Dimècres, 29.9.2021 03h00
Coma o sabètz lo mes de setembre es la debuta vertadièra de l’an novèl plan mai que la debuta oficiala. Cambiar d’an en quauquas minutas tre que pas res càmbia, es pro artificiau.
Au contre, aquí i a un temps de pausa pro long entre l’an vièlh e lo novèl que s’aprèsta dins l’estiu. Es temps ont las institucions alestisson las règlas novèlas. Lo gas costarà mai, tarifas e allocacions càmbian, los mèdias modifican lors grasilhas de programas, es la debuta de l’an literari, teatrau, te sabi ieu. Es plan l’estivada que parteja las annadas.
Adoncas espèrs e desirs de bona annada a totis.
Per las lengas istoricas coma nòstra lenga d’òc, l’actualitat serà cremanta aprèp la Fatwa contra lor emplec dins las escòlas, Fatwa dau conselh constitucionau.
Amb aquò l’an serà tot de fèbre politica per l’eleccion màger, la presidenciala, temps pesugàs de polemicas laiantas.
Per far contrapè qué de melhor que de començar l’an amb un libre excellent, Dorotèa, de Georges Nespoulous? Es editat dins las doas lengas per “L’Aucèu Libre” que fa de tan bon trabalh d’edicion.
Un roman originau dins sa forma qu’es l’enquèsta d’una jove professora d’istòria sus la Resisténcia e tanben sus sa familha. Una lenga modèrna, plegadissa, que parla d’aise de tot e conta nòstre temps amb una naturalesa que fa sentir qu’es encara e sempre la lenga normala d’aquel país. Dorotèa, un grand plaser per prene lo vam de l’an novèl.
 | NESPOULOUS, Georges. Dorotèa - Dorothée. L’Aucèu Libre, 2021. 280 paginas, 15 èuros.
 |
Comentaris
29 de setembre 22.39h
#2 O "condamnacion inquisitoriala", per exemple…
Valora aquest comentari:
0
0
29 de setembre 21.55h
#2 Saique "PATWA" ?
Valora aquest comentari:
1
0
29 de setembre 12.05h
Fatwa = i deu aver segurament un mot occitan per o diser ? Cresetz pas ?
Valora aquest comentari:
0
0
29 de setembre 09.22h
Fatwa contra lor emplec dins las escòlas, Fatwa dau conselh constitucionau ? I cal veire mai larg, cresi. Aquela "Fatwa" truca de front tot çò reputat inutil o non-profieitós a brièva escasuda. L'enemic non es simplòtament l'anti-multi-culturalisme. L'enemic es despuèi al mens 1983 — e en subre d'aiçò, plan segur — l'utilitarisme neoliberal e, per Euròpa mai que tot, ordoliberal.
Una sola lenga per o far tot, per o ordenar tot, per o comandar tot e per o vendre tot, aquò es comm... Legir la seguida
Valora aquest comentari:
2
0
1
Comenta
Lo comentari es estat mandat corrèctament
4 comentaris
En cargament
4 comentaris
Mandar
