CAPCALERA: la botiga

Jornalet, gaseta occitana d'informacions

Dimècres, 21 d'abril

Marçal Girbau

Dijòus, 28.3.2013 03h00

De la tendresa a l’amor


Comentaris 3 comentaris    
Dolent Fluix Bo Molt bo Fabulós (10 vòtes)
carregant En cargament


Òc, que lo papa parle de tendresa pòt semblar excepcional. E d’amor, tanben. Benlèu la sola causa en comun entre l’amor e Dieu es que las doas causas, se son vertadièras, son eternalas. Soi d’acòrdi amb lo collèga Eric Rolet quand ditz que uèi sèm dins una societat que forabandís l’amor e la tendresa. Mai qu’aquò. Vivèm dins una societat que ridiculiza l’amor vertadièr, aquò’s, l’eternal. L’amor vertadièr es associat a un hippisme lord e marginal. Lo que defend l’amor es un loser dels temps modèrnes.

En fait, fa ja longtemps que dins la nòstra societat occidentala avèm assumit l’idèa que lo “fins que l’amor nos separe” non existís e, s’existís, es una tortura, una manca de libertat: los esclaus de l’amor. N’i a qu’o dison obèrtament. N’i a qu’o dison en bas, entre los amics intimes perque non se diga qu’o pensan. Mas la realitat es que dins las nòstras tèstas s’es installada la concepcion que l’amor es, per definicion, quicòm que s’acaba. E que los que non i son d’acòrdi son d’ingenus o d’ultracatolics conservators.

E non solament aquò. Dins la nòstra societat s’es installada l’idèa que l’amor va e ven, qu’es quicòm de “natural” que passa coma una malautiá, coma los paures d’esperit que pensan que l’inspiracion artistica arriba perque la musa pren lo poèta e li fa escriure de vèrses qu’ela canta. Ieu o diriái d’un autre biais: sèm dins una societat de fenhasses qu’an la canha de prendre la vida amb las doas mans! L’amor, coma disiá Picasso per l’inspiracion, arriba en tot trabalhant. E aquí, coma pels negòcis, i a los que vòlon trabalhar e los que non. Mas dins la nòstra societat, se l’esfòrç pel trabalh e pel saber es quicòm que cotiza per la zòna baissa, lo trabalh e l’esfòrç per la vida amorosa es dirèctament quicòm sonque de qualques freaks.

L’amor tanben es esfòrç. L’amor tanben es trabalh. E la tendresa es una de las manièras de trabalhar l’amor. Balhar, donar, semenar, sens esperar res après. Donar encara mai. Que quand las causas non marchen pro ben i aja la volontat de seguir endavant. Que siam convençuts que tot se pòt adobar. E qu’o volgam adobar. Aquò’s l’amor.

Lo demai, de pegueriás de los que dison saber viure.



publicitat
BANNER1: IEO Arièja



Comentaris

28 de març 09.21h

un artcle a contra-corrent qu'ei plen de sens, tot cargat de sens, emai de sentiments, vai a l'encontre dau relativisme de nostra societat, tot ei parier, tot se vau, l'eternitat es una leca, la derision e l'enveja de valors seguras, e l'esforç es devaluat,mai repapiem pas mai e cerquem de vias novèlas : sur des pensers nouveaux, faisons des vers antiques


Valora aquest comentari:   votar positiu 1   votar negatiu 0
Respondre comentari replica Comentari inadequat   Formulari d'abús de comentari

28 de març 08.19h

De l'amor que va e ven, pensi pas qu'aquò tenga res a veire amb la societat.

Es sonque una realitat de la natura umana que los amors naisson, vivon e de còps se morisson, e de còps tòrnan nàisser.

La règla en amor es que i a pas cap de règla.

"Que lo pan burrat es pas noiridura e que l'amor es pas asirança, es tot çò que sabi pel moment del pan burrat e de l'amor". J. H. Wessel


Valora aquest comentari:   votar positiu 8   votar negatiu 4
Respondre comentari replica Comentari inadequat   Formulari d'abús de comentari

28 de març 08.18h

Un bèth article Marçal ! Que hè de ben d'entender que n'i a pas sonque la corsa a la productivitat, a la performança, a l'excellençia !
signat : Una amorasa qu'at canta.


Valora aquest comentari:   votar positiu 2   votar negatiu 0
Respondre comentari replica Comentari inadequat   Formulari d'abús de comentari

5 -10 -20 -tots
1




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat
BANER3: Ràdio Occitània

Perfil

Marçal Girbau

Marçal Girbau logo rss

Filològ e promotor cultural, especializat sus las relacions occitano-catalanas.

mai d'informacions

contactar l'autor

Mai d'articles

Archius




D'autres articles


Jornalet, gaseta occitana d'informacions