CAPÇALERA: publicitat jornalet
CAPÇALERA2: FAI-TE SOCI

Jornalet, gaseta occitana d'informacions

Dimècres, 18 de setembre

Marçal Girbau

Dijòus, 13.2.2014 03h00

Los nacionalistas e l’edat mejana


Comentaris 5 comentaris    
Dolent Fluix Bo Molt bo Fabulós (17 vòtes)
carregant En cargament


En mens de 72 oras avèm agut tres bonas nòvas de tria: a) en Soïssa vòlon tornar limitar l’intrada d’europèus mentre los partits d’ultradreta europèus aplaudisson los resultats del referendum, b) en Espanha lo PP non vòl retirar la proposicion de lei de l’avortament qu’a presentat lo ministre Gallardón, mas c) per contra a plan volgut retirar lo famós principi de “justícia universala” de la legislacion espanhòla.
 
Non me semblan de nòvas desligadas las unas de las autras. Al contrari. Es evident qu’en Euròpa sèm a recular en dreits e libertats. Totun, çò que me sembla mai escandalós es la contradiccion ideologica d’aqueles que son a menar aquesta reculada. Lo cas espanhòl, per exemple, me sembla qu’es paradigmatic. Es a dire: aqueles que dison en Catalonha que l’independéncia es una idèa medievala –coma s’aquò volguèsse dire quicòm de forçadament marrit...– e que çò que cal al sègle XXI es d’avançar cap a un Mond globalizat e sens frontièras, son los meteisses qu’al sègle XXI enebisson l’avortament e limitan la justícia universala. Òsca! Enebir l’avortament non es una idèa medievala? Bon, non ne soi segur, mas en tot cas de çò que ne soi segur es que los amics de l’inquisicion i serián plan d’acòrd. E la melhor manièra d’avançar cap un Mond global e globalizat es de limitar la justícia universala, que pròva que las frontièras encara existisson plan quand cal?
 
Poiriam parlar tanben d’aquesta obsession de considerar l’edat mejana l’arquetip d’una societat grisa, fosca, vièlha, injusta, caotica, feudalista, conservatora, etc. Es una tissa partejada pels nacionalistas espanhòls e franceses. La miá impression es qu’aqueste discors antimedieval conten quicòm de volgudament pervèrs e pervertit. Los qu’avèm un pauc de coneissença de l’epòca medievala sabèm plan que per Catalonha e per Occitània aquela epòca non foguèt ni grisa, ni fosca, ni vièlha ni especialament injusta. Foguèt, de fait, un dels moments mai glorioses de la nòstra civilizacion. Un moment de modernitat, de sciéncia, de recèrca, d’art, de poesia, etc. L’objectiu d’eles, donc, es de nos far creire çò contrari: de nos far creire qu’aquela epòca foguèt un desastre –e, donc, implicitament que la nòstra civilizacion foguèt un desastre– e qu’urosament qu’après arribèt l’epòca modèrna, lo barròc, lo classicisme e lo sègle de las lums, solide, perque es quand eles an lo moment mai gloriós.
 
Alavetz, arribats aquí, benlèu que la primièra de las causas que caldriá far es de revendicar sens cap de tabó l’epòca medievala cada còp que siá utilizada contra nosautres. “Òc, volèm l’independéncia. Volèm la lenga a l’escòla. Volèm lo nòstre dreit civil. Volèm gerir lo nòstre territòri. E benlèu que tot aquò es un bocin medieval. E alara, quin es lo problèma? Tant melhor!”



publicitat
BANER1-2-3: DGPL TRADUCTOR



Comentaris

18 de febrièr 11.22h

#4 A! Atau! Que cercavi a deishar un comentari atau mes que'm mancavan drin las coneishenças... Mercés.

Parièr çò qui dises, Francesc, que'm sembla juste : que'ns agrada aquesta idea d'ua Occitania e d'ua Catalonha ligadas e independentas per'mor que vedem lo passat dab los nostes uèlhs d'ara e que ns'agradaré que n'estosse atau uei.


Valora aquest comentari:   votar positiu 2   votar negatiu 0
Respondre comentari replica Comentari inadequat   Formulari d'abús de comentari

17 de febrièr 16.53h

A l'Atge Mejancèir, l'identitat èra pas apitada au concèpte de nacion - vengut mei tard, teorizat dau sègle XIII-XIV enlà en França - nimei au ligame identitat lenguistica > identitat nacionau. L'identitat de l'òme dau sègle XII o XIII en Euròpa occidentau, es sa tèrra, sa parròpia, sa comunautat d'abitants (vilatge, comunautat pastorau...), sa senhoria o mei exactament sas senhorias sovent entermeiladas, sas juridiccions de justicia (avèsque, senhors, senescau, etc.), o sa comuna d... Legir la seguida


Valora aquest comentari:   votar positiu 1   votar negatiu 0
Respondre comentari replica Comentari inadequat   Formulari d'abús de comentari

15 de febrièr 03.04h

La qüestió és que a l'època medieval, La Nació Catalana i Occitània només depenien d'elles mateixes i de ningú més. Per això ens agrada tant a tots dos pobles.


Valora aquest comentari:   votar positiu 2   votar negatiu 1
Respondre comentari replica Comentari inadequat   Formulari d'abús de comentari

13 de febrièr 10.13h

Enfin ne voi pas díser tanpòc qu'ei tot parièr. Las inegalitats, las ierarquias e las oligarquias de uei ne semblan pas guaire las de l'edat miejana, ne's justifican pas per las mèmas rasons ideologicas, etc.

Lo punt comun qu'ei que vivem tostemps dens un monde on tots los òmis n'an pas los mèmes drets.


Valora aquest comentari:   votar positiu 7   votar negatiu 0
Respondre comentari replica Comentari inadequat   Formulari d'abús de comentari

13 de febrièr 09.32h

Ua idea plan interessanta!!!

Per contra, que'm sembla que parlar d'epòcas gloriosas qu'ei ua simplificacion autant mensongèra com de parlar d'epòcas sornas. La societat medievala occitanò-catalana qu'èra rafinada, ja. Qu'aviè hèra de cambiaments importants. Mes qu'èra parièr ua societat inegalitària, autant com la de l'epòca baròca, de las lutz ... o de uei.


Valora aquest comentari:   votar positiu 8   votar negatiu 0
Respondre comentari replica Comentari inadequat   Formulari d'abús de comentari

5 -10 -20 -tots
1




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat
BANER1-2-3: DGPL TRADUCTOR

Perfil

Marçal Girbau

Marçal Girbau logo rss

Filològ e promotor cultural, especializat sus las relacions occitano-catalanas.

mai d'informacions

contactar l'autor

Mai d'articles

Archius




D'autres articles


Jornalet, gaseta occitana d'informacions