CAPCALERA: IEA-AALO

Jornalet, gaseta occitana d'informacions

Dijòus, 29 d'octòbre

Gerard Joan Barceló

Dimècres, 12.8.2020 10h15

Espanha e Catalonha: dialogar o renonciar?


Comentaris 7 comentaris    
Dolent Fluix Bo Molt bo Fabulós (13 vòtes)
carregant En cargament


Res dins l'istòria espanhòla non assegura que la republica espanhòla seriá mai favorabla als pòbles que lo regim borbonós




Etiquetas
Barceló, Catalonha, dialòg, independéncia

Cresi, cars legeires e caras legeiras, que parli tròp de Catalonha. Cèrtas, lo desèrt politic occitanista i ajuda pas gaire, mas me pensi qu'ai ja dich tot çò qu'aviái de dire. Occitan e catalan, m'a paregut evident de defendre lo procès independentista, que poiriá far de l'occitan la lenga oficiala d'un estat, çò que seriá istoric dempuèi l'epòca d'Enric III de Navarra, en nom tanben de la libertat dels pòbles de decidir lor avenidor. En mai d'aquò, l'independéncia se votèt fa tres ans: ara es venguda, çò'm par, l'ora de complir lo mandat del pòble.

Un darrièr còp, doncas, voldriái encoratjar los fraires e sòrres occitans e catalans del Principat a fugir la temptacion del renonciament. Per ieu, ara, aquesta temptacion ten dos formas. La primièra es de voler tombar la monarquia espanhòla. D'efièch, res dins l'istòria espanhòla non assegura que la republica espanhòla seriá mai favorabla als pòbles que lo regim borbonós. Es la Segonda Republica espanhòla qu'arrestèt lo president Companys en 1934 per son assag de republica catalana independenta, e vesi pas cap de signe que l'esquèrra espanhòla, supausadament mai republicana, siá favorabla a las revendicacions catalanas; al contrari, la repression judiciària se refortís cada jorn amb la benediccion del govèrn PSÒE-Podèm. En mai d'aquò, perqué una nacion que se vòl distinta d'una autra vendriá ajudar a Espanha se los espanhòls, malgrat l'escàndol de la fugida del "rei emerit", se revòltan pas? Quant a "l'esquèrra espanhòla", lo PSÒE practica lo doble discors sens vergonha, en se pretendent a l'encòp republican per esséncia mas leial a la monarquia, mentre que Podèm fa de republicanisme sonque sus Twitter.  Resumiscam-nos: voler tombar la monarquia es una pèrda de temps per l'independentisme.

La segonda pèrda de temps es "lo dialòg". En se, seretz consents amb ieu que lo dialòg es quicòm de positiu. Mas dins quin cervèl malaut a grelhat l'idèa que dins un procès d'independéncia lo dialòg precedissiá e mai remplaçava la lucha? Digam-o net e clar: los "independentistas" que lo prepausan coma panacèa se trufan del mond. Cèrtas, de segur, caldrà dialogar per negociar las condicions de separacion de Catalonha (e Aran, esperem-o) amb Espanha, pr'amor que quina independéncia que siá implica de precisar e concretizar las condicions juridicas e economicas de la rompedura, mas l'estat dominant, perqué acceptariá de negociar qué que siá amb un territòri rebèl se se sent mai fòrt? Ara l'estat espanhòl ten amb el sos jutges e sa polícia (e mai l'autonomica), son armada, lo sosten oficial de totes los estats de l'Union Europèa: en nom de quina foliá cediriá volontàriament una part de son espaci que li adutz fòrça riquesas? Mai que mai, Espanha ditz clarament que vòl pas dialogar: rebuta categoricament las demandas de referendum pachat e de fin de la repression.  Malgrat sas reviradas davant la justícia europèa, que, ara per ara, dona rason als exiliats e doncas als presonièrs, l'estat espanhòl se crei totpoderós.
Resumiscam-nos: acceptarà de dialogar solament se sent mai flac, se constata que contraròtla pas pus Catalonha.

Se los ciutadans e las ciutadanas del Principat, per tant, vòlon viure liures, cresi ieu a la combinason de tres factors: un pòble combatiu fins a la victòria, de foncionaris leials a Catalonha, de politics valents que compliscan lor mandat.



abonar los amics de Jornalet




 



publicitat
BANNER1: IEO Arièja



Comentaris

16 d'agost 02.08h

#7 au mensh aqueste còp l'autor qu'ac reconeish... Mes se son nosautis qu'at disem lavetz qu'èm tròls marrits hihi


Valora aquest comentari:   votar positiu 4   votar negatiu 5
Respondre comentari replica Comentari inadequat   Formulari d'abús de comentari

13 d'agost 15.39h

Es totjorn gostós de constatar cossi los occitanistas se fan una revòlta per procuracion amb Catalonha. Luòga de menar la seuna qu'a de tota mèna quincanelat dempuèi bèl temps....


Valora aquest comentari:   votar positiu 14   votar negatiu 17
Respondre comentari replica Comentari inadequat   Formulari d'abús de comentari

12 d'agost 20.11h

L´articulista J. Barceló, el més incisiú, el més directe del articulistes del Jornalet Occità,possan lo dit a la nafra.


Valora aquest comentari:   votar positiu 16   votar negatiu 2
Respondre comentari replica Comentari inadequat   Formulari d'abús de comentari

12 d'agost 19.33h

#3 Segon lo mòt ben conegut de Josep Pla " El que més s'assembla a un espanyol de dretes és un espanyol d'esquerres"
A ieu, me sembla coma als sénhers Barceló e Bardòu que los catalans s'an de dedicar sustot a treballar per l'independéncia de la republica catalana. Cal daissar los espanhòls ambe lors reis corromputs e evitar de tombar dins la trampa del dialòg esteril.


Valora aquest comentari:   votar positiu 16   votar negatiu 4
Respondre comentari replica Comentari inadequat   Formulari d'abús de comentari

12 d'agost 18.40h

"Malgrat sas reviradas davant la justícia europèa, que, ara per ara, dona rason als exiliats e doncas als presonièrs, l'estat espanhòl se crei totpoderós. Resumiscam-no s: acceptarà de dialogar solament se sent mai flac, se constata que non contraròtla pus Catalonha." Non reconéisser que lo rapòrt de fòrça, en se chautant de la democracia e del dreit internacional, aquò es ja un dels principis del fascisme…


Valora aquest comentari:   votar positiu 19   votar negatiu 2
Respondre comentari replica Comentari inadequat   Formulari d'abús de comentari

12 d'agost 18.36h

La segonda pèrda de temps es "lo dialògue" : aqueste dialògue, a ieu, me remembra "les grands débats" de Macron. Nos i daissava parlar mas se fotiá cap e tot de çò que i podiam trobar de dire…


Valora aquest comentari:   votar positiu 17   votar negatiu 4
Respondre comentari replica Comentari inadequat   Formulari d'abús de comentari

12 d'agost 16.21h

Plus clar: l'aiga.


Valora aquest comentari:   votar positiu 12   votar negatiu 4
Respondre comentari replica Comentari inadequat   Formulari d'abús de comentari

5 -10 -20 -tots
1




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat
BANER3: Ràdio Occitània

Perfil

Gerard Joan Barceló

Gerard Joan Barceló logo rss

Lingüista, professor agregat de gramatica e director de la revista electronica universitària Lingüistica Occitana. President de l'associacion Los amics de Jornalet

mai d'informacions

contactar l'autor

Categorias

Las mai...


Mai d'articles

Archius




Etiquetas

D'autres articles


Jornalet, gaseta occitana d'informacions