Bandièra01 1180x150: Comuna de Tolosa

Opinion

Imaginem una Occitània independenta

Gerard Joan Barceló

Gerard Joan Barceló

Lingüista, professor agregat de gramatica e director de la revista electronica universitària Lingüistica Occitana. President de l'associacion Los amics de Jornalet

Mai d’informacions
Jamai non ai escondut que pensi qu'una Occitània independenta me pareis d'èsser lo sol quadre politic ont se pòsca considerar una politica lingüistica en favor de l'occitan; França contunha de mespresar la lenga nòstra, en li autrejant sonque qualques brigas per semblar de far quicòm, Itàlia fa pas res d'eficaç e Espanha, amb l'obligacion constitucionala de saber l'espanhòl, impausa una diglossia en favor de sa lenga; per quant a Mónegue, lo ligur monegasc solet i ten qualque reconeissença, ça que la insufisenta per que n'i aja un usatge social respectable dins lo Principat.

Mas o sabètz totes plan, l'occitanista es per natura un somiaire, e doncas vòli pas somiar d'una Occitània independenta, mas assajar de l'imaginar racionalament, en pensant a la situacion d'ara de la maniera mai factibla possibla. 

Imaginem doncas una Occitània independenta. Imaginem que dins los discorses occitanistas aja ganhat, non pas lo que vòl far creire que França poiriá cambiar (mentre que càmbia pas), mas lo que pensa -amb rason, a mon vejaire- qu'un estat bastit sus la destruccion de sos pòbles se'n pòt pentir subran, e qu'es mai probable que contunhe son òbra destruseira entrò la fin. Imaginem qu'aquel meteis discors occitanista aja capitat a convéncer la populacion occitana que França, ni mai Itàlia ni Espanha, aduiràn pas res als problèmas economics, politics, socials e environamentas, e que val mai de construire ensems un autre país, e tot aquò d'aitan mai que l'occitanisme independentista venceire serà arribat de persuadir los occitans e las occitanas que podèm recobrar lo prestigi de nòstra civilizacion perduda, que comencèt de s'unir a l'Edat Mejana abans las conquistas mai que mai francesas. Imaginem enfin qu'après un dur conflicte —es segur que França, Itàlia e Espanha se daissaràn pas tòrcer, coma es probable que Mónegue preferirà d'èsser un país per multimilionaris— Occitània existisca coma entitat politica independenta.

E ben, quina lenga parlarà? E mai se supausam un vam en favor de l'aprendissatge sistematic de la lenga nòstra, correlatiu al desir d'independéncia, es evident que la lenga nòstra es en situacion d'extrèma feblesa. Se pòt doncas pensar que la lenga dominanta seriá lo francés dins la màger part del territòri. L'Irlanda independenta a pas capitat a empachar la reculada constanta del gaelic, e l'independentisme catalan, malgrat una lenga pròpria mai fòrta socialament que la nòstra, se tròba obligat d'afrontar la poténcia sociala del castelhan. Tanben, estudiar una lenga significa pas de la parlar, e es tanben un desfís permanent pel catalanisme: mens de gents parlan cada jorn lo catalan que de personas que l'estúdian o lo sabon parlar. Tanben lo nacionalisme còrs emplega d'en primièr lo francés, e vesèm a espelir en Catalonha Nòrd un catalanisme mai que mai francofòn. 

E quin occitan parlariá l'Occitània independenta? S'i apond, d'efièch, una dificultat que nos es especifica. Se podèm considerar amb rason que totas las formas d'occitan fan partida de nòstra identitat nacionala, vesi pas, ara per ara, de constitucion d'una lenga nacionala referenciala qu'implique, qu'aquò nos agrade o non, una mena d'estandardizacion. Los occitanistas nos metèm pas pus d'acòrdi, fin finala volèm tostemps parlar nòstre occitan, e jamai lo dels autres, e l'estandardizacion pluricentrica, que permetriá de conciliar la realitat de la diversitat intèrna e lo projècte d'una unitat de país, es luènh de far lo consens qu'esperariái ieu. 

Per conclure, s'agís pas de vos desesperar mas de dire que devèm recobrar unitat d'accion e coeréncia se volèm bastir quicòm ensems.


abonar los amics de Jornalet

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Gwen St Guironç
10.

Fa bel temps que se fa pas res per l'unificacion, la reconeissença e tot... Fòra per salvar las calendretas e las classas, per segur, una marcha a Paris mas que son devengudas las marchas d'anèm òc a Carcassona, Tolosa, Montpelhièr que fasian bolegar lo monde dins las carrièras e tocavan los curioses "franchimands" ? ..

  • 4
  • 0
Guilhem Pujol
9.

La condicion necessària del sauvament d'una lenga es jà que siague aparada e promocionada per un estat. Condicion necessària mas ailàs pas sufisenta quand se constata lo cas irlandès. Maugrat la consciença identitària granda e la volontat afortida de las institucions estatalas per promoùre lo gaèlic, la lenga s'es totjorn pas recalivada. Alara qu'èra majoritàriament parlada fins al sègle 19 e que son existència en tant que lenga vertadièra e portaira d'una civilizacion sagatada per l'invasion e la colonizacion englèsas foguèt pas jamai mèsa en dobte coma es de longa lo cas amb l'occitan. Alara que los irlandeses foguèron totjorn conscients d'èsser colonizats per Englatèrra e que capitèran a se'n desliurar las armas a la man e, coma o-aguèsse dich Mistral, a reconquistar l'antica libertat, an totjorn pas reconquistat l'empèri de la lenga. Es un mistèri de mal-comprene. Es qu'existissan d'estudis qu'analizan lo perque d'aquel fracàs estranh ?

  • 8
  • 0
Alain Fabre Mureth
8.

Adiu,
Ieu tròbi qu'es bon de somiar un pauc. De tot biais cadun sòmia sa vida.. Uèi los joves somian d'America. I van e se cercan un endrech per se la jogar Steve Job! "Tots winners" e la moneda que cascaleja . Alara nosautres los esclafats de l'istòria, avèm plan lo drech d'imaginar una Occitània independenta.
Ai totjorn pensat qu'un occitan compreniá melhor son occitanitat defòra, à l'estrangièr.
Per exemple me soveni que al trabalh, à l'armada nos agradava melhor entre monde del miègjorn. Per l' espòrt, la cosina, la pesca, la caça l'enveja de natura dubèrta e liura....
Clar que França farà pas ren per la lenga d'òc. E qu'es de nosautres de trepassar las pichòtas diferéncias per nos aligar.
Un eveniment me fariá pensar que benlèu l'idèa d'Occitània independenta podria prene fòrma, mas pas del costat esperat.
Los politics d'ara butat pel liberalisme son a mand d'espetar las leis socialas votadas pel CNR en 1947. Secu, dreches del trabalh, servicis publics.....
Soi convencut que la majoritat dels occitans son fòrça estacats(veire eleccions) a la "Republica sociala" e qu'aquelas leis son en realitat lo béton que ten França coma nacion unida dins Corsa, Catalonha, Euskadi, Occitània, Bretanha, Alsàcia, dom Tom. En espetant aquel sistem los ultra-liberals an dubèrt la boita de Pandora....
Cresi pas que L'UE qu'es pas qu' un pòrta avions de l'Otan siá un jorn una perspectiva agradiva pels pòbles.
Aimariái plan de saber çò que pensa d'aquela UE los catalans, aprèp lor demanda d'ajuda?

  • 9
  • 0
Doctor Mabuse
7.

#4 Dintra aqui filh meu, qu'as tanben trencat totes ligams amb la puta realitat !

  • 15
  • 4
Mèfi! 31
6.

Se cal pausar la question de la correlacion e de la causalitat: Territòri - Pòble - Lenga communa, dans un espaci de continuitat dels parlars populars istorics. E aquí dans le monde latin, o neolatin larg.

  • 0
  • 1

Escriu un comentari sus aqueste article