Bandièra01 1180x150: Comuna de Tolosa

Opinion

Contra l'occitanisme dels passes endarrièr

Bandièra occitana roge e negre de lucha
Bandièra occitana roge e negre de lucha
Gerard Joan Barceló

Gerard Joan Barceló

Lingüista, professor agregat de gramatica e director de la revista electronica universitària Lingüistica Occitana. President de l'associacion Los amics de Jornalet

Mai d’informacions
Aquesta setmana, quitarai lo Principat d'Andòrra per parlar del Principat de Catalonha. Dos ans après l'estrambòrd del referendum d'independéncia, s'i viu un periòde de dobtes provocats per la brutalitat de la repression espanhòla e la coardiá de l'Union Europèa que refusa ara per ara d'intervenir, malgrat la suspension arbitrària dels dreches de tres eurodeputats, malgrat la violacion evidenta dels principis democratics, malgrat la demanda constanta de mediacion internacionala de part de las fòrças independentistas e del govèrn de la republica en exili. S'espèra pereu amb ànsia la senténcia de la Cort Suprèma envèrs los presonièrs politics. La Diada de l'11 de setembre passat demòstra la persisténcia de la resisténcia catalana a Espanha, mas pareis que de politicians que i a renóncian a l'unilateralitat de quin conflicte d'independéncia que siá, e son temptats de far de passes endarrièr non solament sul mandat popular del Primièr d'Octòbre, mas tanben sus l'autodeterminacion o sus la defensa descomplexada de la lenga catalana.

Sens pretendre, de tot segur, que las realitats sián identicas o parièras, soi a me demandar se l'occitanisme lo menaça pas grèvament una cultura dels passes endarrièr. Sens parlar de las questions d'independéncia e d'autonomia, qu'an sempre devesit los militants de la lenga nòstra, l'occitanisme sembla ara de jogar la defensa (assajar de salvar lo pauc d'occitan mantengut qu'avèm) puslèu que l'ataca. Se desira qu'al licèu l'opcion d'occitan siá a egalitat amb las lengas de l'Antiquitat, çò que sosteni en nom del principi de l'egalitat de las disciplinas, mas se desmembra que lo problèma de fons es la facultativitat de la lenga nòstra, que la fragiliza grèvament. Quora enfin totes los militants de l'occitan nos organizarem collectivament per exigir sens ges de complèxe qu'en nom de la reparacion istorica d'un etnocidi la lenga siá ensenhada obligatòriament? Almens dins l'ensenhament primari, coma ja se fa en Corsega? Tanben vòli ben entendre que lo concèpte de "nacion" l'accèpte pas totòm, mas constati ça que la qu'e mai l'idèa de "pòble" es un tabó per fòrça occitanistas: franc de las lengas bastidas coma l'esperanto, s'es ja vist una lenga sens pòble per la parlar?

Encara mai lanhós me sembla lo progrès d'idèas francament reaccionàrias dins l'occitanisme. Per quant a ieu, ai jonch lo movement occitan de liberacion non solament per adesion a la necessitat de manténer e desvolopar la cultura nòstra, mas tanben per bastir una societat melhora que la francesa. Me còsta d'imaginar una Occitània que siá la còpia de França, amb l'occitan en plaça del francés. Se sabi plan que lo renaissentisme occitan es totjorn estat d'ideologias divèrsas, m'inquieta de veire de devises xenofòbs e mai racistas, de comentaris climatosceptics e conspiracionistas, de misoginia e d'omofobia. Cresiái que l'occitanisme aviá d'ambicions mai nautas, e que fòrça avián comprés la necessitat absoluda de s'alonhar dels sectors de l'extrèma drecha identitària. Cresi encara uèi en un occitanisme umanista que defenda l'injustícia que nòstre pòble n'es victima sens atacar lo migrant o l'omosexual, e qu'entenda la solidaritat internacionala de Gaza a Kinshasa, e de Barcelona a Hong Kong.

En consequéncia de qué rebuti l'occitanisme dels passes endarrièr.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Môrestel Andorra
13.

#8 Molt d'acord amb el seu posicionament.

  • 1
  • 0
oksitanlaştıramadıklarımızdanmısınız Apraquital, tresena tenda apèi lo tuc còsta lo riu ont se banhan banhan nusas las zègas a negrenuèch
12.

#11

S’en cal pas saber mal de tot aquò, es perda per Occitània e subretot pels occitans e sabem plan que las causas son perdudas e clavadas !

Es pas l’occitanisme que las tornarà quilhar ! amai se tot e còps aücan : « Al requilh ! »

Fan riser aquelas refalsadas de vièlha maura

  • 6
  • 7
Pierre Terral
11.

Quand om legís los excumenges acostumats contra "l'extrèma drecha identitària", qu'om vei, per illustrar l'article, un drapèu roge e jaune ambe un punh ecumenique, i a pas cap de rason de se far de missant sang pels passes en arrèr : l'occitanisme contunha d'avançar... cap al precipici.

  • 16
  • 22
Red is dead
10.

#2 Illustracion de l'estrategia de l'extrèma drecha de se plaçar en "victima"

  • 16
  • 12
oksitanlaştıramadıklarımızdanmısınız Apraquital, tresena tenda apèi lo tuc còsta lo riu ont se banhan banhan nusas las zègas a negrenuèch
9.

#8

Qu’avetz razon de soslinhar lo punt de las impossibilitats de l’ensenhament, i caldria apondre tanben lo de que i a de sedusenr d’aprener l’occitan, se nosaus ne sem gaireben convinçuts ne i a un brava palencada qu’es brica conviçuda. E que son de convencer vertat ? Es pas ambe aquel estil d’estampida que van èsser convinçut.

Es un biais de l’occitanisme de far demandas per de causas que pòdon pas far, nimai endralhar.

Part aquò es un article d’estremar dins la categaria cacà nervós., escrich dins lo pus mai blos estil estalinian. Estirgonhal de cap e rodament de caps son servís a gratís.

Vòli e vòli pas… es vertadièrament mainatgenc, manca grandàs de maturitat !

Un pichon mot sus la reparacion qu’es quicòm de manejar pempilhosament es un afar seriosa e vèsi qu’un còp mai l’occitanisme es despassat e ranqueja. Segur tot aquò malcora e es pas ambe d’articles atal que van empusar los occitans a simplament los escotar

Parlar al occitanistas que son una mendre minoritat es plan mas sufís pas per endralhar un movament larg e rencrèisser lo mercat « occitan ».e tot aquò pauquetja….

  • 13
  • 19

Escriu un comentari sus aqueste article