Bandièra01 1180x150: Comuna de Tolosa

Opinion

Perqué votarai, pasmens

Urna catalana engabiada
Urna catalana engabiada
Gerard Joan Barceló

Gerard Joan Barceló

Lingüista, professor agregat de gramatica e director de la revista electronica universitària Lingüistica Occitana. President de l'associacion Los amics de Jornalet

Mai d’informacions
Chasque jorn, afortissi mai una sensibilitat libertària qu'assagi d'articular a ma consciéncia d'èstre occitan. Òr, rèsti en çò qu'es per quasi tota l'umanitat França, e mai se voudriáu que siguèsse oficialament Occitània. Amb mei pantais libertaris e occitanistas, me temptariá, coma a d'amics que i a, de refusar de votar.

Lei compreni ben: siam ultraminoritaris dins la societat que voudriam nòstra, en consequéncia de qué nos sentèm pauc ò ges pròches deis idèas que lei pòrtan leis elegits, en particular quand s'agís dau nivèu estatau ò dei regions ò dei comunas pus grandas. En mai d'aquò, la democracia dicha representativa a d'inconvenients que contèsti pas, dont lo fach qu'en realitat nos representa pauc ò ges, amb de pretenduts representants de categorias sòcioprofessionalas fòrça mai autas que la rèsta de la populacion. Sovent, se parla de "classa politica" per evocar lo fach que lei politicians se constituisson en casta distinta deis autrei membres dau còrs sociau. Enfin, en nom de qué faudriá delegar lo temps d'un mandat tot son poder politic de ciutadan a chasca eleccion?

Mai contunharai de votar.

Primier, perque se me demandan mon opinion, perqué la dariáu pas? Pensi ai milions e mai miliards d'èstre umans que vivon sota de regims autoritaris, dictatoriaus ò totalitaris: sarián ben contents de se poder exprimir, coma lei milions de catalans pereu se volián exprimir liurament per lo referendum d'independéncia de 2017. E ja, lo 26 de mai, agradarà an aquelei catalan·a·s de desfisar Espanha e l'Euròpa indiferenta en mostrant son supòrt a Puigdemont ais eleccions europèas.

Me diretz que lo vòte non sièrv a ren. Sièrv pas en tot, cèrtas, mai cresètz de verai que leis abstencionistas e non-inscrichs sus lei listas electoralas, dins lei quartiers populars estatsunidencs, càmbian son país perque vòtan pas? Contribuisson a mantenir un sistèma bipartita onte lei soletei possibilitats son, d'un caire, lei "republicans" entre drecha e extrèma drecha, e d'autre caire, lei "democratas", entre senèstra e centredrecha. "Quau ditz ren consent", e capita jamai que i ague en quauque luòc tan pauc de votaires que la democracia dicha representativa s'escranca. Sempre i a pron de monde que van votar, e se participam pas au sufragi, leis autres decidiràn per nosautres. Lei residents dau quartier popular de ma vilòta, de fach, permeton que leis eleccions se i resumigan au duau entre la drecha liberaloconservatritz e lei fòrças reaccionàrias e xenofòbas dau Recampament Nacionau.

E coma saupre s'aquelei que sòrton deis eleccions, leis aprovam, lei rebutam ò i siam indiferents, se restam a l'ostau?

Enfin, se lo monde, qué que vouguem, tenon de votar, e se lo sistèma qu'aborissèm s'escranca pas d'espereu, coma esperar de cambiar la societat? Sabèm que la lucha armada es pas de mòda: adonc, esquilhem nòstre bulletin dins l'urna!

Lei caumas, lei protèstas per carrieras ò a nòstre entorn, lei peticions en linha, leis iniciativas associativas, l'accion coma consumaire, totei lei formas de resisténcia e de desobesissença civila?

I renóncii pas, son necessàrias perque la lucha es de chasque jorn.

Mai contunharai de votar.








 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Joan-Marc LECLERCQ
4.

Mercés per aqueste tèxte. De mon costat avèvi escrit un tèxte on explicavi pr'amor angori pas votar. Fin finala, après soscadissa, pensi que votar o pas es pas çò d'important. Çò d'important, ende jo, es de hèr comprénguer qu'existissen sistèmas mès democratics qu'aquestas eleccions. Après, votar o pas, cambi pas ren. Es una presa de consciéncia, e pensi qu' a fòrça monde que començan d'ac saber, quitament se votan.
Normalament, caleré, end'aquestas eleccions europencas, tornar "botar los comptadors a zèro" suus mèdias e balhar la medisha importància a cada lista. Es pas lo cas, lo servici public equilibra pas las chanças de cada lista. Es a díser que son faussadas, e es aisit ende RN e LREM de hèr créser a un duau entre eths, çò que hè vénguer lo vòte end'una auta lista sense d'importància. De mès, una entrevista deu Sénher de Villiers explicava plan que, en tot crompar parts de borsa en çò de TF1, una lista podèva passar de 2% a 8% dens lo sondatges. Una eleccion "equitabla" dens un mitan capitalisto-estatau es pas possibla.

  • 12
  • 0
Papioli
3.

Lo monde an de mens en mens fisança dins las institucions que siajan francesas o europennas. Lo sistem economico-financier- tecnologic se desagregea; es minjat per la corupcion, l'endetament e a pus ren a perpausar a part l'autoritarisme.
La situacion es presque revolucionaria e las solucions son pus la peticion, las negociacions, las manifestacions mas lo renversament dau poder pas solament de Macron mas de tot lo sitem econmico-financier-tecnologic. Lo mecontatament es de mai en mai grand e tòca las petitas gens coma l'elita.
Los occitanistes devrian veire pus lonh e reclamat la fin dau decopatge lotaringien de França e reclamar un decopatge dins l'autre sens segon un axe Oest/Est. Au sud de la limita òc/oil ; Au nòrd d'una limita entre Leira e Seina; entre las doas una region qu'aniria de Bretanha a Lion.L'òm parla de separar Euròpe dau nòrd e Euròpe dau Sud mas dins quala partida França se trobaria?
Es temps d'aver de las revendicacions ambiciosas e pas solament dins lo domeine linguistic o culturau.

  • 4
  • 0
Black Blòc Joe
2.

— Se me demandan mon opinion, perqué la donariái pas ?
— Cap tièra electorala non representa pas mon opinion. Cossí vòles que la done en anant votar ?

— Me diretz que servís pas a res, mas cresètz que los abstencionistas càmbian lo mond ?
— Del moment qu'intran dins la luta per carrièras, o pòdon esperar. Se votar sonque permetiá de cambiar lo mond, seriá interdit de votar…

— Qui non ditz res consent…
— Votar per un esquerrista de dreita o un dreitista de dreita non es parlar. Soi contra lo liberalisme (dreita radicala incondicionala) e es fòra de discutida dins lo païsatge electoral europèu de tornar metre en question aquesta fòrma financiària de dictatura mondializada.

— E cossí saber s'aquelas leis que sòrton de las eleccions, las aprovam, las rebutam o si sèm indiferents, se restam a l'ostal ?
— Non pas votar es pas demorar a l'ostal ! Es refusar de se far enfarinar encara e encara per de mercants de paraulas que nos vendon de sòmnis e nos enfuman abans de nos traïr tre qu'elegits.

— Las caumas, las protèstas per carrièras o a nòstre entorn, las peticions en linha, las iniciativas associativas, l'accion coma consumaire, totas las formas de resisténcia e de desobesissença civila, las abandoni pas.
— Urosament, mas al cap d'un moment, de cara a la dictatura de la casta dels mercats internacionals, res non val l'electrochòc, per lor caçar la quimèra ! La de se creire superiors a totes e de s'anar pensant que tot lor seriá degut, a eles, e res non o seriá pas als autres, a nosautres. Los psicopatas que dominan lo mond politic e economic non entendon res a la compassion : entendon sonque la fòrça. E dels vòtes, se'n chautan, coma Espanha se chauta ben de saber çò que vòta o non Catalonha a un referendum d'independéncia…

  • 12
  • 1
Hubert Solatge
1.

Avètz rason de votar! Fasètz lo triatge selectiu tanben? Lo reciclatge, es tras qu'important per Occitània e pas solament, autanplan pel planeta. E neurir los aucelòts a l'ivèrn, o fasètz tanben? Contatz-nos!!! Mercés per aquest messatge que nos reviscòla. Òsca!

  • 6
  • 7

Escriu un comentari sus aqueste article