Bandièra01 1180x150: Comuna de Tolosa

Opinion

La Circulara 2021

2021 fuguèt una annada d’excepcion per las lengas istoricas e autoctònas dau país, e s’acabèt amb la publicacion au Jornau Oficiau lo 16 de decembre d’una circulara novèla per lor ensenhament.
 
Las circularas son de tèxtes fòrça tecnics d’instruccions que son mandadas pel ministre aus servicis per l’aplicacion das leis e reglaments que son plan sovents escurs e complicachs.
 
Atau lo ministre indica pel menut sa politica.
 
De circularas se ne fa gaire per nòstras lengas. La darnièra èra d’abriu de 2017. La ministra Vallaud Belkacem, donava sas indicas d’accion un mes abans de partir, un mes abans la fin dau mandat de Hollande. Aquò’s segur de trabalh seriós!
 
La novèla circulara fa 7 paginas conflas de caractaris plan pichonets qu’es un regal de lectura. Pamens val lo còp.
 
Lo contexte èra lo de la lei Molac e de la desastrosa decision dau Conselh Constitucionau contra los accents e l’immersion. Decision talament capbordassa qu’entrainèt una reaccion mai que viva de sosten a l’immersion dau quite President de la Républica e l’engajament dau Primièr Ministre.
 
Atau i aguèt una concertacion jamai vista per la redaccion d’una circulara amb los oficis das lengas emai amb las associacions immersivas.
 
Fin finala i a d’avançadas nètas.
 
L’immersion reconeguda coma metòd pedagogic se poirà far dins lo public e contunhar dins l’associatiu coma Calandreta e Bressòla. Demai ara de lengas novèlas coma lo francò-provençau, lo flamand o lo picard se poiràn ensenhar.
 
Mas una circulara securiza pas vertadièrament. Ara l’accion serà de ganhar un vertadièr Segur de nòstras lengas, es a dire cambiar la Constitucion.
 
 
 
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Franc Bardou
1.

Una circulària, efectivament, non securiza vertadièrament pas res per res, que degun non es tengut legalament de la metre en actes.

Ara l’accion serà de ganhar un vertadièr Segur de nòstras lengas, mailèu qu'un Montsegur de mai, es a dire cambiar la Constitucion per poder establir non pas mai una circulària de mai, mas enfin, una lei.

Demorarà alara de saber cossí, amb quin personal disponible, la metre en actes concrets, pertot sul territori occitan, de Niça a Baiona ,per tot Lemosin e per tota Auvernha…

  • 2
  • 0

Escriu un comentari sus aqueste article