Bandièra01 1180x150: Comuna de Tolosa

Opinion

França-Catalonha: republicanisme nacionalista vs. catalanisme popular

Marçal Girbau

Marçal Girbau

Filològ e promotor cultural, especializat sus las relacions occitano-catalanas.

Mai d’informacions
Las eleccions europèas son estadas utilas per mai d'una rason. D'un costat, a demostrat, per darrièr còp, que non existís cap de superioritat morala ni democratica dels païses europèus dits tradicionals, istorics o centrals. Parli, solide, del fait qu'es en França, al Reialme Unit, en Alemanha —entre d'autres—, ont i a agut de resultats mai importants o mai espantants dels partits d'extrèma dreita e, quitament, dels partits nacional-socialistas. De segur qu'en Grècia l'extrèma dreita a tanben agut de bons resultats. Mas Grècia non a jamai vendut l'idèia qu'eles representavan l'esséncia de la democracia europèa, se ben, per d'ironias de l'istòria, o podrián aver fait perfieitament. De fait, cal remembrar que lo partit qu'a ganhat las eleccions grègas es l'opausat del venceire francés, es a dire, l'extrèma esquèrra.
 
Mas d'un autre costat las eleccions europèas an demostrat quicòm mai: an fait tombar l'entelequia nacionalista francesa qu'acusava l'independentisme catalan d'èsser un movement de dreita, borgés, antisolidari, comunitarista —mot qu'ai aprés en França—, embarrat, regionalista, localista, antieuropèu, reaccionari, medieval, etc. La realitat non es solament qu'en França l'esquèrra en general a perdut las eleccions europèas mentre qu’en Catalonha las a ganhadas l'esquèrra independentista. La realitat non es solament qu'en França i aja de mai en mai un aument del discors antieuropèu mentre qu’en Catalonha l'independentisme es estat tostemps europeista —que non vòl dire d'acòrd amb las politicas de uèi de l'UE. La realitat, cars amics, es que tant qu’en França lo partit ganhaire de las eleccions es estat l'extrèma dreita —òc, o repetissi perque es terapeutic per totes: l'extrèma dreita—, en Catalonha l'extrèma dreita es pràcticament inexistenta, la dreita espanhòla tradicionala non a obtengut ni lo 10% dels vòtes e es devenguda la cinquena fòrça politica, gaireben residuala.
 
E ara podràn tornar dire çò que voldràn a prepaus de l'independentisme catalan, mas i a una evidéncia qu'es incontestabla: mentre lo partit ganhaire de las eleccions europèas en Catalonha voldriá que deman lo Principat catalan devenguèsse un Estat membre de l'UE al costat dels autres, lo partit ganhaire de las eleccions europèas en França voldriá que la Republica venguèsse un Estat autarquic defòra l'UE. Aquesta es la realitat. We'll always have France.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Joan Marc
6.

#5 Çò que los franceses apèlan l’universalisme francés es del meu punt de vista un colonialisme perque faguèron un ’’ universalisme sens l’univers’’ e per defendre los intèresses de l’estat francés. Èra una mena de nacionalisme francés expansionista. Ara França s’avisa qu’a pas pus lo poder e la moneda per continuar aquesta politica. Doncas ara lo nacionalisme francés es mai estequit e exagonal. De cops que i a se parla de francés’’ de soca ‘’. Es per aquò que parli de nacionalisme ‘’ etnic’’ malgrat que l‘etnia francesa existica pas. Per l’estat francés es un bon biais de salvar çò que se pòt salvar.

  • 2
  • 0
Jig Mimbasta
5.

#4 Totun Joan Marc, « l’universalisme francés es devengut un nacionalisme etnic » que'm sembla un acorcit esquèr. Lhèu que vòs díser que l'universalisme a deishat la plaça au nacionalisme ?
Se l'arreplec nacionau arroganha França, los universalistas non se'n pòden pas de mei (e en tot cap non l'instigan pas).
Los nacionalistas francés (e los d'enlòc mei) que vomeishen sus l'universalisme. Que tutan a tot canton que cada país e deu estar mèste a casa. Atau lo Zemmour (nacionalista deus isanhós quan serà pas FNista), parlant de la repression en China : « Je ne suis pas droit-de-l'hommiste (sic). Les Chinois en Chine font ce qu'ils veulent. »
L'universalisme b'èra ua bèra e bona idea, e qu'ac damòra quan lo son quite cap-promotor jacobin en harà ua aplicacion selectiva e contradictòria. L'occitanisme plan entenut qu'ei o que deuré estar ua forma d'universalisme, de las qui reconeishen medisha dignitat à totòm e a tota cultura (çò qui ne vòu pas díser aprovà'n incondicionaument tota manifestacion).

  • 4
  • 0
Joan Marc
4.

#1 Cossí se pòt dire que l’independentisme catalan es çò parièr que lo nacionalisme d’estat del FN ? Lo FN es un partit racista que vòl impausar una identitat francesa farlabicada e fargada per l’estat francés amb lo dògma : un estat, un pòble e una lenga. A passat temps, l’estat francés colonizava los autres pòbles al nom de l’universalisme e ara nos explica que cal defendre lo pòble francés amenaçat per Euròpa, los africans, arabes, chineses, americans, etc. …. Fin finala l’universalisme francés es devengut un nacionalisme ’’ etnic’’ exagonal. La societat catalana e los independentistas son plan mai dubèrts que los franceses e respectuoses de las diferéncias culturalas e lingüisticas. Cossí se pòt comparar CiU, ERC, ICV amb lo FN ? Lo nacionalisme francés s’amaga darrièr la paraula Republica. Cal que Occitània enregue las piadas de Catalonha.

  • 15
  • 0
two and one are free st truc deu pishahòrt
3.

#i Se voletz presentar las causas atau perqué pas, mès nos enganetz pas . De díser que l'independentisme catala e "l'independentisme" deu FN francés que s'ac valen, aquò qu'ei fotiròlas. los independentistes Catalans que volen quitar ua estructura nacionala que n'i vésen pas mes legitimitat en tot demorar dins Europa en un projècte politic . Los autes deu FN , que'ns volen estremar d'aquera entà tornar demorar ua estructura nacionala, e pas sonque, de cap a quin sap qué , en tot bramar un cant revolucionari deu sègle detz e uèitau davant l'estatua d'ua Jana de l'edat mejan que pas dingun pòt diser qu'a existit au segur e que de mes seré venguda santa pauc de temps -a. Shens de diser de l'antisemitisme e deu racisme qu' an prés en credo. Parlem doncas pas de causas "naturaus e normaus" en çò deus autes ; que n'avèm de rèsta !

  • 4
  • 1
two and one are free st truc deu pishahòrt
2.

#i Se voletz presentar las causas atau perqué pas, mès nos enganetz pas . De díser que l'independentisme catala e "l'independentisme" deu FN francés que s'ac valen, aquò qu'ei fotiròlas. los independentistes Catalans que volen quitar ua estructura nacionala que n'i vésen pas mes legitimitat en tot demorar dins Europa en un projècte politic . Los autes deu FN , que'ns volen estremar d'aquera entà tornar demorar ua estructura nacionala, e pas sonque, de cap a quin sap qué , en tot bramar un cant revolucionari deu sègle detz e uèitau davant l'estatua d'ua Jana de l'edat mejan que pas dingun pòt diser qu'a existit au segur e que de mes seré venguda santa pauc de temps -a. Shens de diser de l'antisemitisme e deu racisme qu' an prés en credo. Parlem doncas pas de causas "naturaus e normaus" en çò deus autes ; que n'avèm de rèsta !

  • 4
  • 1

Escriu un comentari sus aqueste article