CAPÇALERA: CONGRÉS AMIC
CAPÇALERA2: FAI-TE SOCI

Jornalet, gaseta occitana d'informacions

Dimècres, 23 d'octòbre

Marçal Girbau

Dijòus, 5.7.2012 03h00

Sèm e serem: tres ans d'escambis militants occitano-catalans


Comentaris 11 comentaris    
Dolent Fluix Bo Molt bo Fabulós (18 vòtes)
carregant En cargament


Concèrt Feliu Ventura 30 de junh 2012, Ostal d'Occitània
© GBoada




Etiquetas
girbau, sèm e serem

Uèi, deman e dissabte seràn los jorns "fòrts" de la tresena edicion del Festival occitano-catalan Sèm e serem, de Tolosa. Uèi, lo dijòus, a partir de 20h30, se la pluèja non nos empacha, se farà una fèsta partejada amb lo Festival d'art contemporanenc Courtoisie, dins la cort de l'Ostal de Roqueta, al barri dels Carmes. Après, anirem totes amassa a l'Estanquet de la Portièra, amb los amics Rafèu Sichèl e Xavier Rota, que nos ofriràn a partir de 22h30, una scèna obèrta occitano-catalana per acabar la serada coma cal. Serà quicòm de plan especial, de poder veire aqueste occitan (lo Rafèu) que coneis plan la tradicion catalana, amb lo sieu amic catalan (Xavier Rota) que coneis tanben plan la tradicion occitana, de jogar lo fuòc crosat, acompanhats de totes aqueles mondins que voldretz venir jogar amb eles. Venètz nombroses, doncas, e amb los vòstres instruments! O farem tot petar!
 
Lo divendres e lo dissabte, sus la Plaça Naut Bernat, a partir de 20h i aurà doas seradas de fèsta populara. Aurem los concèrts de grops del país coma Rachid Benallaoua (d'Origines Contrôlées) e Mauresca Fracàs Dub. Aurem tanben de musicians catalans coma Estúpida Erikah, e aurem quitament lo concèrt d'Ò.K! Brigada Internacionala, lo recampament musical d'artistas occitans e catalans, coma Gigi de Nissa dels Nux Vomica, l'Stefano de Lou Seriol, e los catalans Carles Belda, Marc Serrats, Jordi Palau d'Orxata Sound System, entre d'autres. Ò.K! Brigada Internacionala es la concrecion dels acòrds de cooperacion entre los festivals Estivada de Rodés, Barnasants e Sèm e serem. Sens aquesta cooperacion dels tres festivals, aqueste espectacle non seriá estat possible. Lo dissabte, a prepaus, tanben aurem de suspresas plan risolièras, amb la participacion de convidats fòrça especials coma lo Rafèu Sichèl que benlèu nos voldrà jogar qualque borrèia, e lo Ferriòl Macip, que vendrà far de cançon improvisada, mentre la Brigada jòga de bons caulets.    
 
Mas lo festival comencèt ara fa ja una setmana. Dijòus passat, a l'Ostal d'Occitània, aguèrem l'Ester Formosa & l'Adolfo Osta que nos ofriguèron las cançons d'autors plan coneguts, jogadas d'un autre punt de vista. Poguèrem ausir, per exemple, las cançons de "Par la fenêtre" e "Lo gavian" dels Moussu T, cantadas doçament en catalan per aqueste duo magnific. E aguèrem tanben l'amic Primaël, lo jove cantaire tolosan que lo Festival sèm e serem convençuts que serà una de las nòvas voses de referéncia de la musica occitana. Lo sieu bèl cant va de la man de tèxtes poetics plan engatjats. Non es gaire abitual, dins lo mitan artistic, de trobar d'artistas que sián prigondament interessants al nivèl musical e al nivèl literari e social a l'encòp, se ben aquò's justament un dels elements mai caracteristics de la tradicion dels trobadors: la bona musica que se fa acompanhada dels melhors tèxtes; de bons tèxtes acompanhats de la melhor de las musicas . 
 
Musica i Lletra es, precisament, lo títol del remirable nòu disc del valencian Feliu Ventura, que dissabte passèt per Tolosa e lo pati de l'Ostal d'Occitània èra plen plen per escotar aqueste cantaire valencian, abans d'anar cap a l'Estivada de Rodés lo 28 de julh. Joguèt amassa amb un autre catalan, l'Albert Freixas, un sabadellenc conegut per èsser lo guitarrista del grop Ix! e qu'ongan a publicat lo sieu primièr disc de cançons, [U]: exquisit lo disc, e extraordinari lo concèrt! E non vòli oblidar l'amic Djé Balèti amb lo sieu trio de cançons niçardas, ni tanpauc lo jove catalan Cesk Freixas, que presentèt lo disc Tocats pel foc qu'acaba de publicar, un album, a prepaus, que ne soi amorós coma tot e soi segur que se l'escotatz vosautres tanben tombaretz amoroses cop sec. 
 
Après tres ans me sembla que podèm dire que se Sèm e serem non existiguèsse, lo caldriá inventar. Uèi, lo Festival Sèm e serem es vengut la granda pòrta d'intrada dels artistas catalans a Tolosa, e, a l'inrevés, la pòrta d'intrada de la cançon occitana en Catalonha. E aquò es estat mercés al trabalh de tot aqueste temps e, tanben, dels partenaris de Barnasants e Estivada de Rodés. Ara çò que caldriá es que cèrtas collectivitats e administracions del costat occitan e del costat catalan se n'apercebèssen, tanben. Vos boti un exemple: malgrat èsser lo festival que programa mai de musica catalana –e de melhor qualitat e reconeissença professionala– dins la vila de Tolosa, l'Institut Ramon Llull non a volgut sosténer encara aquesta iniciativa de manièra clara. Per qué? Voldriái pensar qu'es per rasons de "restriccion budgetària". Tant de bon..!



publicitat
BANER1-2-3: DGPL TRADUCTOR



Comentaris

6 de julh 19.13h

#5 : tornarai prene lo Bourdon. Se te passejas un pauc dins lei comentaris de sits coma lemonde o Rue89, veiràs que l'a una grossa part de comentaris que son aici solament per corregir lo francés dei redactors.

Per tornar sus lo fons de l'article, polit eveniment, s'amerita de viatjar un pauc demieg Occitània. Nautres fasiam lo festenau dei lengas de mediterranèa e aviam agut la visita d'una brava part dei gropes catalans presentats aici. Valon la pena de leis anar veire, d'efiech, e l'enc... Legir la seguida


Valora aquest comentari:   votar positiu 10   votar negatiu 4
Respondre comentari replica Comentari inadequat   Formulari d'abús de comentari

6 de julh 15.43h

Èi legit lo libe de Stéphane Guillon, dens lo quau recampa las soas cronicas a France Inter. Sembla èster tanben, coma cada persona que s'exprimís en public, ciblat per los ayatollahs de la lenga pura. Totun, eth (e los autes, solide), s'en rend compte sonque los jorns caumats, quan los que l'escotan d'acostuma (e lo critican sus sas provocacions) son au lheit, e que damoran sonque los ayatollahs. En Occitània, cada jorn es caumat ! Los que critican sus lo hons son pas enqüèra pro numer... Legir la seguida


Valora aquest comentari:   votar positiu 4   votar negatiu 2
Respondre comentari replica Comentari inadequat   Formulari d'abús de comentari

5 de julh 21.41h

#6 Pr'amor, probable, de nòstra inseguretat lingüistic, reagissèm tròp ais articles que parlan de la lenga, e pas pron a aquelei, pasmens nombrós, consacrats a l'actualitat ò a de tematicas socialas e economicas.


Valora aquest comentari:   votar positiu 5   votar negatiu 2
Respondre comentari replica Comentari inadequat   Formulari d'abús de comentari

5 de julh 20.51h

#7 Cresi que i a tanben dins certanei reaccions un anticatalanisme d'aitant mai desconvenent qu'es gràcia a de catalans apassionats per nòstrei lenga e cultura qu'avèm un jornau electronic coma Jornalet !


Valora aquest comentari:   votar positiu 9   votar negatiu 3
Respondre comentari replica Comentari inadequat   Formulari d'abús de comentari

5 de julh 20.02h

#5 e #6 Si disi qu'er article de Girbau ei shens interès, n'ei pas entà har un tribalh de "critica sistematica i quasi d'insultas", mes per'mor que pensi qu'ei un article shens interès. Que Girbau escrívie benevòlament ací e voleré díser qu'avem a trobar tot çò qui escriu hèra bon ?

#5 Ne sèi pas si leges sovent "Le Monde" mes per lege'u en linha, que't poish díser que monde qui's planhen deras fautas i las comentan, que n'i a tanben.


Valora aquest comentari:   votar positiu 1   votar negatiu 3
Respondre comentari replica Comentari inadequat   Formulari d'abús de comentari

5 de julh 19.30h

#5 B'as plan arrason!! Eth trabalh sus Jornalet ei completaments benevòl, e fin finau mos hartaram toti de trabalhar entad arren.

Qu'è era sensacion que quan mòstri era lua, era gent que guarde eth det.

Es critiques, quan son constructiues son planvengudes, mès que mès se son entà melhorar. Es opinions, favorablas, o non, son çò de mielhor qu'a aguest mèdia.

Çò de piéger peth nòste trabalh, ei quan as era sensacion qu'eth legeire se'n fot deth contengut der article e sonque i ce... Legir la seguida


Valora aquest comentari:   votar positiu 23   votar negatiu 2
Respondre comentari replica Comentari inadequat   Formulari d'abús de comentari

5 de julh 18.52h

Ai l'impression que dempuèi qualques temps los articles d'unes que i a son l'objècte de criticas sistematicas e sovent pas gaire fondadas, mas sustot de criticas que ara venon gaireben insultas. L'escambi d'idèa, òc, mas receure insultas per mostrar qual ten la mai gròssa, aquò es pas admissible.

Las 4 o 5 meteissas personas que se creson superiorament inteligentas per se permetre de far un trabalh de sapa permanent se reconeisseràn sens cap de dobte.

La critica es aisida mas escrivon ... Legir la seguida


Valora aquest comentari:   votar positiu 14   votar negatiu 7
Respondre comentari replica Comentari inadequat   Formulari d'abús de comentari

5 de julh 13.37h

Un article shens interès.


Valora aquest comentari:   votar positiu 5   votar negatiu 7
Respondre comentari replica Comentari inadequat   Formulari d'abús de comentari

5 de julh 11.00h

Te'n fagas pas, mon car Marçau : per motiu de reduccions budgetàrias, desumanisarián la tèrra tota, la sagatarián, l'arroïnarián. Alara, vai pensar ! Un festenau tengut per de jovents ! Coratge, e plan grand mercés per una programacion entau !


Valora aquest comentari:   votar positiu 5   votar negatiu 4
Respondre comentari replica Comentari inadequat   Formulari d'abús de comentari

5 de julh 09.58h

#1 Era seccion de Girbau ei tostemp estada publicitat


Valora aquest comentari:   votar positiu 8   votar negatiu 1
Respondre comentari replica Comentari inadequat   Formulari d'abús de comentari

5 -10 -20 -tots
1
-
2 >




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat
BANER1-2-3: DGPL DICTADES

Perfil

Marçal Girbau

Marçal Girbau logo rss

Filològ e promotor cultural, especializat sus las relacions occitano-catalanas.

mai d'informacions

contactar l'autor

Mai d'articles

Archius




D'autres articles


Jornalet, gaseta occitana d'informacions