Bandièra01 1180x150: Comuna de Tolosa

Opinion

François Hollande e “l’estrategia”

François Hollande
François Hollande
Marçal Girbau

Marçal Girbau

Filològ e promotor cultural, especializat sus las relacions occitano-catalanas.

Mai d’informacions
Dison que François Hollande es a patir la siá pròpria malautiá. Ieu apondriái qu’es un dels problèmas mai comuns de la politica: la plan marrida gestion dels equilibris. Hollande, lo trapezista. Es aquel desir putanièr e caluc de voler far plaser a tot lo mond. Es aquela tissa de dire los mots que cal als unes e, puèi, los mots contraris als autres. Es aquel lengatge plen d’ambigüitats tostemps calculadas per tal de non metre en perilh la supausada posicion de centralitat ont totes les “bons ciutadans de la Republica s’i tròbon”. Es aquela ambicion tan mediòcra de voler ganhar lo jòc mas non pas pels merits pròpris mas per las errors de l’autre. Es aquel esperar que l’autre faga una petita fauta per sautar dessús.
 
Lo President François Hollande a cap d’estrategia? N’a una? N’a divèrsas de parallèlas? N’a una de publica e una autra de secreta? La secreta non es pus secreta? Non n’a cap? Qual es capable de comprene las decisions d’Hollande? Lo President socialista vòl devenir una mena de Mitterrand 2.0?
 
Lèu-lèu arribaràn las municipalas e çò mai probable, se gaitam los sondatges, es que lo Partit Socialista recule fòrça especialament dins cèrtas ciutats importantas de França, çò que pòt provocar aisidament que perda lo govèrn. Podriam pensar que lo debat municipal es independent del debat nacional –aparentament mai ideologic–, mas la realitat es qu’al cap de qualques setmanas i aurà las eleccions europèas, ont se pòt comptar que lo Partit Socialista confirmarà las marridas previsions de las municipalas. E per completar, alavetz tanben vendrà lo Senat, ont actualament l’esquèrra a la majoritat sonque per una diferéncia de sièis senadors, de manièra que, en fasent atencion als sondatges, es mai que probable que la cambra Nauta passe de nòu a dreita.
 
Fracàs a las municipalas e pèrda de ciutats importantas. Fracàs a las europèas e encara mai de pèrda de poder davant Merkel. E fracàs al Senat e pèrda del contraròtle del poder legislatiu francés.
 
Vist aquò, tornam demandar: Hollande a una estrategia? Que sone a Pep Guardiola, perque sonque un miracle del mèstre catalan lo podriá sauvar.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Maime Limòtges
8.

#5 Efectivament, me sembla important de rapelar coma fonccionen las eleccions municipalas (mai las regionalas actualas). N'i a çò que se pela "la prima majoritària". Qu'es per garantizar una majoritat a la lista ribada en prumier. Exemple : una vila a 50 conselhers municipaus. Los resultats de las eleccions son los seguents : PS 46%, UMP 44 %, FN 10%. Emb la prima majoritària, lo PS aurà la meitat daus sietis. Los demai serà partejat segon los resultats. Adonc lo PS a desjà 25 sietis mai 46% dau demai : 12. Sia 37 sietis. L'UMP ne'n a 11. Lo FN 2. Adonc quitament si los resultats son pròpches, la prima majoritària garantiza la majoritat absoluda au prumier. E mai sufisament de grands electors per votar per los senators de son camp. Los sondatges son fach d'un biais nacionau, balhen nonmàs una tendéncia.

Per çò de las eleccions europeias, qu'es particular tanben. Son de las eleccions qu'interessen pas la gent : 60% d'abstencion en 2009 (contra 40% per las municipalas de 2008). Sos resultats son pas significatius. Sei segur que quitament si veiram una baissa dau PS e benleu 'na auça dau FN, los rapòrts de fòrça politics seràn plan diferents entre las doas eleccions.

  • 1
  • 0
BOURDON Pau
7.

"Pèrdre" que pren l'alternança vocalica.

  • 0
  • 2
BOURDON Pau
6.

"Pèrdre" que pren l'alternança vocalica.

  • 0
  • 2
Mathieu Castel Marselha
5.

Dises "Fracàs a las municipalas e pèrda de ciutats importantas"

Per lo moment, lei socialistas menan leis sondatges dins lei cinq ciutats mai gròssas de França : Paris, Lion, Lille, Tolosa e Marselha, que porrián bessai levar a la drecha...

Ton analisi pren pas en còmpte la caracteristica deis eleccions municipalas francesas e sei triangulàrias. Se la drecha progrèssa pas e qu'es lo FN, coma sembla d'èstre lo cas, alòr lo PS servarà de nombrosei municipalitats.

Aquí n'as un d'exemple de l'estrategia de Hollande

  • 7
  • 0
pjm
4.

aquò's pas una estrategia, aquò's un reflèxe normau, de tots los politics e de tots los umans. atacar hollande sus l'estrategia, vòli plan, mès lo fau hèser seriosament, susquetot quand prenem una paraula publica dens un media public.

dinc aquí, vedi pas d'argument. es au nivèu "devisada d'estanguet". topics e frasas hèitas shens contingut. nada evocacion concreta de l'accion politica o de hèits.

e vòli pas defénder Hollande, mei d'aquò, pas briga. disi juste que l'atacar atau, shens argument, aquò's lo metòd deu FN e de BFMtv e ne servis pas d'auta interest que lo pojadisme o l'antiparlamentarisme.

  • 3
  • 1

Escriu un comentari sus aqueste article