CAPÇALERA2: IEA-AALO

Jornalet, gaseta occitana d'informacions

Dimenge, 16 de decembre

Gerard Joan Barceló

Dissabte, 15.9.2018 03h00

Jornalet: 3 meses per 3000€


Comentaris 19 comentaris    
Dolent Fluix Bo Molt bo Fabulós (16 vòtes)
carregant En cargament


Las informacions bancàrias e postalas dels Amics de Jornalet, pels legeires occitans de l'estat francés




Quand, fa quatre setmanas, escriviái un article que cridava a la mobilizacion generala per la premsa occitana, non imaginavi pas que la crida devenguèra mai concreta e sustot mai urgenta uèi. Laid temps per la premsa occitana, ara! Après lo barrament de La Setmana, que nos daissèt orfanèls a fòrça, es nòstre e vòstre solet quotidian occitan numeric, e solet quotidian tot cort, qu'es menaçat de clavar la botiga; e de la clavar abans 2019.

Farai una constatacion de bèl comprene: las caissas de Jornalet son voidas, e son director Ferriòl Macip Bonet, sens qui lo jornal pòt pas foncionar, es quasi sens ressorsas. En qual s'aprene? Lo retard enòrme de pagaments essencials a la vida de Jornalet e sustot a la vida de son director. M'entendretz plan, cresi: s'en causa de las caissas voidas de vòstre quotidian occitan Ferriòl Macip pòt pas pus viure corrèctament, val mai, de tot segur, qu'aqueste se cèrque un emplec que garentisca sa subrevivença de cada jorn. En d'autres mots, valdrà mai clavar Jornalet que sacrificar una persona.

Mas la fin de Jornalet, lo meteis an que la fin de La Setmana, seriá un desastre per la difusion normala de nòstra lenga encara injustament menaçada; e un autre còp que la nafrariá encara un pauc mai. Seriá una irreparabla reculada que non podètz pas imaginar, n'ai la certitud intima e prigonda.

L'associacion Los Amics de Jornalet o pòt pas acceptar. Malgrat las demandas de subvencions per ara sens nada responsa, nos resignam pas. Avèm doncas aguda l'idèa de cridar a un finançament participatiu d'urgéncia, e tant urgent qu'aqueste còp farem pas servir un micromecenatge normal, que podèm pas prene lo risc de pèrdre tota la soma se daveram pas çò que demandam. Volèm tanben limitar nòstras despensas. Pasmens, nos sembla legitim que sapiatz regularament l'evolucion del projècte. Avèm doncas creada una pagina Facebook, apelada "Jornalet: 3 meses per 3000€". La trobaretz sens mal amb un cercador d'Internet en picant "@jornaletsolidari". Almens cada setmana, la pagina farà lo bilanç dels dons recebuts, e ieu, coma publiqui cada setmana un article dins ma cronica d'opinion, vos n'assabentarai pereu sistematicament a la fin de cada publicacion miá.

Ja podèm mercejar los que de Catalonha e d'Occitània estant, an mandat quicòm tre qu'an sauput suls rets socials qu'alestissiam aquesta campanha, mas sèm encara tras que luènh dels 3000€ indispensables que cal amassar abans lo 15 de decembre. Alara cossí ajudar a vòstre jornal?

Se vivètz dins l'estat francés, podètz mandar un chèc o far un transferiment bancari als Amics de Jornalet, que, coma fasèm sistematicament, transferirem puèi totes los dons a Jornalet. Totas las informacions las traparetz sus la fòto qu'illustra mon article. Basta de clicar dessús per las aver totas. Mas se sètz residents dins l'estat espanhòl, o endacòm mai, bensai prefeririatz de donar via PayPal a l'ADÒC que gerís lo jornal occitan. En mai d'aquò, es possible de transferir vòstra contribucion sul compte de Jornalet.

Quina que siá vòstra causida, comptabilizarem del meteis biais vòstres dons. E totes seràn precioses perque totes nos donaràn l'espèr de poder contunhar.

Salvem Jornalet, comptam sus vosautres, e nos fisèm de vòstra solidaritat!

 


Donadas bancàrias:
 
La Banque Postale (Marselha)
IBAN: FR16 2004 1010 0912 8089 7Y03 009
Còde BIC: PSSTFRPPMON
Al nom de: Los Amics de Jornalet
 
Caixa d'Enginyers (Barcelona)
IBAN: ES79 3025 0001 1414 3339 8145
Còde BIC: CDENESBBXXX
Al nom de: Associacion entara Difusion d'Occitània en Catalonha
 


 



abonar los amics de Jornalet

 



publicitat
BANER1: IEA-AALO



Comentaris

20 de setembre 17.46h

Amics,

I a de causas que compreni pas
1) Cossí se fa que dins l'edicion de uèi de Jornalet i a pas un apèl a donar per sostenir lo jornal, lo nòstre sol quotidian ?
2) que lo monde se pausan encara de questions ! Doni? Doni pas? Val la pena de se brandir las pelhas? Cal pas, Jornalet crebarà o crebarà pas? Se ne cal trachar o se ne fotre coma de las borassas? Aquel questionament me fa venir baug , me farà vomitar ! La question es pas aquela ! Volem òc o non una premsa en occitan? PA... Legir la seguida


Valora aquest comentari:   votar positiu 4   votar negatiu 0
Respondre comentari replica Comentari inadequat   Formulari d'abús de comentari

19 de setembre 18.59h

#17 òc, ara fa dos ans que la region nòstra s'apèla "Occitanie", emai que se trobèt de mond per se'n regausir ! E ben la lenga e los mediàs d'òc i crèban en accelerat coma pas jamai. Cercatz l'error, pecaire !


Valora aquest comentari:   votar positiu 13   votar negatiu 1
Respondre comentari replica Comentari inadequat   Formulari d'abús de comentari

18 de setembre 07.44h

E l'OPLO de que fai ? S'acontenta de demorar braces crosats coma a son acostuma ? O de finançar un enièma prèmi literari escur qu'interèssa pas diguns levat sos companhs que lo tocaràn ? E la Delga, presidenta de la fòrça pauc occitanofila region que se fai sonar "Occitanie" ?


Valora aquest comentari:   votar positiu 26   votar negatiu 3
Respondre comentari replica Comentari inadequat   Formulari d'abús de comentari

17 de setembre 12.03h

#15 Adieu-siatz! Mercés per vòstras proposicions, mas Jornalet censura fòrça pauc. En realitat, quand un comentari obten mai de 20 poces roges que de poces verds, s'escond automaticament, mas lo legeire a totjorn la possibilitat de lo legir en clicant dessús. Es pas una censura mas una moderacion collectiva dels legeires.


Valora aquest comentari:   votar positiu 10   votar negatiu 4
Respondre comentari replica Comentari inadequat   Formulari d'abús de comentari

17 de setembre 11.03h

Avans que detalhe mas prepausicions...

Siái agut estat en desacòrdi emb dau ponch de vista defendut per certans opinants.
Mai d'una fes, m'an coflat las pocejadas rojas sans justificacions, amai la presença dals poces simplament.
Pro sovent, desaprove la causida de Jornalet d'escòndre, adonc de censurar, tau o tau comentari pretendut zenofòba e faissista, dau temps que d'autres comentaires atàcon violentament lo comentaire pretendut zenofòba e faissista.

Maugrat las diferenças d'opini... Legir la seguida


Valora aquest comentari:   votar positiu 15   votar negatiu 8
Respondre comentari replica Comentari inadequat   Formulari d'abús de comentari

17 de setembre 08.57h

#13 Jornalet se dèu trapar un modèl economic viable per fin d'evitar de boclatges d'annada anxiogènes.
Ajudaràm... Mais eh es possible de connóisser un budget-tipe equilibrat?
Emplecs (salaris, cargas generalas) e Ressorsas (dons (nombre X don mejan), subvencions), ventilat França/Espanha. Mais la còla redaccionala vòl benlèu èsser independenta d'ambe las doas associacions que fonccionan coma de caissas blosament financieiras despersonalizadas...
Donar, mais quant e quora? 10, 20, 3... Legir la seguida


Valora aquest comentari:   votar positiu 1   votar negatiu 0
Respondre comentari replica Comentari inadequat   Formulari d'abús de comentari

16 de setembre 20.37h

#12 E ben precisament, fa mestièr!

Es segur que nos agradariá de trobar un sistèma de compensacion per nòstres generoses donators, mas cossí far se las caissas son voidas?

Tanben es verai que caldriá trobar un supòrt per soscripcion, coma practica Vilaweb (mas amb un lectorat evidentament mai ample que lo nòstre). Veirem aquò quand aurem, çò espèri, superada aquela crisi grèva.

Cossí que siá, vos mercegi a totes e totas per vòstra solidaritat!


Valora aquest comentari:   votar positiu 5   votar negatiu 0
Respondre comentari replica Comentari inadequat   Formulari d'abús de comentari

16 de setembre 18.22h

Donarai se fa mestièr.

Mas partatgi l'avís de #10 .

E mai, torni parlar de https://www.patreon.com

Es un bon sistèma, qu'es democratic, transparent, internacional, e que permet de comunicar e de recampar lo monde.

Quitament se jornalet vòl demorar un jornal a gratís, permetriá de fargar e subretot d'engatjar una comunautat de mecènas que son prestes a sosténer lo jornal cada mes.

Demanda de temps, mas benlèu seriá un pas en da... Legir la seguida


Valora aquest comentari:   votar positiu 2   votar negatiu 0
Respondre comentari replica Comentari inadequat   Formulari d'abús de comentari

16 de setembre 06.35h

La situacion per la premsa ocitana es plan mai grèva que çò que cresiam.
Tòrni mandar una ajuda per corrièr. En esperant que Ferriòl pòsca butar son prètzfach encara de temps.


Valora aquest comentari:   votar positiu 11   votar negatiu 0
Respondre comentari replica Comentari inadequat   Formulari d'abús de comentari

15 de setembre 21.18h

Mon pichon vejaire...
Donar per donar, ara lo monde coma ieu, i sèm pas mai acostumats.
Amb los finançaments participatius e patin cofin, esperam quicòm en retorn de nòstra moneda.
Leguèri qu'al Japon las ventas de CD van ben perque enlà fican amb lo CD de bonús, un CD de mai, un libreton, de dessenhs, una pelucha, etc
E es vertat, ieu aimi ben aver quicòm de material :)


Valora aquest comentari:   votar positiu 8   votar negatiu 10
Respondre comentari replica Comentari inadequat   Formulari d'abús de comentari

5 -10 -20 -tots
1
-
2 >




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat
BANER 3 teveoc

Perfil

Gerard Joan Barceló

Gerard Joan Barceló logo rss

Lingüista, professor agregat de gramatica e director de la revista electronica universitària Lingüistica Occitana. President de l'associacion Los amics de Jornalet

mai d'informacions

contactar l'autor

Categorias

Las mai...

Mai d'articles

Archius




Etiquetas

D'autres articles


Jornalet, gaseta occitana d'informacions