Bandièra01 1180x150: Comuna de Tolosa

Opinion

Un enarc exemplar (I)

François Asselineau
François Asselineau
Marçal Girbau

Marçal Girbau

Filològ e promotor cultural, especializat sus las relacions occitano-catalanas.

Mai d’informacions
L’anticatalanisme que trobam dins lo mitan occitanista es talament afliegent coma la desconeissença que trobam en Catalonha a prepaus de l’importància de l’Euroregion pels territòris catalans e occitans. N’i a que pensan qu’Occitània non a res a fotre amb Catalonha e que sèm dos pòbles diferents. E n’i a que pensan que las euroregions non an cap d’utilitat. Paures d’esperit, los unes e los autres.
 
Curiosament, ont òc qu’an plan comprés tot d’un còp de qué es aquò de las euroregions e lors perilhs relacionats amb Catalonha e l’occitanisme, es a París. A Madrid non comprenon jamai res de res abans tres sègles.

La pròva incontestabla qu’a París o an plan capit nos la dona l’actual Inspector General de las Finanças francés, François Asselineau, pendent d’annadas adjunt de diferents govèrns conservators franceses. Asselineau se passeja per las franças en presicant contra lo procès d’independéncia de Catalonha e... contra las euroregions! Coma se foguèsse la tresena crosada, jol títol “Las euroregions: anam daissar destrusir França?”, aqueste enarc parisenc, qu’en 2012 aguèt l’intencion de se presentar coma candidat de las eleccions presidencialas, bastís un discors que va contra Catalonha e contra l’Euroregion perque, segon el, çò que vertadièrament se vòl non es pas bastir l’Union Europèa, mas d’afeblir los Estats-Nacion coma França e Espanha fins los escafar. Cap de mencion al desvolopament estrategic de l’Arc Mediterranenc coma pòl logistic d’Euròpa. Cap de mencion a las prigondas possibilitats de bastir un clustèr economic e de recèrca d’escala euroregionala sus aqueste territòri. Evidentament, se mencionèsse tot aquò li caldriá reconèisser que la vertadièra paur d’aqueste enarc es qu’arribe lo jorn que Tolosa e Montpelhièr non ajan pus besonh de París, ni de trabalhar amb o per París, mas per Barcelona.
 
E digatz-me, s’un Inspector General de las Finanças, consacra lo sieu temps a realizar de conferéncias publicas sens cap de vergonha, ¿qual se pòt creire a debon qu’en intèrn totas aquestas idèas sián un pensament minoritari entre los nauts comandaments franceses?



Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Ali Verd Bram
10.

Sabi pas, ieu, se « la vertadièra paur d’aqueste enarc es qu’arribe lo jorn que Tolosa e Montpelhièr non ajan pus besonh de París, ni de trabalhar amb o per París, mas per Barcelona. » Mas aquò's asseguradament lo mieu espèr ! E a plan rason d'aver páur, l'ariscle encarvatat, ja qu'es exactament çò mai logic e geograficament natural. Sens parlar de las afinitats culturalas electivas…

  • 10
  • 1
Ernèst Guevara Jr. L'Avana
9.

« Allons-nous laisser les euro-régions détruire la nation ? » La question es plan mal pausada, coma de costuma. La bona question seriá fin finala : « Allons-nous laisser les euro-régions reconstruire les nation que l'impérailisme français xénophobe a délibérément tenté de détruire ? »

  • 13
  • 1
Lutz
8.

E ben, cresiái pas legir un jorn quicòm sus Asselineau aquí ! :D

«segon el, çò que vertadièrament se vòl non es pas bastir l’Union Europèa, mas d’afeblir los Estats-Nacion coma França e Espanha fins los escafar» >> segon el tanben, l'Union Europènca es un complòt estatsunenc, e l'eurò tanben, per gardar lor dominacion monetària. Çò qu'es falç, l'eurò èra a dus dets abans la crisi de prene la plaça dels petrodollars per lo comerçi mondial d'idocarburas.

Quora vesi d'amics d'esquèrra escotar aquel tipe e venir UPR… oO

  • 9
  • 2
Tristan Gahús Sarlamaleicom
7.

#6 Ah, espèra, vau ensajar quauquarren :

"Totes los Marçal Girbau fan de generalitats."

A veire se lo paradòxe fa plantar la maquina, sabèm jamai...

  • 15
  • 4
Mathieu Castel Marselha
6.

#5 Es çò que me pensèri... Sabi pas m'onte l'es anat pescar aquel "anticatalanisme deis occitanistas".

Paureis occitanistas ! Per d'unei son tròp catalanistas, per d'autres son anticatalanistas... Se lei gents arrestavan de far de generalitats de son cas personau, bessai qu'aquesteis analisis de cepon de tavèrna nos serián espranhadas !

  • 26
  • 1

Escriu un comentari sus aqueste article