Star Wars es subretot un filme d’aventura e de sciéncia-ficcion. A l’ora d’ara, doas generacions se son abalidas a l’ombra d’aquelas istòrias fantasticas. A títol personal la primièra trilogia (77, 80, 83) marquèt mon imaginari de mainatge. De tal biais, s’ara ai un agach d’adulte mai critic, manteni encara una relacion afectiva amb aquel univèrs. Aquò’s gaireben la meteissa causa per las generacions de la fin dels ans 90 que cresquèron amb la segonda trilogia  (99, 2002, 2005). Aital, la trilogia venenta farà partida de l’imaginari de las generacions seguentas, la dels nòstres joves enfants. Se los filmes Star Wars son clarament pas los filmes del sègle, meritan, per las rasons mençonadas, d’èsser discutits e espepissats.

Coma o avèm expausat dins un autre article[2], ven a aquesta sèria famosa d’èsser reviscolada. Son realizaire  d’origina, George Lucas, vendèt en 2012 son entrepresa, Lucasfilm, a Disney que decidiguèt sul pic de tornar lançar una novèla tièra de filmes Star Wars. Disney causiguèt un novèl realizaire per menar lo prètzfach: Jeffrey Jacob Abrams.

A l’ora d’ara, totes los afogats d’aquela sèria se demandan s’aquel realizaire pas gaire conegut del public serà a l’auçada necessària per relevar lo desfís.

Nosautres, disèm d’òc. Quitament se lo filme nos agradarà benlèu pas personalament, pensam que l’Star Wars novèl rescontrarà l’aprobacion a l’encòp de las criticas e del public. O disèm perque coneissèm un pauc ja la filmografia de J.J. Abrams e sabèm quina mena de realizaire es.

La nòstra escomesa es de dire que los elements que faràn lo succès de l’Star Wars novèl se tròban ja dins los primièrs filmes de J.J. Abrams. Prepausam aicí d’analisar los elements dins sa filmografia que nos permeton d’o dire.

Aital, esperam qu’aqueste article balharà tanben a l’espectator occitan d’espleches per comprene cinematograficament l’Star Wars novèl en sortent de la sala, en plaça de n’èsser la victima despoderada.
 

Supèr 8 — agantar l’esperit dels filmes d’aventura dels ans 70-80.

Amb son primièr filme, J.J. Abrams mostrèt qu’èra lo campion d’Steven Spielberg, e quitament de George Lucas.

Aquel filme a per particularitat d’èsser completament bastit per far omenatge als primièrs filmes d’Spielberg qu’èran totes de filmes d’aventura. Supèr 8 es remirable sus aquel nivèl: se creiriá que lo jove Steven Spielberg es darrièr la camèra. Efectivament, al nivèl visual e scenaristic lo filme sembla d’èsser un mescladís d’E.T., de Rescontre del tresen tipe, de The Goonies o quitament de Poltergeist. Al nivèl del scenari se tròba exactament lo quite fil d’Arianna: una còla de joves serà lo còr de l’eroïsme davant d’adultes completament trespassats pels eveniments fantastics. Al nivèl grafic los jòcs de lum dins l’ambient nuechenc remembram fòrça çò qu’Spielberg faguèt amb E.T.

Arribar d’agantar gaireben a la perfeccion l’esperit d’aqueles filmes es remirable. Nos balha la pròva que J.J. Abrams es capable de comprene çò que fa un pauc l’estil e la particularitat d’un filme.

Sovent, lo repròchi qu’èra estat fach a la segonda trilogia Star Wars es que remembrava pas la mistica, l’encantament, de la primièra. Coma se los elements fantastics èran alara trivializats per daissar plaça a de dialògs sens fin davant de decòrs sintetics. Pièger, balhèt a d’admiraires nombroses lo sentiment que George Lucas compreniá quitament pas lo contengut e lo sicut de sa pròpria mitologia, de sa pròpria cinematografia[3].

Aital son d’elements per pensar que J.J. Abrams serà en estat de comprene çò que fa la fòrça de la primièra trilogia d’Star Wars e que serà en estat de comprene çò que lo public espèra. La galaxia cinematografica d’Spielberg pertòca sus qualques nivèls la de George Lucas.
 

Star Trek: dins l’escurina — Tiradors, referéncias e nostalgia

En mai d’aquò, J.J. Abrams reviscolèt ja una autra sèria mitica de sciéncia-ficcion: Star Trek[4].

La sèria Star Trek s’arrestèt en 2005. Mas J.J. Abrams foguèt mandat per la reviscolar en ne fasent un filme novèl que sortiguèt en 2009. E lo reviscòl prenguèt. Amb aqueles filmes J.J. Abrams se saupèt far aimar del public. Talament qu’a l’ora d’ara, lo darrièr filme Star Trek de la tièra, Star Trek: dins l’escurina (into darkness; 2013) es jutjat pels afogats coma un dels melhors filmes de la tièra.
Star Trek: dins l’escurina es remirable dins lo sens ont es una rescritura finaudèla del filme emblematic de la sèria Star Trek II: la colèra de Khan » (1982), lo filme de la tièra mai estimat dels afogats.

Dins sa rescritura garda coma còr de l’intriga la relacion amistosa entre J.T. Kirk, McCoy e Spock, garda los personatges dels filmes, mas càmbia mai o mens la plaça de cadun per escriure un filme novèl e que farà resson amb lo filme vièlh. Es arribat aital de nos fargar d’un biais remirable un filme transgeneracional amb tirador.

Per exemple, dins la scèna finala, la situacion es intercambiada. Es pas lo sacrifici inuman d’Spock que salvarà la còla de l’Enterprise (coma dins lo filme d’82), mas lo sacrifici tròp umanista de J.T. Kirk, lo capitani (2013), e las doas scènas partejaràn de plans en comun. Encara la famosa frasa de l’Spock d’82, “Los besonhs de la majoritat despassan los besonhs de qualques unes”, que marca la fin del filme, serà tornada prene a la debuta del filme de 2013. En 1982 èra J.T. Kirk que fasiá son crit plan conegut dels afogats: “KhaaaaAAn!” En 2013, es Spock.

Çò mai evident es aquela scèna incresabla ont l’Spock del filme de 2013, amb una frequéncia especiala, demanda ajuda a l’Spock de 1982 (qu’èra jogat per Leonard Nimoy) qu’es en el lo simbòl màger de la sèria. Amb aquela referéncia ultima saupèt amanhagar totes los afogats. Es probable qu’Harrison Ford o Mark Hamill, que son d’actors respectats pel public d’Star Wars, jogaràn la meteissa foncion.

Doncas o avètz comprés, amb Star Trek: into Darkness, J.J. Abrams balha la pròva qu’es capable de jogar a la perfeccion la carta de la “referéncia” a la primièra trilogia Star Wars e la carta de la “nostalgia”.
 

Criticas

La sola inquietud que demòra es que fin finala, pas un de sos filmes marquèt los esperits. Supèr 8 es un filme un pauc oblidat, e fòra son univèrs d’afogats e de son succès en sala, los dos Star Trek novèls demòran dins l’ombra.

Cal dire que J.J. Abrams es un bon imitaire. Compren lo cinèma que trabalha e s’arriba de tornar emplegar los elements essencials e esperats, arriba pas tròp, ça que la, de balhar sa pata e a far pròva d’originalitat. S’efectivament, dins Star Trek: dins l’escurina, lo mal es de totes los costats (çò qu’es una bona causa per un scenari coma lo d’Star Wars), lo demai del filme demòra un pauc “ja vist”. E passada la descobèrta del vièlh esperit encantador d’Spielberg, Supèr 8 pèrd rapidament de son interès.

Cal dire encara que J.J. Abrams ven de la television. E de còps se sentís que fin finala, los dos Star Trek novèls son benlèu pas que “dos episòdis” de doas oras, mai que de filmes complets e independents.

Aital avèm qualques dobtes ça que la. Arribarà de far dels Star Wars novèls non pas d’episòdis un pauc “opcionals” dins una epopèia qu’es ja acabada? Arribarà de nos fargar quicòm d’interessant en mai de la bona vièlha referéncia nostalgica? I pòt aver de dobte.

 
Conclusion

D’acòrdi, la maquina del marqueting en plaça dempuèi mai de trenta ans farà son trabalh: Star Wars 7 serà de tot biais una reüssida màger.

Mas al nivèl artistic, al nivèl del contengut, agachar la filmografia de J.J. Abrams nos permet de comprene cossí aquel realizaire vos conquistarà lo 18 de decembre. J.J. Abrams, lo 18, nos tornarà servir un cosina ja plan mestrejada. Dins l’èime, dins la ligason amb lo passat, la referéncia, etc., la filmografia d’Abrams nos permet de comprene que n’es lo mèstre.

Aital la sola question vertadièra que demòra, e que benlèu deu far autoritat dins l’èime de l’espectator, es de saber se, òc o non, J.J. Abrams es arribat de portar quicòm de novèl e de vertadièrament interessant dins aquel univèrs de Star Wars que, ailàs, dempuèi qualques annadas, es un pauc mòrt[5].