CAPÇALERA: publicitat jornalet
CAPÇALERA2: FAI-TE SOCI

Jornalet, gaseta occitana d'informacions

Dijòus, 18 de julh

Gerard Joan Barceló

Dimenge, 23.6.2019 05h00

Decidir qual sèm


Comentaris 11 comentaris    
Dolent Fluix Bo Molt bo Fabulós (36 vòtes)
carregant En cargament


Aficha francesa del filme biografic Rocketman
© Lo sit de cinèma Allociné




La setmana passada, anèri veire Rocketman, un pro bon filme, entre biopic e comèdia musicala. I seguissèm lo biais qu'un drollet timid, Reginald Dwight, entre un paire glacial e una maire egoïsta, ven l'exuberant artista Elton John. Tanben se compren que las tendéncias alcolicas e toxicomanas de l'òme s'explican en bèla part pel fach que triga a s'acceptar coma es, valent a dire coma omosexual. Tanlèu o acceptar plenament, comença d'aver enfin una vida sana d'amor e d'equilibri personal, segon la morala del longmetratge.

Durant lo meteis periòde, mai o mens, d'amics mieus me recomandèron lo vidèo d'un jove transgenre catalan, Hugo, que nos fa veire cossí se va tresmudant en çò qu'es al fin fons de sa personalitat. Coma lo cantador e compositor anglés, Hugo a decidit qual es, non pas amb una identitat inventada, mas prigondament sentida.

Per tant, me pòdi pas empachar de pensar a totes aqueles sègles, e mai millenaris, de secutament de la gent que se sentiá autra que las nòrmas religiosas e socialas volián que foguèsse, e que se deviá sempre escondre darrièr una masca per poder subreviure, amb un tras que probable grand patiment. Encara uèi, es pas totjorn aisit pertot ni en tota circonstància de véncer las pressions exterioras per afortir liurament çò qu'òm es.

Totun, se tracta pas, a mon vejaire, sonque de çò de l'identitat de genre o d'orientacion sexuala. Cresi que poiriam aplicar aquela reflexion a las questions d'identitat culturala. D'efièch, se dins lo Bas Ador se senton mai bascos que gascons o occitans, qual o lor pòt reprochar? Lo lingüista e l'istorian auràn rason de recordar qu'en realitat l'occitan gascon i èra lenga autoctòna, non lo basco (mençonarai pas l'Antiquitat ont la lenga que lo basco actual n'es sortit se parlava dins un espaci mai grand), mas se la populacion de la region s'identifica mai al Bascoat qu'a Gasconha o a Occitània, que podèm far?

Entendètz-me plan: buti pas degun a abandonar la promocion del gascon en Bas Ador ni en quina region occitana que siá. Al contrari, dins mon Daufinat provençal, vòli que lo mond comprengan que son en Occitània, çò es que se pòdon apropriar la lenga del luòc, se o vòlon, e que doncas lor es accessible d'èsser plenament occitans.

Pasmens, se, malgrat totes nòstres esfòrces d'informacion per que pòscan decidir qual son, de populacions preferisson de se sentir autras que çò que nos agradariá que foguèsson, las podèm pas obligar a res. Perque me pareis que l'occitanitat es un projècte de libertat.

 



publicitat
BANER1-2-3: DGPL AN LAFONT



Comentaris

28 de junh 20.14h

#11 Ai jamai dich lo contrari ;) mas qu'es pas nautres que chaussissem, qu'es la gent. Nautres fam mas promòure e perpausar, qu'es pas dich que siá pro per reviscolar lo gascon alai subretot si la gent aiman mai s'identifiar au basc, coma los voletz convéncer si zo vòlen pas? Mas ieu damande mas que lo gascon se reviscòle alai. Ieu me garde de tot discors d'autoritat.


Valora aquest comentari:   votar positiu 10   votar negatiu 1
Respondre comentari replica Comentari inadequat   Formulari d'abús de comentari

27 de junh 10.30h

#10 Lo Baish Ador qu'ei occitan, qu'ei un fèit basat sus elements concrets e raperats per l'actualitat. Abandonar lo Baish Ador qu'ei ua manca d'etica. https://www.jornalet.com/nova/11243/bidaishe-se-rendra-un-omenatge-als-occitanofons-de-bas-ador


Valora aquest comentari:   votar positiu 4   votar negatiu 9
Respondre comentari replica Comentari inadequat   Formulari d'abús de comentari

24 de junh 23.37h

Te segue en plen Gerard-Joan, tenes de las paraulas sàvias a mon idea, s'agís pas d'abandonar, s'agís de comprene las dinamicas a l'òbra e puei, se pòt pas decentament metre sus lo mesma plan lo rapòrt dau basc a l'occitan e lo dau francés a l'occitan, qu'es pas lo mesma rapòrt de dominacion sociala, politica e economica. Si la gent zo volián alai au País Basc, se podrián aura partejar entre cultura occitana gascona e basca mas que nautres puescham l'i reviscolar l'occitan gascon, qu... Legir la seguida


Valora aquest comentari:   votar positiu 23   votar negatiu 9
Respondre comentari replica Comentari inadequat   Formulari d'abús de comentari

24 de junh 19.00h

Se fau "çò que vòli", pretendretz que soi liure. Reginald Dwight voliá viure e conéisser l'amor amb d'òmes. S'o a fait, me diretz qu'es liure. Pensi que vos i enganatz. Se fau "çò que vòli", non soi pas per aitant liure, per amor que non soi liure d'o voler o non. Reginald voliá un òme. Non causiguèt pas jamai de voler un òme. Se trobèt, se constatèt, puèi s'acceptèt lo volent : non es una causida, mas un constat. Coma ieu constati, per exemple, que vòli una femna. Non dicidis... Legir la seguida


Valora aquest comentari:   votar positiu 6   votar negatiu 0
Respondre comentari replica Comentari inadequat   Formulari d'abús de comentari

24 de junh 02.26h

1) Los despartaments màncon pas de far reclama de lurs accions socialas, de lur sosten a l'accion culturala dinc lo jornalet mesadièr o trimestrau que màndon als ciutadans de chasca despartament. Quò fai que revendícon endirectament l'endispensabilitat de lur esistença. Ansin es justificada la presença dals elegits qu'òbran au despartament. Fons de comèrci que s'entreten dinc las cervèlas, per començar...
1790 veguèt l'arrivada dals despartaments. Mès la creacion istoricament pro ... Legir la seguida


Valora aquest comentari:   votar positiu 1   votar negatiu 0
Respondre comentari replica Comentari inadequat   Formulari d'abús de comentari

23 de junh 15.39h

N’i a pas nada rason etica d’abandonar eth gascon deth Baish Ador quan lo gascon i ei enqüèra parlat e defendut per divèrs abitants e divèrsas associacions locaus.

Eths portaires dera cultura occitana que son tots egaus: eths deu Baish Ador com eths de Marselha, de Lemòtges o de Tolosa... N’existeishen pas occitans de primèra classa e occitans de segonda classa. Abandonar eth Baish Ador? E perqué non pas abandonar Marselha o Pèiralata, ont l’occitan ei mensh parlat qu’a Baio... Legir la seguida


Valora aquest comentari:   votar positiu 29   votar negatiu 16
Respondre comentari replica Comentari inadequat   Formulari d'abús de comentari

23 de junh 13.40h

Lo dreit de causir qu'ei fonamentau entà la libertat, e los catalans b'ac saben plan. L'identitat d'un pòble n'ei pas mei que la causida d'aqueth pòble. L'identitat e la cultura francesas se son impausadas per la fòrça e dab metòdas pervèrsas. L'identitat basca qu'ei arribada en Baish Ador coma ua alternativa a la francesa e lo monde e l'an causida deu temps que los occitans n'avem pas hèit cap arren. Se l'occitanisme ne hèm sonque cridar e repotegar, mes non èm pas capables d'aufrir ... Legir la seguida


Valora aquest comentari:   votar positiu 17   votar negatiu 8
Respondre comentari replica Comentari inadequat   Formulari d'abús de comentari

23 de junh 13.16h

L'identitat dels gents de França es mai que mai departamentala, fòra regions ancianas d'identitat fòrta.


Valora aquest comentari:   votar positiu 3   votar negatiu 0
Respondre comentari replica Comentari inadequat   Formulari d'abús de comentari

23 de junh 11.33h

A un moment o un autre, traquet traquet, venem pertusós a l’ambient cultural mager. S’en far pas vertadièrament una causida, sem jos l’aflat de las culturas dominantas, d’en primièr al nivèl internacional, puèi de la, de las culturas que nos enròdan.

Atal una cultura enrodanta qu’es pas tia pòt venir una referencia culturala onte se cabussa d’autant mai d’aviat se ta cultura es flaca. Es atal que se limpa d’una cultura a una autra.

La causida d’una cultura enrodanta... Legir la seguida


Valora aquest comentari:   votar positiu 3   votar negatiu 5
Respondre comentari replica Comentari inadequat   Formulari d'abús de comentari

23 de junh 09.34h

Lo problem quò es que si los occitans devrian chausir, chausiria lo frances. L'autre problem quò es que Jornalet fai ren per developar l'occitanitat daus occitans.


Valora aquest comentari:   votar positiu 2   votar negatiu 13
Respondre comentari replica Comentari inadequat   Formulari d'abús de comentari

5 -10 -20 -tots
1
-
2 >




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat
BANER1-2-3: DGPL TRADUCTOR

Perfil

Gerard Joan Barceló

Gerard Joan Barceló logo rss

Lingüista, professor agregat de gramatica e director de la revista electronica universitària Lingüistica Occitana. President de l'associacion Los amics de Jornalet

mai d'informacions

contactar l'autor

Categorias

Las mai...


Mai d'articles

Archius




Etiquetas

D'autres articles


Jornalet, gaseta occitana d'informacions