CAPÇALERA: publicitat jornalet
CAPÇALERA2: FAI-TE SOCI

Jornalet, gaseta occitana d'informacions

Dimars, 16 de julh

Marçal Girbau

Dijòus, 19.6.2014 03h00

L’utilitat de las caumas de l’SNCF


Comentaris 18 comentaris    
Dolent Fluix Bo Molt bo Fabulós (26 vòtes)
carregant En cargament


Lo secretari General de la CGT francesa, Thierry Lepaon, acusèt ièr lo govèrn francés e la direccion de la SNCF de mentir als franceses. Segon el, “los franceses non comprenon la cauma de la SNCF perque lo govèrn lor mentís” per çò qu’es dels perilhs que, segon lo sindicat, representa pels ciutadans la reforma ferroviària que prepara lo govèrn de Valls. Amb aqueles mots, lo sénher Lepaon ensajava de compensar las declaracions del primièr ministre francés, qu’aviá exprimit que la màger part dels ciutadans non compreniá la cauma dels emplegats ferroviaris.
 
Çò mai espantant es que, vist l’escambi dialectic entre los unes e los autres, semblariá que la question essenciala a debat non es pas se la reforma ferroviària es positiva o negativa per la qualitat dels servicis de transpòrt ferroviari, mas se la populacion francesa comprén o non la cauma dels sindicats de l’SNCF. Òsca! E, donc, per amor que lo debat es aqueste, uèi non intrarai dins la disquisicion de se la reforma es puslèu positiva o puslèu negativa. Per contra, ont voldrai plan intrar es dins la soscadissa sus la compreneson, l’eficacitat e l’utilitat vertadièra de la cauma.
 
Qué vòl dire comprene? La compreneson es la facultat o l’accion de comprene l’autre. Comprene l’autre vòl dire se metre al sieu lòc e ensajar d’experimentar çò que sentís l’autre. Es çò que lo grèc nos ensenha amb lo mot empatia (del grèc ancian, ἐν, dins, a l’interior e πάθoς, patiment). Es a dire, “experimentar lo patiment de l’autre”.
 
Se comprene es experimentar d’empatia vers l’autre, me demandi qu’es plan que los sindicats de l’SNCF apelen a l’empatia dels ciutadans franceses vers los salariats ferroviaris, mas, los salariats de l’SNCF, après 8 jorns de cauma, an experimentat la mendra dòsi d’empatia vèrs los emplegats e salariats franceses? An sentit la mendra empatia vèrs las familhas que se devon despatolhar dempuèi la setmana passada per arribar a l’ora al trabalh, per aver lo temps de menar los dròlles a l’escòla, per tornar a l’ostal non gaire tard, etc.?
 
Sens dobte, non. Perque se los emplegats de la SNCF s’aguèssen expermimentat l’empatia minimament amb los autres salariats compatriòtas, non aurián organizat aquelas caumas coma mesura de pression cap al govèrn francés. Car, vertadièrament, a qual tafura mai aquestas caumas? Al govèrn francés o als ciutadans?
Sens dobte, encara, als ciutadans. E s’aquela cauma a los que tafura mai es als ciutadans, cossí vòlon los sindicats qu’après los ciutadans se solidarizen? Cossí pretendon que comprengam las lors demandas s’eles son incapables de comprene que son a se batre contra los aliats? Que los adversaris son endacòm mai?
 
Solide, me diretz que non i a res de mai eficaç que las caumas estrictas e disciplinadas, per obténer çò que se vòl. Ieu non i soi d’acòrd perque, coma o disiái, aquelas caumas non còstan pas grand causa al govèrn. Per contra, que se passariá s’en lòc d’estancar los trens, los nòstres amics sindicalistas de l’SNCF s’organizèssen e decidiguèssen d’estancar de verificar se los usatgièrs del tren an pagat o non lo tiquet? Encara melhor: que decidiguèssen de non voler vendre ni un tiquet e atudèssen las maquinas automaticas?
 
S’o faguèssen aital, los que serián vertadièrament dins la merda serián los directors de l’SNCF, e lo ministre. Non coma ara, que sèm los camaradas salariats, los que ne patissèm las consequéncias.



publicitat
BANER1-2-3: DGPL TRADUCTOR



Comentaris

24 de junh 13.15h

Trape qu'aquela cançons sus los rapaires s'adapta fòrça plan a d'unes cronicaires....
https://www.youtube.com/watch?v=0c9A4D6OSq4&feature=youtu.be


Valora aquest comentari:   votar positiu 1   votar negatiu 0
Respondre comentari replica Comentari inadequat   Formulari d'abús de comentari

21 de junh 17.22h

#8 S'as un problèma dab los Catalans, lej un aute jornal! òó


Valora aquest comentari:   votar positiu 0   votar negatiu 0
Respondre comentari replica Comentari inadequat   Formulari d'abús de comentari

21 de junh 17.19h

#7 Alavetz las atacas personalas que son mauviengudas manca si pòrtan sus la lenga de la persona qui atacam e manca si son hèitas dab "umor"?

B'ei pietadós!
E'vs venjatz deu pepé qui'vs disè que parlàvatz mau patués en trobant quauqu'un qui'u parla "mei mau" que vos?

E credetz que i a un regent qui'vs va balhar un bon punt tà aquò?

Mèste Yoda, que't conselhi a) s'as quauqu'arren d'important a díser, d'escríver articles
b) ... Legir la seguida


Valora aquest comentari:   votar positiu 2   votar negatiu 0
Respondre comentari replica Comentari inadequat   Formulari d'abús de comentari

21 de junh 07.34h

#12 Qu'ac a avut hèit mes ara que s'estima mei de har lo mus e de romegar.


Valora aquest comentari:   votar positiu 0   votar negatiu 0
Respondre comentari replica Comentari inadequat   Formulari d'abús de comentari

20 de junh 11.54h

#5
Òc, 'quò's un pauc aquò que volèvi diser. Geinar sonque los qu'an lo poder, qué.


Valora aquest comentari:   votar positiu 0   votar negatiu 0
Respondre comentari replica Comentari inadequat   Formulari d'abús de comentari

19 de junh 21.59h

Compréner los caumaires de l'SNCF, es compréner que 1) çò que rapòrt al nivèl del Camin Ferrat se deu privatizar per fin de raportar lo mai de moneda possibla a un ponherat d'interrèsses privats que refusan de mai en mai de pagar talhas a l'estat e que 2) las activitats deficitàrias devon demorar publicas per que lo deute de l'estat se cave de mai en mai. Donc, compréner aquesta cauma es compréner en fintar mai luènh que lo cap del nas, qu'aquela cauma se complís dins l'interès gen... Legir la seguida


Valora aquest comentari:   votar positiu 10   votar negatiu 1
Respondre comentari replica Comentari inadequat   Formulari d'abús de comentari

19 de junh 21.56h

#9

Nullàs lo comentari!

Perqué proposatz pas vòsteis escrichs a la redaccion se pensatz que leis articles son pas bòns?


Valora aquest comentari:   votar positiu 9   votar negatiu 0
Respondre comentari replica Comentari inadequat   Formulari d'abús de comentari

19 de junh 21.33h

Urosament que Mossur Girbau a pas passat l'espròva de filosofia diluns passat, autrament quitament pas segur que seriá estat als ratrapatges...
Quina indigéncia intellectuala...fa paur... Sèm quand mème pas al cafè del comèrci.


Valora aquest comentari:   votar positiu 4   votar negatiu 1
Respondre comentari replica Comentari inadequat   Formulari d'abús de comentari

19 de junh 19.39h

Justament, "qué vòl dire comprene"??


Valora aquest comentari:   votar positiu 1   votar negatiu 0
Respondre comentari replica Comentari inadequat   Formulari d'abús de comentari

19 de junh 17.08h

#8 voèi, mès avisatz vos, pasmens, Girbau hèi citacions en grec dens lo tèxte. 'quò balha autoritat, tè !
urosament, pr'amor dens las idèas, es pas lunh deu vuit totau, com de costuma. pojadisme d'estanguet, shens granda reflexion e tot juste per provocar e crear conexions au siti. 

aquò's la politica editoriala de jornalet, e vedem ont mia : articles cada dia mei febles, pas mei de bilanç o de cifras (la redaccion avè promes d'ic hèser regularament), editorialistas shens interest,... Legir la seguida


Valora aquest comentari:   votar positiu 6   votar negatiu 12
Respondre comentari replica Comentari inadequat   Formulari d'abús de comentari

5 -10 -20 -tots
1
-
2 >




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat
BANER 3 teveoc

Perfil

Marçal Girbau

Marçal Girbau logo rss

Filològ e promotor cultural, especializat sus las relacions occitano-catalanas.

mai d'informacions

contactar l'autor

Mai d'articles

Archius




D'autres articles


Jornalet, gaseta occitana d'informacions