Bandièra01 1180x150: Comuna de Tolosa

Opinion

La Primada de Montsegur

Marçal Girbau

Marçal Girbau

Filològ e promotor cultural, especializat sus las relacions occitano-catalanas.

Mai d’informacions
Dissabte que ven se debanarà la segonda edicion de la Primada de Montsegur. Serà lo 16 de març, es a dire, lo jorn dels cremats. Ditz l’istòria qu’en 1243 los crosats comencèron un sètge infernal sus Montsegur, qu’èra lo darrièr reducte catar, amb una armada de mai de 6000 òmes per una populacion de 500 personas. Lo sètge durèt gaireben un an e un còp vencèron los intolerants, lo 16 de març de 1244, los crosats aluquèron un grand fòc al pè del castèl per i cremar en vida las 210 personas que non acceptèron de renonciar a lor fe.
 
Quina melhora manièra, alavetz, de commerorar aquel jorn de l’intolerància, de la mòrt e de la paur, qu’en fasent una fèsta de la tolerància, de la vida e de la prima? A ieu me sembla una excellenta idèa per combinar l’objectiu de remembrar l’istòria –cal tostemps remembrar lo passat, dison, per èsser conscients del present e del futur– amb l’objectiu de presentar çò que se passèt a Montsegur non pas coma una question religiosa mas coma una question plan actuala: lo debat de la tolerància e de la convivéncia.
 
D’artistas coma Eric Fraj e Guillaume Lopez vendràn nos ofrir lor musica. De conferenciants com Alem Surre-Garcia e Bertran de la Farge i seràn per nos explicar l’importància de la tolerància dins la nòstra societat: la tolerància religiosa, la tolerància culturala, la tolerància lingüistica... Aurem tanben Fabrice Chambon e André Cseski que nos faràn una presentacion sul castèl catar de Montsegur. Los bodegaires de l’amic Bacabe tanben i passaràn. E aurem quitament un pichòt mercat amb de produits locals ariegeses e occitans: de vin, de mangiscla, d’artesans, etc.
 
Solide, coma tota fèsta occitana, l’acabarem amb un balèti occitan amb lo grop ariegés Aigarèla, que nos farà dançar de borrèias, de masurcàs, de sauts, e tot çò que voldretz fins plan intrada la nuèit.
 
Lo prètz? Tot a gratis! Bona Primada de Montsegur.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Batko
1.

I serèm ! Solide !!

  • 0
  • 0

Escriu un comentari sus aqueste article