CAPÇALERA: VAU SERENA

Jornalet, gaseta occitana d'informacions

Dimenge, 5 d'abril

Gerard Joan Barceló

Dissabte, 15.2.2020 09h00

Imaginem una Occitània independenta


Comentaris 9 comentaris    
Dolent Fluix Bo Molt bo Fabulós (11 vòtes)
carregant En cargament


Jamai non ai escondut que pensi qu'una Occitània independenta me pareis d'èsser lo sol quadre politic ont se pòsca considerar una politica lingüistica en favor de l'occitan; França contunha de mespresar la lenga nòstra, en li autrejant sonque qualques brigas per semblar de far quicòm, Itàlia fa pas res d'eficaç e Espanha, amb l'obligacion constitucionala de saber l'espanhòl, impausa una diglossia en favor de sa lenga; per quant a Mónegue, lo ligur monegasc solet i ten qualque reconeissença, ça que la insufisenta per que n'i aja un usatge social respectable dins lo Principat.

Mas o sabètz totes plan, l'occitanista es per natura un somiaire, e doncas vòli pas somiar d'una Occitània independenta, mas assajar de l'imaginar racionalament, en pensant a la situacion d'ara de la maniera mai factibla possibla. 

Imaginem doncas una Occitània independenta. Imaginem que dins los discorses occitanistas aja ganhat, non pas lo que vòl far creire que França poiriá cambiar (mentre que càmbia pas), mas lo que pensa -amb rason, a mon vejaire- qu'un estat bastit sus la destruccion de sos pòbles se'n pòt pentir subran, e qu'es mai probable que contunhe son òbra destruseira entrò la fin. Imaginem qu'aquel meteis discors occitanista aja capitat a convéncer la populacion occitana que França, ni mai Itàlia ni Espanha, aduiràn pas res als problèmas economics, politics, socials e environamentas, e que val mai de construire ensems un autre país, e tot aquò d'aitan mai que l'occitanisme independentista venceire serà arribat de persuadir los occitans e las occitanas que podèm recobrar lo prestigi de nòstra civilizacion perduda, que comencèt de s'unir a l'Edat Mejana abans las conquistas mai que mai francesas. Imaginem enfin qu'après un dur conflicte —es segur que França, Itàlia e Espanha se daissaràn pas tòrcer, coma es probable que Mónegue preferirà d'èsser un país per multimilionaris— Occitània existisca coma entitat politica independenta.

E ben, quina lenga parlarà? E mai se supausam un vam en favor de l'aprendissatge sistematic de la lenga nòstra, correlatiu al desir d'independéncia, es evident que la lenga nòstra es en situacion d'extrèma feblesa. Se pòt doncas pensar que la lenga dominanta seriá lo francés dins la màger part del territòri. L'Irlanda independenta a pas capitat a empachar la reculada constanta del gaelic, e l'independentisme catalan, malgrat una lenga pròpria mai fòrta socialament que la nòstra, se tròba obligat d'afrontar la poténcia sociala del castelhan. Tanben, estudiar una lenga significa pas de la parlar, e es tanben un desfís permanent pel catalanisme: mens de gents parlan cada jorn lo catalan que de personas que l'estúdian o lo sabon parlar. Tanben lo nacionalisme còrs emplega d'en primièr lo francés, e vesèm a espelir en Catalonha Nòrd un catalanisme mai que mai francofòn. 

E quin occitan parlariá l'Occitània independenta? S'i apond, d'efièch, una dificultat que nos es especifica. Se podèm considerar amb rason que totas las formas d'occitan fan partida de nòstra identitat nacionala, vesi pas, ara per ara, de constitucion d'una lenga nacionala referenciala qu'implique, qu'aquò nos agrade o non, una mena d'estandardizacion. Los occitanistas nos metèm pas pus d'acòrdi, fin finala volèm tostemps parlar nòstre occitan, e jamai lo dels autres, e l'estandardizacion pluricentrica, que permetriá de conciliar la realitat de la diversitat intèrna e lo projècte d'una unitat de país, es luènh de far lo consens qu'esperariái ieu. 

Per conclure, s'agís pas de vos desesperar mas de dire que devèm recobrar unitat d'accion e coeréncia se volèm bastir quicòm ensems.


abonar los amics de Jornalet

 



publicitat
BANER1: AOF



Comentaris

17 de febrièr 13.45h

Fa bel temps que se fa pas res per l'unificacion, la reconeissença e tot... Fòra per salvar las calendretas e las classas, per segur, una marcha a Paris mas que son devengudas las marchas d'anèm òc a Carcassona, Tolosa, Montpelhièr que fasian bolegar lo monde dins las carrièras e tocavan los curioses "franchimands" ? ..


Valora aquest comentari:   votar positiu 3   votar negatiu 0
Respondre comentari replica Comentari inadequat   Formulari d'abús de comentari

16 de febrièr 14.30h

La condicion necessària del sauvament d'una lenga es jà que siague aparada e promocionada per un estat. Condicion necessària mas ailàs pas sufisenta quand se constata lo cas irlandès. Maugrat la consciença identitària granda e la volontat afortida de las institucions estatalas per promoùre lo gaèlic, la lenga s'es totjorn pas recalivada. Alara qu'èra majoritàriament parlada fins al sègle 19 e que son existència en tant que lenga vertadièra e portaira d'una civilizac... Legir la seguida


Valora aquest comentari:   votar positiu 7   votar negatiu 0
Respondre comentari replica Comentari inadequat   Formulari d'abús de comentari

16 de febrièr 10.54h

Adiu,
Ieu tròbi qu'es bon de somiar un pauc. De tot biais cadun sòmia sa vida.. Uèi los joves somian d'America. I van e se cercan un endrech per se la jogar Steve Job! "Tots winners" e la moneda que cascaleja . Alara nosautres los esclafats de l'istòria, avèm plan lo drech d'imaginar una Occitània independenta.
Ai totjorn pensat qu'un occitan compreniá melhor son occitanitat defòra, à l'estrangièr.
Per exemple me soveni que al trabalh, à l'armada nos agradava melhor entre monde del m... Legir la seguida


Valora aquest comentari:   votar positiu 8   votar negatiu 0
Respondre comentari replica Comentari inadequat   Formulari d'abús de comentari

16 de febrièr 09.15h

#4 Dintra aqui filh meu, qu'as tanben trencat totes ligams amb la puta realitat !


Valora aquest comentari:   votar positiu 15   votar negatiu 4
Respondre comentari replica Comentari inadequat   Formulari d'abús de comentari

16 de febrièr 09.00h

Se cal pausar la question de la correlacion e de la causalitat: Territòri - Pòble - Lenga communa, dans un espaci de continuitat dels parlars populars istorics. E aquí dans le monde latin, o neolatin larg.


Valora aquest comentari:   votar positiu 0   votar negatiu 1
Respondre comentari replica Comentari inadequat   Formulari d'abús de comentari

16 de febrièr 08.45h

#1 e #2 Çò segur es qu'una Occitania independenta non serà complida se partissèm del fait que sembla sonque un sòmni. Segon punt, l'autor de l'article demanda d'aquela Occitania independenta : quina lenga parlarà ? E l'autor d'ajustar « Vesi pas, ara per ara, de constitucion d'una lenga nacionala referenciala qu'implique, qu'aquò nos agrade o non, una mena d'estandardizacion. » Mas tròbi aquela precision un pauc estomacanta. L'autor sap fòrt... Legir la seguida


Valora aquest comentari:   votar positiu 8   votar negatiu 16
Respondre comentari replica Comentari inadequat   Formulari d'abús de comentari

15 de febrièr 20.15h

Ben. Mas mèfi, ligur es la lenga d'un pòble, que tan la lenga coma lo pòble an desapareguts. E qu'anava fins al Ròse al mens e èran dins una zòna gròssa. Ligurian se pòt dire eventualament, o istoricament se disiá genovés. Lo darrièr tèrme me sembla melhor per evitar la confusion amb los estatjants de l'actuala regione italiana Ligúria. Qu'a pauc d'a veire exclusivament lingüisticament amb los antics ligurs prelatins.


Valora aquest comentari:   votar positiu 4   votar negatiu 1
Respondre comentari replica Comentari inadequat   Formulari d'abús de comentari

15 de febrièr 20.15h

Sens vos voler ofensar, quand partissètz del postulat d'una Occitània independenta jà nadatz en plena sciença-ficcion. Es coma partir del postulat que la reconquista d'Argeria pels pes-negres enfin restablits dins lors dreches, coma o dirian, seria eventualament possibla. O la constitucion d'una confederacion amerindiana sobeirana sus un terç dels actuals Estats Units. Una ucronia saique simpatica per certs nostalgics mas una ucronia. Un salut coral al mèstre del Naut Castèl o... Legir la seguida


Valora aquest comentari:   votar positiu 25   votar negatiu 8
Respondre comentari replica Comentari inadequat   Formulari d'abús de comentari

15 de febrièr 15.00h

"L'imaginacion al poder". De Cohn Bendit a Claudi Sicre totis o ensajèron un jorn. Ma fista, es totjorn plan de somiar un pauc !


Valora aquest comentari:   votar positiu 35   votar negatiu 6
Respondre comentari replica Comentari inadequat   Formulari d'abús de comentari

5 -10 -20 -tots
1




Comenta

Lo comentari es estat mandat corrèctament e es en espera de moderacion

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat
BANER3: Ràdio Occitània

Perfil

Gerard Joan Barceló

Gerard Joan Barceló logo rss

Lingüista, professor agregat de gramatica e director de la revista electronica universitària Lingüistica Occitana. President de l'associacion Los amics de Jornalet

mai d'informacions

contactar l'autor

Categorias

Las mai...


Mai d'articles

Archius




Etiquetas

D'autres articles


Jornalet, gaseta occitana d'informacions