CAPÇALERA: Eth Ligam occitan Youtube

Jornalet, gaseta occitana d'informacions

Diluns, 6 de julh

Gerard Joan Barceló

Dissabte, 11.1.2020 20h30

Un crestian e l'islam


Comentaris 4 comentaris    
Dolent Fluix Bo Molt bo Fabulós (6 vòtes)
carregant En cargament


La traduccion catalana de l'Alcoran




Etiquetas
Barceló, cristianisme, islam, jihadisme, patz, poder

Se, la setmana passada, vos parlèri dels dos cristianismes, lo del poder e lo de Jèsus, cresi oportun, bòrd que cada setmana soi convidat a donar mon opinion, de parlar de la religion que, probablament, provòca a l'ora d'ara mai de passions: l'islam.

Ja n'ausissi que me diràn que de musulmans secutan los crestians, e es verai qu'es complicat e mai perilhós per un crestian de practicar sa fe dins de païses coma l'Arabia Saudita, Argeria o Burkina Faso. Totun, per qui crei a la beutat del Presic de la Montanha, es sagrat d'aimar e de pregar per sos enemics, perque la fòrça de l'Esperit Sant pòt convertir quitament lo mai dur de totes los òmes, e a ieu me preocupa tant que de crestians sián secutats coma que de crestians pòscan èsser secutaires, çò qu'es agut arribat, e arriba encara en aquestes tempses.

D'unes m'acusaràn d'èsser ninòi envèrs lo jihadisme, mas ne denonciarai los crimes, amb la consciéncia que quina cresença que siá pòt menar al fanatisme. En Corèa del Nòrd, i a un fanatisme atèu que secuta los cresents; en Índia un fanatisme politeïsta; en China los oigors musulmans son violentament reprimits per un regim totalitari sens Dieu. Me pensi que bensai l'agnosticisme solet, indiferéncia envèrs çò religiós, pòt pas produire d'actituds fanaticas: cossí impausar als autres sos dobtes?

D'autres recastenaràn a l'islam l'expansionisme, lo mesprètz de la femna, l'omofobia, la mesfisança envèrs la sciéncia, l'impossibilitat de pensar la laïcitat o l'adoracion d'un libre que sa lectura critica seriá impossibla coma paraula divina etèrna, e auràn rason. Mas lor respostarai que tot aquò a tanben existit e existís encara en qualques formas de cristianisme. I a de glèisas qu'utilizan de versets misogins de Pau per refusar a las femnas lo drech de presicar pendent un culte; lo catolicisme e l'ortodoxia rebutan lo sacerdòci femenin; de crestians manifestèron per carrièras contra la dobertura del maridatge als omosexuals; durant de longs sègles la Glèisa e l'Estat se podián pas separar; la conquista d'America foguèt pereu religiosa; se desvolopa un protestantisme fondamentalista pel qual cada verset de la Bíblia es paraula intocabla de Dieu. Ma lista es de mal acabar, e la completaretz se volètz: es lo cristianisme del poder coma, tròp sovent, i a un islam del poder.

Sostendrai doncas los que, cresents o non, vòlon viure liures dins un país musulman coma los qu'o vòlon en Euròpa, e encoratjarai los musulmans que cèrquen un aprigondiment esperital compatible amb totas las exigéncias de la dignitat umana. Coma mon crestianisme a la cara de Jèsus que parlava amb los romans politeïstas coma amb los samaritans enemics dels jusieus, en legissent per exemple l'excellenta traduccion catalana de l'Alcoran, me recordarai del verset: "Aüroses los qu’òbran per la patz perque lor diràn filhs de Dieu" (Matieu 5:9).

abonar los amics de Jornalet



publicitat
BANER1: AOF



Comentaris

14 de genièr 16.23h

#2 Tota religion revelada e escrita es potencialament totalitària. Se decidissi de creire que çò escrit dins un libre es LA vertat, que siá una constitucion d'estat o un libre de contes e legendas, pas pus mejan per tu de defendre quin autre escrit que siá. Lo mieu ven de Dieu, torna a Dieu, e tot çò mai ven implicitament diabolic. O ven explicitament tre qu'es vengut per ieu lo moment d'impausar MA vertat per la fòrça.

La soleta (e freula) diferéncia se fa se ma religion del Libre n... Legir la seguida


Valora aquest comentari:   votar positiu 14   votar negatiu 1
Respondre comentari replica Comentari inadequat   Formulari d'abús de comentari

14 de genièr 01.09h

L'isteria dels predicators evangelistas americans o brasilians a vertadièrament res a enviejar a n aquela dels mollahs islamistas o salafistas d'Iran o d'Arabia. An totis Dieu de lor costat e gara se vos avisatz de ne dobtar !


Valora aquest comentari:   votar positiu 20   votar negatiu 3
Respondre comentari replica Comentari inadequat   Formulari d'abús de comentari

13 de genièr 12.56h

Lo crestianisme es ni mai ni mens totalitari que l'islam e se ara es vengut mai tolerent qu'abans es costrench e forçat perque a completament perdut lo poder coercitiu que tenia sus la societat occidentala e qu'a pas pus los mejans de son intolerencia. Coma un dictator vengut vièlh, malaut e impotent que descobriria oportunadament las vertuts de la tolerancia fàcia a un autre dictator que l'ensucarà lèu o tard. Veire la sècta de Torquemada, Innocent 3 e l'Opus Dei ensajar de nos faire eng... Legir la seguida


Valora aquest comentari:   votar positiu 28   votar negatiu 12
Respondre comentari replica Comentari inadequat   Formulari d'abús de comentari

12 de genièr 19.20h

Per començar me cal precisar que presiqui pas per ma capèla : siái agnostique.
Me sembla curiós de voler metre sul même plan una religion coma lo cristianisme e una ideologia politicoreligiosa coma l’islam. Cal pas confondre las derivas d’una institucion (la Glèisa) ambe las prescripcions del Coran.
Dins L’Evangèli i a pas ren contra las femnas (Que lo qu’a pas jamai pecat li jète la primièra pèira.). Es pas un azard se los primièrs crestians siaguèron, coma Blandina, de fe... Legir la seguida


Valora aquest comentari:   votar positiu 16   votar negatiu 9
Respondre comentari replica Comentari inadequat   Formulari d'abús de comentari

5 -10 -20 -tots
1




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat
BANER3: Ràdio Occitània

Perfil

Gerard Joan Barceló

Gerard Joan Barceló logo rss

Lingüista, professor agregat de gramatica e director de la revista electronica universitària Lingüistica Occitana. President de l'associacion Los amics de Jornalet

mai d'informacions

contactar l'autor

Categorias

Las mai...


Mai d'articles

Archius




Etiquetas

D'autres articles


Jornalet, gaseta occitana d'informacions