CAPÇALERA: HISTÒRIA DE LA CUINA CATALANA I OCCITANA
CAPÇALERA2: FAI-TE SOCI

Jornalet, gaseta occitana d'informacions

Dijòus, 12 de decembre

Gerard Joan Barceló

Dissabte, 21.9.2019 17h00

Contra l'occitanisme dels passes endarrièr


Comentaris 13 comentaris    
Dolent Fluix Bo Molt bo Fabulós (31 vòtes)
carregant En cargament


Aquesta setmana, quitarai lo Principat d'Andòrra per parlar del Principat de Catalonha. Dos ans après l'estrambòrd del referendum d'independéncia, s'i viu un periòde de dobtes provocats per la brutalitat de la repression espanhòla e la coardiá de l'Union Europèa que refusa ara per ara d'intervenir, malgrat la suspension arbitrària dels dreches de tres eurodeputats, malgrat la violacion evidenta dels principis democratics, malgrat la demanda constanta de mediacion internacionala de part de las fòrças independentistas e del govèrn de la republica en exili. S'espèra pereu amb ànsia la senténcia de la Cort Suprèma envèrs los presonièrs politics. La Diada de l'11 de setembre passat demòstra la persisténcia de la resisténcia catalana a Espanha, mas pareis que de politicians que i a renóncian a l'unilateralitat de quin conflicte d'independéncia que siá, e son temptats de far de passes endarrièr non solament sul mandat popular del Primièr d'Octòbre, mas tanben sus l'autodeterminacion o sus la defensa descomplexada de la lenga catalana.

Sens pretendre, de tot segur, que las realitats sián identicas o parièras, soi a me demandar se l'occitanisme lo menaça pas grèvament una cultura dels passes endarrièr. Sens parlar de las questions d'independéncia e d'autonomia, qu'an sempre devesit los militants de la lenga nòstra, l'occitanisme sembla ara de jogar la defensa (assajar de salvar lo pauc d'occitan mantengut qu'avèm) puslèu que l'ataca. Se desira qu'al licèu l'opcion d'occitan siá a egalitat amb las lengas de l'Antiquitat, çò que sosteni en nom del principi de l'egalitat de las disciplinas, mas se desmembra que lo problèma de fons es la facultativitat de la lenga nòstra, que la fragiliza grèvament. Quora enfin totes los militants de l'occitan nos organizarem collectivament per exigir sens ges de complèxe qu'en nom de la reparacion istorica d'un etnocidi la lenga siá ensenhada obligatòriament? Almens dins l'ensenhament primari, coma ja se fa en Corsega? Tanben vòli ben entendre que lo concèpte de "nacion" l'accèpte pas totòm, mas constati ça que la qu'e mai l'idèa de "pòble" es un tabó per fòrça occitanistas: franc de las lengas bastidas coma l'esperanto, s'es ja vist una lenga sens pòble per la parlar?

Encara mai lanhós me sembla lo progrès d'idèas francament reaccionàrias dins l'occitanisme. Per quant a ieu, ai jonch lo movement occitan de liberacion non solament per adesion a la necessitat de manténer e desvolopar la cultura nòstra, mas tanben per bastir una societat melhora que la francesa. Me còsta d'imaginar una Occitània que siá la còpia de França, amb l'occitan en plaça del francés. Se sabi plan que lo renaissentisme occitan es totjorn estat d'ideologias divèrsas, m'inquieta de veire de devises xenofòbs e mai racistas, de comentaris climatosceptics e conspiracionistas, de misoginia e d'omofobia. Cresiái que l'occitanisme aviá d'ambicions mai nautas, e que fòrça avián comprés la necessitat absoluda de s'alonhar dels sectors de l'extrèma drecha identitària. Cresi encara uèi en un occitanisme umanista que defenda l'injustícia que nòstre pòble n'es victima sens atacar lo migrant o l'omosexual, e qu'entenda la solidaritat internacionala de Gaza a Kinshasa, e de Barcelona a Hong Kong.

En consequéncia de qué rebuti l'occitanisme dels passes endarrièr.



publicitat
BANER1-2-3: DGPL TRADUCTOR



Comentaris

30 de setembre 00.31h

#8 Molt d'acord amb el seu posicionament.


Valora aquest comentari:   votar positiu 1   votar negatiu 0
Respondre comentari replica Comentari inadequat   Formulari d'abús de comentari

24 de setembre 07.52h

#11

S’en cal pas saber mal de tot aquò, es perda per Occitània e subretot pels occitans e sabem plan que las causas son perdudas e clavadas !

Es pas l’occitanisme que las tornarà quilhar ! amai se tot e còps aücan : « Al requilh ! »

Fan riser aquelas refalsadas de vièlha maura


Valora aquest comentari:   votar positiu 6   votar negatiu 7
Respondre comentari replica Comentari inadequat   Formulari d'abús de comentari

23 de setembre 21.28h

Quand om legís los excumenges acostumats contra "l'extrèma drecha identitària", qu'om vei, per illustrar l'article, un drapèu roge e jaune ambe un punh ecumenique, i a pas cap de rason de se far de missant sang pels passes en arrèr : l'occitanisme contunha d'avançar... cap al precipici.


Valora aquest comentari:   votar positiu 16   votar negatiu 22
Respondre comentari replica Comentari inadequat   Formulari d'abús de comentari

23 de setembre 12.26h

#2 Illustracion de l'estrategia de l'extrèma drecha de se plaçar en "victima"


Valora aquest comentari:   votar positiu 16   votar negatiu 12
Respondre comentari replica Comentari inadequat   Formulari d'abús de comentari

23 de setembre 11.24h

#8

Qu’avetz razon de soslinhar lo punt de las impossibilitats de l’ensenhament, i caldria apondre tanben lo de que i a de sedusenr d’aprener l’occitan, se nosaus ne sem gaireben convinçuts ne i a un brava palencada qu’es brica conviçuda. E que son de convencer vertat ? Es pas ambe aquel estil d’estampida que van èsser convinçut.

Es un biais de l’occitanisme de far demandas per de causas que pòdon pas far, nimai endralhar.

Part aquò es un article d’estremar dins la c... Legir la seguida


Valora aquest comentari:   votar positiu 13   votar negatiu 19
Respondre comentari replica Comentari inadequat   Formulari d'abús de comentari

23 de setembre 00.14h

#6 Curiós… Çò qu'apelatz "Euròpa", o apèli ieu "grand capitalisme internacional", una dictatura que las institucions europèas i son pas qu'un aplèit pseudodemocratic de mai qu'a per objectiu de nos remandar 150 ans enré, dins unas condicions de precaritat, de pauretat e de servilitat comparablas a las situacions inumanas que las descriviá menimosament lo grand Jack London, dins la Londres del sègle XIX, justament, dins sos dos libres indispensables "The People of the Abyss" e "The I... Legir la seguida


Valora aquest comentari:   votar positiu 14   votar negatiu 5
Respondre comentari replica Comentari inadequat   Formulari d'abús de comentari

22 de setembre 12.16h

La situacion deu esser clara; i a pas d'un costat França e de l'autre l'UE. I a l'UE que dempuei lo referendum sur l'Euròpe se comporta coma un sol dictator. Los parlements daus pais europeens an passat lòr temps a transcrire lo dreit europen dins chaque estat e sans discussion.
Macron vòl una armada europenna per empeschar tota enveja de separatisme que quò siaja una minoritat coma Catalonha o un pais coma Angleterra per poder dire que l'UE es una fòrça tant poderosa dins lo monde com... Legir la seguida


Valora aquest comentari:   votar positiu 5   votar negatiu 6
Respondre comentari replica Comentari inadequat   Formulari d'abús de comentari

22 de setembre 12.16h

La situacion deu esser clara; i a pas d'un costat França e de l'autre l'UE. I a l'UE que dempuei lo referendum sur l'Euròpe se comporta coma un sol dictator. Los parlements daus pais europeens an passat lòr temps a transcrire lo dreit europen dins chaque estat e sans discussion.
Macron vòl una armada europenna per empeschar tota enveja de separatisme que quò siaja una minoritat coma Catalonha o un pais coma Angleterra per poder dire que l'UE es una fòrça tant poderosa dins lo monde com... Legir la seguida


Valora aquest comentari:   votar positiu 5   votar negatiu 5
Respondre comentari replica Comentari inadequat   Formulari d'abús de comentari

22 de setembre 10.29h

Que soi plan d'accòrdi dab aqueste article.
Que va caler tanben un dia se pausar la question de saber si l'occitanisme que vòu demorar dens ua luta culturau e lingüistica. Que va caler se diser a un moment que va caler har accions on vam encontrar la policia tà lhèu se har préner au serios peus politics e las administracions.


Valora aquest comentari:   votar positiu 10   votar negatiu 7
Respondre comentari replica Comentari inadequat   Formulari d'abús de comentari

22 de setembre 00.40h

L'Uniou Uroupênco es pas coardo. Se mèsclo pas dis afaire intèrnos dis estats.
Esijo soulomen que lei lingos regiounalos sàiou recounegudo... maudespié la franço qu'esijet acò di païs de l'èste sèns l'aplica guilo-mèmo.

L'UE sousté pas li separatismes .... sounque lou separatisme escoucés se la Grando-Bretanho tïtavo l'UE.

Aquelo atitudo es criticablo mas o pas ris à vèire ammé la coardeso.


Valora aquest comentari:   votar positiu 6   votar negatiu 6
Respondre comentari replica Comentari inadequat   Formulari d'abús de comentari

5 -10 -20 -tots
1
-
2 >




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat
BANER 3 teveoc

Perfil

Gerard Joan Barceló

Gerard Joan Barceló logo rss

Lingüista, professor agregat de gramatica e director de la revista electronica universitària Lingüistica Occitana. President de l'associacion Los amics de Jornalet

mai d'informacions

contactar l'autor

Categorias

Las mai...

Mai d'articles

Archius




Etiquetas

D'autres articles


Jornalet, gaseta occitana d'informacions