformacions panoccitanas.

2) Pense que l'accès a l'enformacion deu demorar a gratis. Autrament, lo monde se n'anaràn. Restaràn solament los militants pus afecionats e riscam de demorar dinc l'entre-nautres, de venir un microcòsma per iniciats. Justament, devèm sortir d'aquò ! En socializent nòstres dos futurs grands mèdias panoccitans : es aquí que vendrà a l'ÒPLO d'entrar en scèna un còp mai ! Mès siái segur que poirem comptar emb de la reclama que ne'n faràn lo monde associatiu panoccitan auprès de totes lurs contactes !

3) Panoccitanitat que, justament, me mena a revendicar l'unitat dinc la diversitat. Lo prumièr gra de l'identitat es sovent viugut au nivèl locau/regionau. Per fin que se pògon sentir d'una espandida tant bèla coma Occitania, auràn besonh lo monde, per començar, de se sentir d'un enquicòm pròche de lurs realitats jornadièiras.
Es aquí que las "Mapas de las Encontradas d'Occitania" e lur "aplicacion jornalistica" tènon un grand rònle de jogar : dinc lo refortiment d'un estacament au "País" (comuna/region) coma dinc la concientizacion progressiva d'una espandida frairenala comuna.

4) Es per aquestas rasons que lo novèl grand projèct (es a dire Jornalet/La Setmana) deurà, ço me pense, editar un jornau-papièr a costat d'un jornau desmaterializat.

5) Deurà relaiar l'enformacion "vraia e nòbla" (culturala locala/regionala, nacionala, enternacionala), non pas faire dinc l'espetaclós e la sensacionau coma podèm veire a las enfos-tele.

6) D'enformacions gropadas per encontrada ! E per categoria, perdequé pas, que lo monde van tanben vèrs ce que mai lurs agrada : cèrcon pas forçadament que tot siágue mesclat.

7) Crear una categoria "eveniments" per los legeires locaus qu'auràn un festenau, una quina, o ben una chauma o una manifestacion de faire saupre. Totjorn classats per encontrada, de segur ! Un mèdia es mai legit e escotat quand se fai lo ressòn de la cultura e de la realitat jornadièiras dau menut pòple (sans cabussar dinc la mediocritat e lo sensacionau, segur).

8) Una paja "Païses latins" que bailariá las enformacions majas dals país latins.

9) Autorizar que siágon presentas las doas grafias de la lenga : la classica mai la "mistralenca" o "francesa" (apelatz-la coma voldretz) mès coërenta, sonhada. Que lo monde en cò nòstre son alfabetizats en francés, oblidem pas ! E per mai d'un, remetràn aisat lur oralitat emb de la grafia d'enspiracion francesa. La grafia classica, amai siágue adaptada a lur parlar, lurs sarà mai complicada de legir. Un pauc de pedagogia e de pragmatisma fan pas de mau ! Se podèm far aderir en d'aquel novèl mèdia la populacion autoctòna coma novèla, non alfabetizadas en òc totas doas, aurem ganhat !
E per ganhar de monde, chau sarrar lo monde, parlar prossimitat geugrafica, cultura locala/regionala, eveniments en relacion emb de lur quotidian.
E dinc la neutralitat ! Que se pògon sentir liures de pensar de-per-eles. Que lo monde van sovent vèrs ce que lurs sembla, vèrs los que lurs sémblon. Oblidem pas !

N'ai acabat. A chascun d'adurre pèira o reaccion...

  • 15
  • 8

Escriu un comentari sus aqueste article