CAPÇALERA: HISTÒRIA DE LA CUINA CATALANA I OCCITANA
CAPÇALERA2: FAI-TE SOCI

Jornalet, gaseta occitana d'informacions

Dimenge, 15 de decembre

Gerard Joan Barceló

Dissabte, 9.2.2019 03h00

Voldriái quitar de parlar de politica occitana


Comentaris 7 comentaris    
Dolent Fluix Bo Molt bo Fabulós (8 vòtes)
carregant En cargament


Sovent, fau lo raive que parli una lenga normala. Sabètz, una lenga que s'ausís per carrièras, a la ràdio, a la television, amb los amics coma amb los enemics. Una lenga que practicariái sens me n'avisar, sens cercar mos mots, dins una convèrsa en familha per una fèsta o un anniversari. Se fariá amb ela quitament de marrida musica o de filmes encara mai marrits o d'emissions vulgaras presentadas per un caluc que nos prendriá per de nècis. Amb aquela lenga dos inconeguts se furarián dins un bar, e tanben escambiariam qualques mots obligats amb de collègas que presam pas gaire. Totas las sèctas pregarián en aquela lenga lors divinitats o lors goros, mentre que d'atèus se garçarián d'eles a la sortida dels temples. Amb aquela lenga questionariam los politicians, o los apostrofariam o los denonciariam o los insultariam. E me fariá pas mestièr de saber coma aquela lenga s'apèla, ni mai s'es una lenga o un dialècte, ni mai s'es corrècta o non. Seriá coma l'aire, a l'encòp omnipresent e invisible. E fariam pas de politica sus aquela lenga, mas la fariam simpletament servir, sens i pensar.

Qual, entre nosautres, a pas fach lo meteis raive? Que la lenga nòstra siá normala?

Ieu voldriái quitar de parlar de politica occitana. M'agradariá de parlar occitan coma emplegam de forquetas e de cotèls per manjar. Cercam pas de justificar lo lièch per i dormir, i dormissèm. Dins totas las librariás, los libres en occitan serián la nòrma, e las lengas exoticas l'excepcion coma pòrta dobèrta devèrs l'endacòm mai.

Mas a la Fèsta del Libre de Joventut de Sant Pau de Tricastin, que se ten cada an, i a pas una linha en occitan, e lo francés i senhoreja sens pietat.

Alavetz, me devi resignar. Me pòdi pas permetre de quitar de parlar de politica occitana. M'acontentariái de legir qualques autors per trobar la preséncia de la lenga que m'es totjorn de manca? Acceptariái que de gents daissèsson morir un setmanièr occitan? Acceptariái qu'Occitània devenguèsse lo nom void d'una region sens arma? Acceptariái que de decisions ministerialas condemnèsson a mòrt lo pauc de lenga nòstra qu'avèm a l'escòla? Acceptariái que d'unes cerquèsson de devesir nòstra lenga mespresada per nos aflaquir encara mai?

Contunharai doncas de parlar de politica occitana. Per qu'organizem la transmission de nòstra lenga. Per que passem de la cultura del "totjorn mens" a la del "totjorn mai". Per que d'autres nos impausen pas pus lor modèl injust de societat. Per que servem en nosautres la necessitat d'anar devèrs un ensenhament obligatòri coma evidenta reparacion istorica e besonh vital per la lenga nòstra. Per que nos acontentem pas de manténer lo pauc qu'avèm, mas qu'exigiscam enfin la justícia: parlar una lenga normala per enfin aver drech de parlar pas pus de politica occitana.





abonar los amics de Jornalet


 



publicitat
BANER1-2-3: DGPL AN LAFONT



Comentaris

10 de febrièr 12.18h

#6 Entrisme
De que pensatz d'un entrisme de l'occitan dins d'activitats ordinàrias, non intellectualas, dels mitans populars? A la petanca, a la belòta, en caminada...
De començar a dos, puèi tres, e quatre...


Valora aquest comentari:   votar positiu 1   votar negatiu 0
Respondre comentari replica Comentari inadequat   Formulari d'abús de comentari

10 de febrièr 10.47h

“ Qual, entre nosautres, a pas fach lo meteis raive? Que la lenga nòstra siá normala ?" Es precisament lo sòmni implicit que fa cada escrivan, tre qu'alestís una naracion en occitan, evocant un mitan social aparegut, per exemple, après la dessocializacion massisa de l'occitan. Imaginar e evocar un conselh d'administracion d'entrepresa, un centre de recèrca en sciéncias experimentalas, un grop de vendèries de drògas o una reet de prostitucion internacionala, metre en scéna una comuni... Legir la seguida


Valora aquest comentari:   votar positiu 6   votar negatiu 0
Respondre comentari replica Comentari inadequat   Formulari d'abús de comentari

9 de febrièr 21.57h

Politica occitana o iniciativas occitanas?
L'occitan peca, çò m'par, per manca d'espacis de convivialitat sociala, culturala, esportiva...
Una lenga es pas sonque una activitat, levat s'es estrangièra, e s'ensenha e s'aprèn.


Valora aquest comentari:   votar positiu 1   votar negatiu 0
Respondre comentari replica Comentari inadequat   Formulari d'abús de comentari

9 de febrièr 13.20h

Perfiacte, Gerard!, coma dison pels Ports.


Valora aquest comentari:   votar positiu 1   votar negatiu 0
Respondre comentari replica Comentari inadequat   Formulari d'abús de comentari

9 de febrièr 11.14h

Si avias fach de las estudis d'ingenior, aurias fabricat un airbus mas ses mas literari e linguistic!
Si avias fach l'ENA serias dins la politica, si avias fach daus dreits, o juristes serias un menaire reconeigut, mas sei mas literari e linguiste!
As fach Jornalet per i trobar a parlar occitan; mas l'autre es pas sovent sur la mesma lonjor d'onda.
Alaidonc, Don quichota, fai de la politica. Pren ton chavau blanc e vai controlar si Macron depensa l'argent de l'estat coma chau.
Si eras au Parad... Legir la seguida


Valora aquest comentari:   votar positiu 1   votar negatiu 2
Respondre comentari replica Comentari inadequat   Formulari d'abús de comentari

9 de febrièr 09.26h

Pensi qu'es Goro e non Goró, accentuacion del mot en anglés.


Valora aquest comentari:   votar positiu 0   votar negatiu 0
Respondre comentari replica Comentari inadequat   Formulari d'abús de comentari

9 de febrièr 09.25h

*raive: somi, sòmi, pantais


Valora aquest comentari:   votar positiu 1   votar negatiu 3
Respondre comentari replica Comentari inadequat   Formulari d'abús de comentari

5 -10 -20 -tots
1




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat
BANER1-2-3: DGPL DICTADES

Perfil

Gerard Joan Barceló

Gerard Joan Barceló logo rss

Lingüista, professor agregat de gramatica e director de la revista electronica universitària Lingüistica Occitana. President de l'associacion Los amics de Jornalet

mai d'informacions

contactar l'autor

Categorias

Las mai...

Mai d'articles

Archius




Etiquetas

D'autres articles


Jornalet, gaseta occitana d'informacions