Dimècres, 8.12.2021 03h00
La campanha de la presidenciala es partida d’un biais frenetic per la seguretat. Los mèdias son claufits das declaracions fulgurantas d’un fum de candidats enferonits denonciant lo daissar-far de la justícia. Es l’encant per anonciar mai de plaças novèlas dins las presons e aquò es la sola politica dau lotjament qu’ausiscam.
E au mitan d’aquel bramadís se publiquèt la setmana passada una tribuna contra l’anar de la justícia, signada per mai de 5000 magistrats. O fan! Plan mai de la mitat daus jutges, vaquí un eveniment bèl, qu’aqueste monde son pas de la mena agitada o portada a faire d’espets (nimai portats a l’estrambòrd joiós!)
Dison “Nautres magistrats, volèm pas mai d’una justícia qu’escota pas e cronomètra tot”. Lo contrast es totau amb la cridadissa que jamai parla dau fons, das condicions de la justícia. Aquò per poder contunhar incantacions e sisclaus que fan l’audiéncia.
Lo fons es aqueste: i a aviá 8600 jutges en 2018 e uèi 9000, primièra augmentacion dempuèi de decadas. En 1900 n’i aviá 8200 per 39 milions de franceses e ara sem mai de 67 milions.
E la societat de fa mai d’un segle èra plan mens judiciarizada: los divòrcis èran rares, pas de còde de la rota, de l’environament, ges de justícia de la familha… Lo nombre d’afars es vengut espantant. Sonque pel penal fuguèron 4,2 millions d’afars tractats en 2018.
En comparar amb la mejana europenca França a dos còps mens de jutges e quatre còps mens de procurors. E parlam de la mejana pas daus melhors.
Ve, la situacion de la justícia sembla plan la de l’espitau. I a quicòm que truca!
Comentaris
8 de decembre 09.12h
"En comparar amb la mejana europenca França a dos còps mens de jutges e quatre còps mens de procurors. E parlam de la mejana pas daus melhors." E la mejana europèa non es qu'una referéncia de las "liberalas", es a dire de dreita dura. Mancam de mai en mai crudèlament de personal de santat, per amor que son de mai en mai maltractats (pression rendabilista "liberala"), de professors (e non parlem de l'ensenhament de las lengas ditas "regionalas"), de servicis publics e totun, la campanha el... Legir la seguida
Valora aquest comentari:
5
0
8 de decembre 08.26h
La justiça, l'ospitau, l'escòla, lo scientific tots dau monde que se trompan jamais. Son dau monde qu'aurian dins lòr especialitat tots los poders dau monde.
Pertant son tots de las victimas que devan obeissença aus poders en plaça coma lo poder politic qu'a p'un poder mesme si essaia de far creire lo contrari. Devan obeissença aus poders economics e financiers au detriment de la justiça e daus servicis publics.
Valora aquest comentari:
2
0
1
Comenta
Lo comentari es estat mandat corrèctament
2 comentaris
(5 vòtes)
En cargament
2 comentaris
Mandar
