Bandièra01 1180x150: Comuna de Tolosa

Opinion

L’utilitat de las manifestacions del Primièr de mai

Marçal Girbau

Marçal Girbau

Filològ e promotor cultural, especializat sus las relacions occitano-catalanas.

Mai d’informacions
Soi de los que pensan que las manifestacions socialas son encara una de las aisinas que los ciutadans d’un sistèma democratic an per amor d’exprimir lors volontats socialas e politicas. Pensi, donc, que las manifestacions pòdon aver encara una cèrta utilitat e pòdon far cambiar de decisions politicas presas per un govèrn, o engatjar lo govèrn a prendre cèrtas decisions.
 
Per exemple, pendent las annadas 2003 e 2004, de milions de personas sortiguèron sus las carrièras de tot lo Mond per exprimir qu’èran contra la guèrra en Irak senhorejada pels mandataris Blair, Bush Berlusconi e Aznar. Soi segur qu’aquestas manifestacions faguèron una contribuicion importanta al cambiament del poder politic a l’Estat espanhòl, e, donc, a la victòria del candidat socialista Zapatero.
 
Un autre exemple mai clar per mostrar que las manifestacions pòdon èsser utilas e pòdon cambiar lo posicionament d’un govèrn es la manifestacion de l’11 de setembre passat a Barcelona, que serviguèt per que lo President de la Generalitat Artur Mas decidiguèsse d’avançar la convocacion de las eleccions per demandar al pòble de Catalonha se voliá que lo govèrn catalan convoquèsse un referendum independentista.
 
D’exemples coma aquestes ne podrem trobar dins totes los païses democratics. La question, pasmens, que nos devèm pausar a l’ora d’ara es a prepaus de l’utilitat de las manifestacions “de tradicion” o “d’anniversari”. Parli, per exemple, de las manifestacions del Primièr de mai qu’aguèrem ièr sus las carrièrars de la màger part dels estats europèus. Mas poiriái tanben parlar de las manifestacions de cada 8 de març per l’egalitat òme-femna, o las “gay-pride” de cada annada. Quina es l’utilitat o l’influéncia d’una manifestacion annualament previsibla? Que cambiarà las manifestacions d’ièr? Provocaràn qualque engatjament de qualque govèrn per far qualque cambiament?
 
Pensi qu’un dels requisits capitals per qu’una manifestacion aja qualque incidéncia sociala es que siá espontanèa e estonanta pels governants. Dit aquò, es plan d’aver lo Primièr de mai per festejar lo jorn de l’emplegat. Mas, per exemple, l’an que ven que lo Primièr de mai tombarà en dijòus, benlèu seriá francament mai util, estonant e interessant que las manifestacions del Primièr de mai s’organizèssen lo divendres –2 de mai– acompanhadas d’una jornada de cauma coma cal. Pecaires, almens aital los emplegats auriam un magnific pont de 4 jorns de repaus!

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Lutz
5.

Benlèu pòt esser, aquel aniversari, l'escasença de soscar a la nocion de trabalh ?
Aqueste primièr de mai, èri per carrière per promòure lo revengut de basa. Per acompanhar la fin anonciada del tot-salariat… :)

  • 3
  • 0
Jan de Marensin Sent Martin
4.

La maiada, aquerò qu'ei ua hèsta qui hè partida de la tradicion nosta. Que deu estar fòrça tròp gascona tà que sia hestejada o simplament mencionada peu jornalet. Cachafuòc e tretze dessèrts, òc, maiada, non! Gascons, deishudatz-vos!

  • 2
  • 3
Batko
3.

Pòt pes estar los dus a l'encòp. Ei lo Petain qu'a recupérat ua hèsta en memòria de las victimas anarquistas de l'acarament de Haymarket Square a Chicago en 1886. Après, qu'ei la familha "Los Pens" qu'a recuperat la data entà pausar ua garba au pè d'ua eroïna imaginària de la mitologia franchimanda.

  • 5
  • 1
pessamessa siverga 84400
2.

en mai d'ésser una fèsta anarquista, lo primier de mai es una fèsta pètainista, perqué me sembla que coma la fèsta dei maires (e aqui ne siàu segur) foguèt instaurada pèr lo govèrn de Vichy (travail, famille patrie)mai de cops que i a la memoria me traïsse.. Verificatz

  • 2
  • 3
Batko
1.

Lo purmèr de mai ei la sola hesta d'origina anarquista, doncas guardarèm lo Purmèr de Mai !
N'ei pas utile, ua hèsta n'ei pas utila, ei ua hèsta. Ei lo parat d'encontrar amics perduts de vista (soi seriós) e de's balhar novèlas.

  • 2
  • 1

Escriu un comentari sus aqueste article