Bandièra01 1180x150: Comuna de Tolosa

Opinion

Eth “General César” torne a caushigar era Val d’Aran

Bossòst
Bossòst
Iñaki Delaurens

Iñaki Delaurens

Licenciat en Periodisme e Torisme. Damb er objectiu d’especializar-se en Nau Periodisme damb es ans, escriu tath Jornalet conscient dera importància der aranés en entorn sociau e comunicatiu dera Val d’Aran.

Mai d’informacions
Era jornada de Sant Jòrdi ja a passat… es ròses se comencen a quèir d’un pòt de veire damb dus dits d’aigua situat en un cornèr deth minjador. Se tornen vielhes, lèges e pèrden era magia qu’auien dimars. Es libres estreadi eth dia dera mòrt deth drac ja son part deth mobiliari dera cramba. Acumulen povàs en bèra estatgèra perduda dempús de liéger-ne es prumères huelhes. Fòrça d’eri meriten aguest destin… donques era produccion a cistelhades de libres en aguestes dates capvire aguesti articles de cultura en congelats deth supermercat. Mès entre es calamars rebocadi e es tavelhes tanben se trape un shinhau de caviar de qualitat: Juan Blázquez “General César” y Lola Clavero.
 
Eth mètge Joan Carlos Riera Socasau presentèc eth passat dissabte 20 d’abriu en Ajuntament de Bossòst un libre que recuelh era vida de Juan Blázquez Arroyo e era sua hemna, Lola Clavero. Narre coma un mainatge, dempús dera mòrt de sa pair, auec de partir dera Val d’Aran, e ath cap des ans tornèc coma alcalde de Bossòst as pòrtes dera Guerra Civil. Per diuèrsi ahèrs que conde eth libre, partic exiliat en disparièrs païsi: França, Checoslovaquia e eth Marròc. Entre miei d’aguesti viatges, enamorat dera sua tèrra tornèc ath pòble de Quate Lòcs a rason dera “Operación Reconquista”, a on ère coneishut, entre es maquis, coma “General César”.
 
Hè apuprètz un an, Joan Carlos me didie, en tot préner un cafè en Figueres –luenh des nòstes arraïtzes–, que “mos tòque as aranesi condar era istòria d’Aran”. Damb aguesta premissa dant-li torns peth cap, temps en darrèr er escrivan bastic Castèths medievaus dera Val d’Aran, ua trabalhada recèrca sus 29 fortaleses deth país. A mès, ena madeisha linha d’investigacion, tanben ei autor de diuèrsi articles e charrades relacionadi damb eth nòste passat.
 
Era presentacion deth libre coincidís damb Sant Jòrdi. Eth moment de mès mau hèr entà que un autor desconeishut gaudisque d’un shinhau de protagonisme. Son dies entà qu’es peishi gròssi, joguets enes mans des sòns editors, les aumplisquen es pòches. Mès aguesta manca de difusion non rèste valor ath trabalh qu’ath long de fòrça ans a desvolopat Joan Carlos. Atau qu’en tot demorar qu’arribe a fòrça lectors, entre volums pleï de povassèra e flors sense perfum, s’amague un petit e important episòdi dera istòria d’Aran.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Guiu L'Escarea (Montanhac)
1.

Bèla presentacion que doa envèia de legir aquer trabalh de formiga e de ren lo laissar pilhar lo pols sus l'estatgiera. L'estòria nostrala la coneissem ren pron. Car que i ague de causas ansin da pertot en cada paisòt d'Occitània !

E carria tantben pensar a actualisar l'estòria generala d'Occitània.

  • 1
  • 0

Escriu un comentari sus aqueste article