Dijòus, 5.6.2014 03h00
Passat ièr lo President de la Republica Francesa, François Hollande, anoncièt amb totas las onors d’aires monarquics la siá proposicion de reorganizacion de las regions francesas. Non intrarem dins lo debat de se nos cal 12, 14, 16 o 10 regions. Non intrarem dins lo debat de se Bretanha deuriá èsser estada reünificada. Non intrarem dins lo debat de s’Occitània deuriá èsser venguda una sola region. Tanpauc de se las encara actualas Aquitània, Miègjorn-Pirenèus e Lengadòc deurián aver bastit una region ensems. Non. Uèi, que parlarem concrètament de la proposicion del President e de l’enjòc que me sembla qu’ara tomba suls ciutadans de Tolosa, Montpelhièr, Narbona, Aush, Perpinhan, etc.
Dempuèi dimars los mèdias franceses, e plan especialament los mèdias que podriam sonar miegjornals, an començat d’especular a prepaus d’aquesta nòva region que sembla que naisserà de la soma de Miègjorn-Pirenèus e Lengadòc-Rossilhon. E, solide, dins aquestas especulacions, apareis una question qu’ara sembla capitala als uèlhs dels unes e dels autres: cossí sonar aquesta nòva region? De jornalistas, de publicistas, de politics, d’intellectuals e quitament de pòetas e escrivans coma Ives Roqueta, an exprimit lo sieu punt de vista suls mèdias franceses. Roqueta, per exemple, ièr prepausava qu’aquesta nòva region se deviá sonar Toulousie. Imaginam qu’es la soma francesa de Tolosa e Occitània, çò qu’en occitan deuriá donar —dedusissi— Tolosia –amb l’accent sus la segonda o..? Efectivament, plan poetic. D’autres, an prepausat de noms coma Occitanie, Pyrénées-Lengadoc, Midi-Lengadoc, e, çò pièger, Midi. Foguèt Didier Solé, de l’Agéncia de publicitat Darwin & Co, qu’aguèt l’espectaclosa e sobirana idèa de nos far sonar Midi. Çò mai interessant, totun, foguèt de legir los arguments d’aqueste publicista per l’opcion miegjornala:
“Je choisirai Midi. Midi, ça sonne rugby et cigales, ça sonne méridional. Un habitant du Midi c’est un méridional, qu’il soit Perpignanais, Castrais, Narbonnais, Biterrois, Montalbanais ou Tarbais… La Région Midi! Ce Midi qui symbolise la rencontre du troubadour et de la vigneronne, de l’aéronautique et de la médecine, des technologies de pointe et de l’art de vivre…”
Pensi francament que manquèt de mencionar lo caçolet e las gabarras del canal.
Mas al delà d’aquestas manifestacions de folclorisme aberrant, quin nom per aquesta nòva region? Quin nom per amassar de territòris talament diferents coma Armanhac, Rosselhon, Bigòrra, País de Foish, Tolosa o Montpelhièr? Soi segur dels noms que nos cal refusar automaticament. Occitània, per exemple, non o podèm acceptar perque s’o acceptam voldrà dire que çò de mai que uèi consideram Occitània —coma la Gasconha, lo Lemosin, Provença, etc.— non son pus Occitània. Non podèm acceptar
Midi, per amor que totes sabèm pro ben que se i a un
Midi, vòl dire que i a un nòrd, un èst, un oèst e... solide, un centre. Un centre qu’es
lor centre, non pas lo nòstre. E pensi que deuriam evitar los noms compòstes de la mena de
Lengadòc-Rosselhon,
Miègjorn–Pirenèus, etc. La rason es simpla: aquestes noms son tròp pesucs, antinaturals e non permeton de bastir identitat. Es a dire, uèi i a qualqu’un que se sentisca
lengadòc-rosselhonés? Lo me presentaretz.
Pensi que nos cal un nom clar, istoric, enrasigat, pròpri e sobiran. Es per aquò que, malgrat lo fait que dialectalament non siá completament precís —amb de territòris gascons de dins—, malgrat qu’avèm tanben Catalonha del Nòrd; segurament, de totes los noms possibles, lo que me sembla mens marrit es
Lengadòc. Lengadòc amassa lo caractèr istoric, pròpri, enrasigat, clar e sobiran.
Region Lengadòc. Òc, Lengadòc. Que vòl dire qu’aquí parlam una autra lenga, que non es pas la francesa. Perqué non?
Comentaris
6 de junh 15.20h
Lo nom de la novela region ente serà lo Lemosin es tot trobat. Se farà sus lo modele de PACA : PO-LI-CE.
Valora aquest comentari:
3
0
5 de junh 22.46h
Soi geinat d'apelar Gasconha orientala e Rosselhon "Lengadòc". Prepausariái Occitania Centrala (çò que dona a entendre clarament que i a taben las parts lateralas…) Mas lo problèma demòra la preséncia de Rosselhon. E de tot biais, aqueste problèma contunhariá de se pausar se, dins un sòmi vengut realitat, Païses Catalans e Occitania desliurats de tota alienacion, volián constituïr a eles dos un estat novèl e unic. Cossí lo caldriá apelar ? Occitanlònha o Catalania ?
Demoram... Legir la seguida
Valora aquest comentari:
7
0
5 de junh 16.59h
Davant lo copa-cap de la refòrma de les regions (que l'amic Danièl qualificaré en marmandés de "qüadratura dau cèucle" !), cadun i vai de sa teoria... Per certèns departaments, aquò hèi l'unanimitat : les Lanas e lo Gèrs, per exemple, seràn bien amassa. Mès per d'auts, la discussion vingrà ahucada, percé que la legitimitat "culturala" deu quite departament es aproximativa : pensi a la Gironda, ont neishuri e ont vivi. Probable qu'un Blaiés o un Cubzagués trobarà ren a diser a ... Legir la seguida
Valora aquest comentari:
2
0
5 de junh 15.41h
Coma nom, perqué pas:
De-qu'as-a-romegar-contra-ton-mèstre-francés-tu-pèc-d'occitan-istan ?
Valora aquest comentari:
3
0
5 de junh 12.11h
#2 Pense come tu, Mathieu. Pas de nuvela capitala a esperar, mas puslèu un perciment de las estructuras entre TLS e MPL. L'eidèia es de far de las economias, pas dau keynesianisme e daus grands chantiers.
Per aura la fusion se devia far entre blòcs regionaus existents, quò impausèt lo Valls. Dins un segond temps, d'unes despartiments deurian poder chausir de passar d'un blòc l'autre, sens garantia. A veire se los 32+65 chausissen de se virar chap a BDU. Qu'es pas evident dau tot que priv... Legir la seguida
Valora aquest comentari:
2
0
5 de junh 11.53h
Òc, i auriá un fum de causas a dire e sustot que Hollande e sos conselhièrs an fach tot çò que podián (pel moment) per pas aver de possibilitat de revindicacion « identitària » coma se diguèt a C dans l'air. Èra gaireben la sola causa que los intervenents trobavan bona !
Pel nom de la region novèlas, serà, se cal causir, una sembla consultacion per çò que sols « nòstres mètres » sabon ; an recebut l'oncion…
Valora aquest comentari:
0
0
5 de junh 11.36h
Auriai propausat "Hollanistan" Per ma fe tinda plan a la aurelhas puèi cal tornar omenatge a sant "tandona"
Valora aquest comentari:
0
1
5 de junh 11.32h
Lo nom de la region: "UAPRAOC" (Una autra puta de region antioccitana)
Valora aquest comentari:
1
1
5 de junh 09.32h
A prepaus del nom de l'eventuala novèla region e per ne demorar sonque al nom (i auriá talament a dire a prepaus d'aquesta reforma).
Los que començan d'aver lo pel blanc coma ieu se deurián rebrembar que Marc Censi, quand èra president de la region "M-P" aviá prepausat ja de cambiar lo nom de la region. Mas èra complicat que caliá un referendum, una deliberacion del govèrn e fin finala una lei. Mas un còp de mai, emai en cas de referendum favorable, la decision finala reveniá a Parí... Legir la seguida
Valora aquest comentari:
4
0
5 de junh 09.17h
Lengadòc és prou bonic, històric i poètic. No cal afegir el terme en francès Languedoc en els rètols.
Valora aquest comentari:
2
0
Comenta
Lo comentari es estat mandat corrèctament
12 comentaris
(11 vòtes)
En cargament
12 comentaris
Mandar
