CAPCALERA: IEA-AALO

Jornalet, gaseta occitana d'informacions

Dimenge, 29 de novembre

Guilhèm Tomàs

Dissabte, 5.12.2015 03h00

Se preparar per Star Wars 7


Comentaris 12 comentaris    
Dolent Fluix Bo Molt bo Fabulós (11 vòtes)
carregant En cargament


Aficha d’Star Wars 7. L’estil seguís blosament la tradicion de las afichas Star Wars

Aficha alternativa de Supèr 8. Benlèu facha per un afeccionat. Remarcatz la similaritat amb las afichas d’Star Wars e Indiana Jones

Star Trek: la colèra de Khan; 1982. Separats per una vitra, Spock (a drecha) s’es sacrificat per far tornar marchar lo motor de l’Enterprise, lo vaissèl, salvant aital tota la còla

Star Trek: dins l’escurina; 2013. Meteissa causa, mas los ròtles son intercambiats. Remarcatz que los dos plans son dins un imatge-miralh perfièch

Star Trek: dins l’escurina; 2013. L’Spock jove demanda ajuda a l’Spock alternatiu. Amb lo treilèr de Star Wars 7 ja sabèm que los eròis demandaràn ajuda a Harrison Ford

Star Wars 1979, primièra trilogia

Star Wars 2015. Extrach del treilèr. Cercatz las diferéncias. I a d’autres extraches que nos fan demandar s’Star Wars 7 aurà vertadièrament d’innovacions

Star Wars es un tresaur de simbolica al servici de la narracion (sonque). Lo segond plan de la primièra trilogia o ditz tot: los rebèls son espotits per lo mal qu’es majoritari. Pas besonh d’explicar




Etiquetas
star trek, star wars, super 8, tomàs, tomàsstar trek, tomàsstar trekstar trek

Lo 18 de decembre sortirà Star Wars 7: La Fòrça se desvelha. Quina que siá la qualitat d’aquel filme aquò serà un eveniment cinematrografic important. Totes sèm ja, d’un biais mai o mens dirècte, pertocats per la sortida d’aquel filme: Nadal se sarra e los magazins s’emplenan de produches licenciats “Star Wars”. I escaparem pas. Intrarà dins la nòstra vida vidanta, e es pr’amor d’aquò que nos en cal parlar en lenga nòstra.[1]

Star Wars es subretot un filme d’aventura e de sciéncia-ficcion. A l’ora d’ara, doas generacions se son abalidas a l’ombra d’aquelas istòrias fantasticas. A títol personal la primièra trilogia (77, 80, 83) marquèt mon imaginari de mainatge. De tal biais, s’ara ai un agach d’adulte mai critic, manteni encara una relacion afectiva amb aquel univèrs. Aquò’s gaireben la meteissa causa per las generacions de la fin dels ans 90 que cresquèron amb la segonda trilogia  (99, 2002, 2005). Aital, la trilogia venenta farà partida de l’imaginari de las generacions seguentas, la dels nòstres joves enfants. Se los filmes Star Wars son clarament pas los filmes del sègle, meritan, per las rasons mençonadas, d’èsser discutits e espepissats.

Coma o avèm expausat dins un autre article[2], ven a aquesta sèria famosa d’èsser reviscolada. Son realizaire  d’origina, George Lucas, vendèt en 2012 son entrepresa, Lucasfilm, a Disney que decidiguèt sul pic de tornar lançar una novèla tièra de filmes Star Wars. Disney causiguèt un novèl realizaire per menar lo prètzfach: Jeffrey Jacob Abrams.

A l’ora d’ara, totes los afogats d’aquela sèria se demandan s’aquel realizaire pas gaire conegut del public serà a l’auçada necessària per relevar lo desfís.

Nosautres, disèm d’òc. Quitament se lo filme nos agradarà benlèu pas personalament, pensam que l’Star Wars novèl rescontrarà l’aprobacion a l’encòp de las criticas e del public. O disèm perque coneissèm un pauc ja la filmografia de J.J. Abrams e sabèm quina mena de realizaire es.

La nòstra escomesa es de dire que los elements que faràn lo succès de l’Star Wars novèl se tròban ja dins los primièrs filmes de J.J. Abrams. Prepausam aicí d’analisar los elements dins sa filmografia que nos permeton d’o dire.

Aital, esperam qu’aqueste article balharà tanben a l’espectator occitan d’espleches per comprene cinematograficament l’Star Wars novèl en sortent de la sala, en plaça de n’èsser la victima despoderada.
 

Supèr 8 — agantar l’esperit dels filmes d’aventura dels ans 70-80.

Amb son primièr filme, J.J. Abrams mostrèt qu’èra lo campion d’Steven Spielberg, e quitament de George Lucas.

Aquel filme a per particularitat d’èsser completament bastit per far omenatge als primièrs filmes d’Spielberg qu’èran totes de filmes d’aventura. Supèr 8 es remirable sus aquel nivèl: se creiriá que lo jove Steven Spielberg es darrièr la camèra. Efectivament, al nivèl visual e scenaristic lo filme sembla d’èsser un mescladís d’E.T., de Rescontre del tresen tipe, de The Goonies o quitament de Poltergeist. Al nivèl del scenari se tròba exactament lo quite fil d’Arianna: una còla de joves serà lo còr de l’eroïsme davant d’adultes completament trespassats pels eveniments fantastics. Al nivèl grafic los jòcs de lum dins l’ambient nuechenc remembram fòrça çò qu’Spielberg faguèt amb E.T.

Arribar d’agantar gaireben a la perfeccion l’esperit d’aqueles filmes es remirable. Nos balha la pròva que J.J. Abrams es capable de comprene çò que fa un pauc l’estil e la particularitat d’un filme.

Sovent, lo repròchi qu’èra estat fach a la segonda trilogia Star Wars es que remembrava pas la mistica, l’encantament, de la primièra. Coma se los elements fantastics èran alara trivializats per daissar plaça a de dialògs sens fin davant de decòrs sintetics. Pièger, balhèt a d’admiraires nombroses lo sentiment que George Lucas compreniá quitament pas lo contengut e lo sicut de sa pròpria mitologia, de sa pròpria cinematografia[3].

Aital son d’elements per pensar que J.J. Abrams serà en estat de comprene çò que fa la fòrça de la primièra trilogia d’Star Wars e que serà en estat de comprene çò que lo public espèra. La galaxia cinematografica d’Spielberg pertòca sus qualques nivèls la de George Lucas.
 

Star Trek: dins l’escurina — Tiradors, referéncias e nostalgia

En mai d’aquò, J.J. Abrams reviscolèt ja una autra sèria mitica de sciéncia-ficcion: Star Trek[4].

La sèria Star Trek s’arrestèt en 2005. Mas J.J. Abrams foguèt mandat per la reviscolar en ne fasent un filme novèl que sortiguèt en 2009. E lo reviscòl prenguèt. Amb aqueles filmes J.J. Abrams se saupèt far aimar del public. Talament qu’a l’ora d’ara, lo darrièr filme Star Trek de la tièra, Star Trek: dins l’escurina (into darkness; 2013) es jutjat pels afogats coma un dels melhors filmes de la tièra.
Star Trek: dins l’escurina es remirable dins lo sens ont es una rescritura finaudèla del filme emblematic de la sèria Star Trek II: la colèra de Khan » (1982), lo filme de la tièra mai estimat dels afogats.

Dins sa rescritura garda coma còr de l’intriga la relacion amistosa entre J.T. Kirk, McCoy e Spock, garda los personatges dels filmes, mas càmbia mai o mens la plaça de cadun per escriure un filme novèl e que farà resson amb lo filme vièlh. Es arribat aital de nos fargar d’un biais remirable un filme transgeneracional amb tirador.

Per exemple, dins la scèna finala, la situacion es intercambiada. Es pas lo sacrifici inuman d’Spock que salvarà la còla de l’Enterprise (coma dins lo filme d’82), mas lo sacrifici tròp umanista de J.T. Kirk, lo capitani (2013), e las doas scènas partejaràn de plans en comun. Encara la famosa frasa de l’Spock d’82, Los besonhs de la majoritat despassan los besonhs de qualques unes”, que marca la fin del filme, serà tornada prene a la debuta del filme de 2013. En 1982 èra J.T. Kirk que fasiá son crit plan conegut dels afogats: “KhaaaaAAn!” En 2013, es Spock.

Çò mai evident es aquela scèna incresabla ont l’Spock del filme de 2013, amb una frequéncia especiala, demanda ajuda a l’Spock de 1982 (qu’èra jogat per Leonard Nimoy) qu’es en el lo simbòl màger de la sèria. Amb aquela referéncia ultima saupèt amanhagar totes los afogats. Es probable qu’Harrison Ford o Mark Hamill, que son d’actors respectats pel public d’Star Wars, jogaràn la meteissa foncion.

Doncas o avètz comprés, amb Star Trek: into Darkness, J.J. Abrams balha la pròva qu’es capable de jogar a la perfeccion la carta de la “referéncia” a la primièra trilogia Star Wars e la carta de la “nostalgia”.
 

Criticas

La sola inquietud que demòra es que fin finala, pas un de sos filmes marquèt los esperits. Supèr 8 es un filme un pauc oblidat, e fòra son univèrs d’afogats e de son succès en sala, los dos Star Trek novèls demòran dins l’ombra.

Cal dire que J.J. Abrams es un bon imitaire. Compren lo cinèma que trabalha e s’arriba de tornar emplegar los elements essencials e esperats, arriba pas tròp, ça que la, de balhar sa pata e a far pròva d’originalitat. S’efectivament, dins Star Trek: dins l’escurina, lo mal es de totes los costats (çò qu’es una bona causa per un scenari coma lo d’Star Wars), lo demai del filme demòra un pauc “ja vist”. E passada la descobèrta del vièlh esperit encantador d’Spielberg, Supèr 8 pèrd rapidament de son interès.

Cal dire encara que J.J. Abrams ven de la television. E de còps se sentís que fin finala, los dos Star Trek novèls son benlèu pas que “dos episòdis” de doas oras, mai que de filmes complets e independents.

Aital avèm qualques dobtes ça que la. Arribarà de far dels Star Wars novèls non pas d’episòdis un pauc “opcionals” dins una epopèia qu’es ja acabada? Arribarà de nos fargar quicòm d’interessant en mai de la bona vièlha referéncia nostalgica? I pòt aver de dobte.

 
Conclusion

D’acòrdi, la maquina del marqueting en plaça dempuèi mai de trenta ans farà son trabalh: Star Wars 7 serà de tot biais una reüssida màger.

Mas al nivèl artistic, al nivèl del contengut, agachar la filmografia de J.J. Abrams nos permet de comprene cossí aquel realizaire vos conquistarà lo 18 de decembre. J.J. Abrams, lo 18, nos tornarà servir un cosina ja plan mestrejada. Dins l’èime, dins la ligason amb lo passat, la referéncia, etc., la filmografia d’Abrams nos permet de comprene que n’es lo mèstre.

Aital la sola question vertadièra que demòra, e que benlèu deu far autoritat dins l’èime de l’espectator, es de saber se, òc o non, J.J. Abrams es arribat de portar quicòm de novèl e de vertadièrament interessant dins aquel univèrs de Star Wars que, ailàs, dempuèi qualques annadas, es un pauc mòrt[5].
 



[1] Ne parlar pas valdriá a dire: manténer la lenga nòstra sus una broa artificiala, seriá la manténer fòrabandida.

[2]
Vejatz, dins lo Jornalet, nòstre article sus “Mad Max: Rota de la Fúria” http://opinion.jornalet.com/guilhem-tomas/blog/1492/mad-max-rota-de-la-furia

[3]
Sus aquela critica, vejatz las criticas de “Mr. Plinkett” de la còla de Redlettermedia.com. Sas criticas, negativas, son ara reconegudas coma fasent autoritat. [http://redlettermedia.com/plinkett/star-wars/] Atencion, las vidèos son en anglés sens sostitolatge. Coma se fa ara dins la “novèla critica vidèo” sus Internet, aquelas criticas son a l’encòp seriosas e umoristicas, e establidas pel biais d’un personatge fictiu, aicí, Mr. Plinkett.

[4]
En França avèm pas tròp conegut l’influéncia d’aquesta sèria bèla. Star Trek es 5 sèrias televisadas: Star Trek, Star Trek Next Generaton, Star Trek Voyager, Star Trek Deep Space Nine e Star Trek Enterprise. Es mai o mens 17 sasons. Star Trek es tanben dotze filmes. Star Trek a d’afogats per tota la planeta e sos personatges son emblematics: J.T. Kirk, Sénher Spock, lo Doctor McCoy, lo Capitani Jean-Luc Picard, Data, Geordi, etc.
 
[5] Aquò’s un jutjament personal que prendriá de temps de desvelopar. L’univèrs d’Star Wars se desvelopa tanben per de sèrias, de bendas dessenhadas, de romans, mas tanben de videojòcs —totun fa d’annadas ara qu’un bon videojòc dins l’univèrs d’Star Wars es pas sortit—. Las sèrias, de nòstre vejaire, an una qualitat magra.



publicitat
BANNER1: IEO Arièja



Comentaris

7 de decembre 15.10h

#1 Quand legissi tos comentaris, pòde dire que ne'n risi ben! Mesme per un article que tracha de StarWars pòdes pas t'empachar de parlar del Coran! Aquò's talament ridicul qu'aquò me'n fa rire. Aquí tanben es la prova que se pòt escriure tot en occitan... Quitament de causas tant comicas e inutilas coma las tieunas!...


Valora aquest comentari:   votar positiu 4   votar negatiu 1
Respondre comentari replica Comentari inadequat   Formulari d'abús de comentari

6 de decembre 15.41h

A ieu m'agradan fòrça los articles de Guilhem Tomàs.
Pòrtan un pròva de mai que podem e devem parlar de tot en occitan, inclós del cinèma american.

Star Wars es un sèria geniala. Me triga de l'anar vistalhar al cinèma.
Mercés Sr. Tomàs de me donar encara mai envaja d'i anar.

Visca lo desposcatge de la tematicas occitanas e visca la science fiction!


Valora aquest comentari:   votar positiu 8   votar negatiu 2
Respondre comentari replica Comentari inadequat   Formulari d'abús de comentari

6 de decembre 11.42h

#1 e 3, primàrias vostras reaccions son. Clericalas un pauc, perèu.


Valora aquest comentari:   votar positiu 10   votar negatiu 1
Respondre comentari replica Comentari inadequat   Formulari d'abús de comentari

6 de decembre 11.31h

Me triga eth 18 de seteme entà anar ath cinèma! Qu'era fòrça sigue damb vosati!


Valora aquest comentari:   votar positiu 3   votar negatiu 0
Respondre comentari replica Comentari inadequat   Formulari d'abús de comentari

5 de decembre 22.13h

Mercés per aquel article.
Quin mesprètz de qualques comentators per las òbras de l'imaginari, "la folle du logis" coma se ditz en francés, en general, e la sciéncia-ficcion en particular, tipic dels franco-formatats e dels intellectuals franceses. La sciéncia ficcion es al meteis còp de cultura populara e avant-gardista, cal èsser colhon o ignorant per fotre tot a l'escobièr.
A ieu, m'agradan aquelas òbras, mai que mai Star Trek, e es lonh d'èsser tant colhon coma fasètz cara de cre... Legir la seguida


Valora aquest comentari:   votar positiu 11   votar negatiu 1
Respondre comentari replica Comentari inadequat   Formulari d'abús de comentari

5 de decembre 19.04h

Bonjorn a totes,

Veni respondre als diferents comentaris.

Primièrament voldriái mercejar la correccion. En tornant prene mon tèxt i aviá fòrças decas. Ça que la compreni pas tròp los "d'Star Wars" o "d'Star Trek". Se efectivament a l'oral s'ausís aital, a l'escrich me sembla qu'es diferent.

Segondament, aquel article se vòl tanben coma una provocacion. A vos de jutjar. N'i a que tomban dins la trapa. Va plan.

#2
1) Glorifiqui res. Sètz liures d'anar véser lo filme o pas. Persona... Legir la seguida


Valora aquest comentari:   votar positiu 10   votar negatiu 1
Respondre comentari replica Comentari inadequat   Formulari d'abús de comentari

5 de decembre 15.28h

#5 star trek o star war. desencusatz me mas ai mai vist aqueles films. Sabi pas se i a una diferéncia.


Valora aquest comentari:   votar positiu 0   votar negatiu 1
Respondre comentari replica Comentari inadequat   Formulari d'abús de comentari

5 de decembre 15.21h

#4 Es normal e es per respecte a la cultura americana que siam envasit a la television francesa de fuelhetons e serias americanas, doblats, sens cap interés, en "prime time" e que n'i a pas cap emission de ficcion, de reportage o de documentari dins las autras lengas del territori de l'estat francés?

Ara, agachi mai la television a 20 oras 30. Abans podia véser Tv3 e 3/24 mais la Generalitat a suprimit , per econòmia, la difusion a l'estranger, per satèlit, d'aquestas cadenas.

En t... Legir la seguida


Valora aquest comentari:   votar positiu 1   votar negatiu 4
Respondre comentari replica Comentari inadequat   Formulari d'abús de comentari

5 de decembre 14.33h

#1 #3 I a pas de cultura superiora ni inferiora. Existís pas una "soscultura ianqui": es un concèpte racista e illogic. Totei lei país dau Mond an de culturas ricas, divèrsas e interessantas. La sèria Star Wars es un produch culturau respectable, amb una granda celebritat mondiala, e es normau de ne parlar aicí en occitan. Òsca per aqueste article.


Valora aquest comentari:   votar positiu 13   votar negatiu 1
Respondre comentari replica Comentari inadequat   Formulari d'abús de comentari

5 de decembre 13.11h

#1 Totalament d'acòrdi ambe lo comentari de Savonarole.
Ai pas pogut legir dusca a sa finala, l'article d'en Guilhèm Tomàs onte glorifica aquesta americanada.
A Occitània, avèm las nòstras tradicions. I a pas mèstier de la jos cultura dels ianquis. Aquò es pas passadisme. En çò nostre, se fa cinema de qualitat, quitament de sciéncia-ficcion par exemple los films de la " Mòstra del cinema occitan".

Per Nadal, valdria mai anar véser la Pastorala Maurel, los Nadalets o, en Catalonh... Legir la seguida


Valora aquest comentari:   votar positiu 2   votar negatiu 5
Respondre comentari replica Comentari inadequat   Formulari d'abús de comentari

5 -10 -20 -tots
1
-
2 >




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat
BANER3: Ràdio Occitània

Perfil

Guilhèm Tomàs

Guilhèm Tomàs logo rss

Mastèr 2 de recèrca en sociologia de l'Universitat de Tolosa Lo Miralh

mai d'informacions

contactar l'autor

Mai d'articles

Archius




D'autres articles


Jornalet, gaseta occitana d'informacions