CAPÇALERA2: Entèsta drecha, convergéncia occitana-fixa

Jornalet, gaseta occitana d'informacions

Dijòus, 21 de setembre

Gerard Joan Barceló

Dijòus, 9.2.2017 03h00

Es occitan qui o vòl


Comentaris 6 comentaris    
Dolent Fluix Bo Molt bo Fabulós (10 vòtes)
carregant En cargament


Soi pas nascut occitan, o soi devengut. Per començar, ma vila de naissença es pas occitana mas arpitana, Sant Martin d’Hères, una comuna pòstindustriala de la banlèga de Grenòble. I visquèri pas manco, que ma familha abitava dins una autra vila de la meteissa banlèga, que finiguèri que quitèri a l’edat de tres ans.
 
Se ma maire es una occitana del Daufinat, me calguèt mai de vint e cinc ans per prene consciéncia de mon occitanitat, fruch tardièr de ma recuperacion personala del catalan, de mos ligams prefonds amb Corsega e de ma reflexion sus l’Argeria coloniala de mon paire. Ieu que vos escrivi en aquela lenga que se cèrca encara, soi plenament occitan, mas aquò resulta de ma volontat.
 
E, de fach, despuèi que soi plenament occitan, ai totjorn vist la lenga nòstra atraire de mond de totas las originas, nòstres fraires catalans, cèrtas, mas pereu d’americans del nòrd e del sud, de ciutadans italians luènh de nòstras Valadas, de germanofòns e tant d’autres… Se de verai la pàtria es la lenga, son  tanben devenguts occitans.
 
Mas se de mond de pertot devenon occitans, que fasèm dels abitants d’Occitània, lo país, non pas solament la region, que vòlon pas èsser occitans? Que fasèm dels gascons o dels provençals que se plason en França sens s’identificar de nat biais a la cultura occitana fins al ponch de negar l’existéncia  de la lenga nòstra en son unitat e complexitat? A la fin d’un espectacle de dança que i participava ma filha, e que son tèma èra la Revolucion francesa, totes s’aucèron per cantar La Marseillaise, franc de ieu. Se sentián totes franceses, pas occitans, e ieu me sentiái alara occitan, pas francés; èrem totes, eles e ieu, liures de nòstras causidas desparièras. Coma son liures los occitanistas que se creson tan sovent obligats de renovelar un jurament de fidelitat a un estat que nos mesprèsa. Coma es liura ma maire de se sentir completament francesa e, malgrat un interès relatiu per la lenga occitana a mon contacte, de se considerar de tot en tot estrangièra a la nocion, per dire pas la nacion d’Occitània.
 
Totun, que se prenga en compte un element essencial. Per poder decidir qui sèm, es necite qu’ajam totas las informacions dins nòstras mans. Òr, que sabon de verai los abitants d’Occitània de la lenga, de la cultura, de l’istòria? O ai ja dich, me calguèt esperar quasi trenta ans per resòlver d’èsser plenament occitan, quand comencèri de m’assabentar de la lenga, de la cultura, de l’istòria.
 
Per ansin, que òc, es occitan qui o vòl, mas per exercir ma volontat, devi téner dins mas mans totes los mejans per decidir a bona ensenha. Sens òbra culturala, tota politica es impossibla, coma sens política eficaça, nada òbra culturala se pòt pas desplegar liurament.
 
Que totes poscam vertadièrament resòlver d’èsser plenament occitans! E se o podèm pas de verai decidir, es una injustícia contra la quala avèm de luchar.


abonar los amics de Jornalet
 
 
 



publicitat



Comentaris

10 de febrièr 15.39h

#4 Adieu-siatz, me soi engatjat a evitar de far de comentaris a mos pròpris articles, mas vòstra question es pertinenta. I respondrai dins una autra publicacion


Valora aquest comentari:   votar positiu 3   votar negatiu 0
Respondre comentari replica Comentari inadequat   Formulari d'abús de comentari

10 de febrièr 01.19h

1) Car Gerard-Joan, non ès nascut occitan, o ès devengut. Plan segur. D'un certan punt de vista, me sembla tant vertat que, sens te voler malcorar, me senti en dreit de considerar aquò coma un truïsme, non pas son que per tu, mas per tota femna e tot òme viu que se pensariá d'en primièr èsser qué que foguèsse, occitan o non. En defòra del domani imaginari, convencional e donc fòrça relatiu e discutible en se, de las leis francesas (francesas per exemple) que decidisson, segon crit... Legir la seguida


Valora aquest comentari:   votar positiu 9   votar negatiu 2
Respondre comentari replica Comentari inadequat   Formulari d'abús de comentari

9 de febrièr 23.02h

Se pòdi pausar una question fòrça personala a G J Barceló, d'ont ven lo fach de se sentir mai occitan que arpitan o còrse o francés o argerian o pè-negre ? (sens exclusivitat, mas sembla qu'ajatz causit de portar mai l'identitat occitana).


Valora aquest comentari:   votar positiu 2   votar negatiu 0
Respondre comentari replica Comentari inadequat   Formulari d'abús de comentari

9 de febrièr 16.19h

#2 Sabi pas... Qué pensar d'un anglés, d'un italian, d'un argerian, d'un australian,... que refusa dins una classa francesa de cantar la Marselhesa (e pas la parisenca!) jol pretèxte que son pas franceses?
Lo patriotisme me sembla diferent del nacionalisme (los linguistas o diràn se m'engani).
Remarcaretz que lo contrari (de monde que son "français 100%") cantan amb plaser lo Se Canta (paradoxal? benlèu pas).
Coma o ditz l'autor de l'article, es occitan qual vòl. Mas aquò empacha pas ... Legir la seguida


Valora aquest comentari:   votar positiu 7   votar negatiu 2
Respondre comentari replica Comentari inadequat   Formulari d'abús de comentari

9 de febrièr 13.26h

Quand un paire o de parents occitans poiràn assumir davant lo professor o la directritz de refusar (cortesament, simplament en disent que son occitans) que lor enfant participe a un espectacle perque fa de patriotisme francés, aurèm fach un pas important.


Valora aquest comentari:   votar positiu 12   votar negatiu 1
Respondre comentari replica Comentari inadequat   Formulari d'abús de comentari

9 de febrièr 06.58h

Me perex que vá sê N'Umberto Eco es que vá dí que cada vegada ês més difícil endonermós conte de lo manipulats qu'estam pê sa propaganda. Heyá una diferenci molt gran entre sentí una llengo coma materna ò sentirlà coma apresa. Si sa llengo no ês sa de cateva y sa des teus, encare que t'obliguin à aprenderlà desde que te comensan à escolarisá, may será sa teva llengo materna. S'altre día vatx veure un debat à TV3 en es que participaven un periodista francês y un altre belga... Legir la seguida


Valora aquest comentari:   votar positiu 3   votar negatiu 5
Respondre comentari replica Comentari inadequat   Formulari d'abús de comentari

5 -10 -20 -tots
1




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat
BANER2: IEO Label ÒC

Perfil

Gerard Joan Barceló

Gerard Joan Barceló logo rss

Lingüista, professor agregat de gramatica e director de la revista electronica universitària Lingüistica Occitana. President de l'associacion Los amics de Jornalet

mai d'informacions

contactar l'autor

Categorias

Las mai...

Mai d'articles

Archius




Etiquetas

D'autres articles


Jornalet, gaseta occitana d'informacions