CAPÇALERA: publicitat jornalet
CAPÇALERA2: FAI-TE SOCI

Jornalet, gaseta occitana d'informacions

Dijòus, 19 de setembre

Joan Loís Racouchot

Dissabte, 1.2.2014 03h00

La “bunkerizacion” de Provença


Comentaris 8 comentaris    
Dolent Fluix Bo Molt bo Fabulós (2 vòtes)
carregant En cargament


Fa un desenat d’ans comencèt un fenomèn tras que novèl que pausa question sus l’èime de la societat provençala: la bastison de parets per enclaure los ostals, mai que mai en los lotissaments.
 
Abans aquò, èran enclausas las villàs d’una paret bassa amb una grasilha metallica que li corrià dessus, de còps que i a esconduda per una boissonada , un reng de tuèits o d’aure; èra pas totjorn plan polit mas “passava”! Baste que lo monde se sentission aparats dels agachs e pas mai; e puèi tot per un còp, d’unes que i a comencèron de derrabar la grasilha per li bastir una missanta paret de cairons en plaça; de còps que i a rebocada, e encara pas tojorn de biais! Mas la màger part del temps, laissada en cairons bruts amb de traucs; sovent montats per de chapacans. Aquò fa que las carrièras semblon de mai en mai d’esgots que se lai veson quasiment pus los ostals, se que non lors teulissas; e aquò balha un sentiment de ni fach ni a faire,  un costat pesolhós, plan luènh de l’imatge que se n’en fan lo monde de Provença.
 
S’escondon los estatjants, mas de qué? De l’agach dels passejaires? Dels atacs dels maufatans? Benlèu d’un pauc de tot aquò? Cossí explicar aquel replegament sus se?
 
Benlèu qu’es la pròva de la perda d’identitat de la region amb l’arribada massissa d’acampadís de l’Ubac de França, mai que mai d’urbans que son acostumats de s’embarrar en cò lor, e qu’an pas la mentalitat d’acuèlh de l’autre, que vòlon lo solelh e la piscina mas sens los provençals! E pasmens se sembla tanben d’èsser un biais de faire partejat pels natius que son contaminats per l’ambient general de paur de l’autre e d’individualisme consumerista e egoïsta, fasent d’una populacion fins ara duberta e sociabla, una còla de “gosta solets” mesfisós e paurucs.
 
En mai del replegament social, trasfòrma aquel embarrament los jardins en piscinas quand plòu, e en Provença, quand plòu, es a farrats  Per quand al securitarime, es a s’escacalassar!! Las parets aparan pas dels raubatòris, al contrari! Degun vei pas res de çò que se passa darrièr una paret! La periurbanizacion de las ciutats provençalas serà (e comença ja d’o èsser) lèu leprosa e prendrà de mai en mai l’aspècte de barris mal entretenguts e abandonats.
 
I a ges de plan d’urbanisme coërent, los ostals son bastits onte i a de plaça, los jardins an de formas fantasierosas, i a ges de placetas, de comercis, se costejan los estatjants mas s’ignòran coma dins un immòble; es la Provença fortificada, aquela de la paur, e de mai en mai, aquela dels lotissaments securisats, enclaus de parets nautas e de grasilhas, gardadas amb de portals barrats.
 
Aquela societat esclatada que se li codoisson richàsses e paurasses, forastiers e natius, espacis remirables protegits e zònas estraçadas, apauridas, doblidadas, amb una agricultura deroïda e una industria moribonda, non pòt menar en bona logica qu’al vòte FN que per mantunes natius, qu’an perdut lor lenga, lor país lor fiertat, ven una identitat de substitucion.



publicitat
BANER1-2-3: DGPL TRADUCTOR



Comentaris

2 de febrièr 01.10h

#8 Òc. E avètz de pistas per saber coma los recebre, aculhir e integrar ?


Valora aquest comentari:   votar positiu 3   votar negatiu 0
Respondre comentari replica Comentari inadequat   Formulari d'abús de comentari

1 de febrièr 22.40h

"De segur, tot aquò, es la resulta de l'arribada d'estrangièrs del nòrd de la Franca". Rasonament xenofòb. De Nòrdistas colhons s'en tròba tan coma de colhons locals. La conariá es equitablament partejada. Fariam melhor de se questionar sus nòstra incapacitat de los recèbre e de los integrar.


Valora aquest comentari:   votar positiu 3   votar negatiu 2
Respondre comentari replica Comentari inadequat   Formulari d'abús de comentari

1 de febrièr 17.30h

Es çò parièr en Lengadòc. Meteissa situacion! Per exemple, aici dins lo vilatge se pòt veire de barris entièrs completament emparedats. De nòstre costat, ensajam de far de la resisténcia en causa de la vista qu'avèm sus lo massis de Fontfreda. Pel moment, aquò va plan, sèm ajudats per un bèl probléma:vlas vinhas e la garriga apertenon a de successions tròp complicadas de liquidar: tant melhor!

De segur, tot aquò, es la resulta de l'arribada d'estrangièrs del nòrd de la Franca... Legir la seguida


Valora aquest comentari:   votar positiu 4   votar negatiu 0
Respondre comentari replica Comentari inadequat   Formulari d'abús de comentari

1 de febrièr 16.24h

Praubòt ! Provença n'a pas lo privilègi d'aqueras barralhas. Que hasom bastir, quaranta ans a, en dehòra d'un vilatjòt d'Òut e Garona [1500 pers. en 2011] (Gasconha). Ara, a l'entorn de nosauts, long deu camin que mia cap a bòscs privats, tot qu'es bastit e tots qu'an clausurat mei d'un damb muralhas.
N'èm pas sonque quauques uns sens barralhas, los prumèrs qu'an bastit, quaranta a trenta ans a !
E vertat es que, dins los bòscs privats, los ceps qu'apartenguen a tots !
Normau, qué !


Valora aquest comentari:   votar positiu 3   votar negatiu 0
Respondre comentari replica Comentari inadequat   Formulari d'abús de comentari

1 de febrièr 14.12h

#3

Youtube avent bloquejat lo vidèo, aquí sus Dailymotion

http://www.dailymotion.com/video/x1asinh_extrait-de-les-babas-cool-las-parets-de-peira_shortfilms


Valora aquest comentari:   votar positiu 2   votar negatiu 0
Respondre comentari replica Comentari inadequat   Formulari d'abús de comentari

1 de febrièr 13.26h

En parlar de parets, aquí un extrait chucós del filme "Les babas-cool", en occitan

http://www.youtube.com/watch?v=PG8i0-6jpCQ&feature=youtu.be


Valora aquest comentari:   votar positiu 3   votar negatiu 0
Respondre comentari replica Comentari inadequat   Formulari d'abús de comentari

1 de febrièr 10.05h

#1 "l'imitacion d'aquesta dinamica d'enclausament que ganha l'America tota"

per ce que veguèro personalament dals quartiers pabalhonaris d'Amèrica dal nòrd (Quebèc, Montreal e Otaua en particular) las maisons se costean, sensa miana de bòsc, ni paret de betum. Eventualament un pichin grilhatge bas, mas lo terren es dubèrt, sovent amb de pelenc e pòs quitament entreveire lo monde, que conoishon ren los contravents ailí.

Aquela opinion de primiera es fonsa. Ja que m'a passat davant sus ... Legir la seguida


Valora aquest comentari:   votar positiu 10   votar negatiu 0
Respondre comentari replica Comentari inadequat   Formulari d'abús de comentari

1 de febrièr 09.02h

Es un fenomèn plan dins l'èime provincial e a l'imitacion d'aquesta dinamica d'enclausament que ganha l'America tota. Explicar aquò per las mentalitats dels Nòrdistas me sembla asardós e pas apevat.


Valora aquest comentari:   votar positiu 4   votar negatiu 5
Respondre comentari replica Comentari inadequat   Formulari d'abús de comentari

5 -10 -20 -tots
1




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat
BANER1-2-3: DGPL DICTADES

Perfil

Joan Loís Racouchot

Joan Loís Racouchot logo rss

Autor de BD "Juli Omenàs", dessenha de camisets per "Macarèl", fuguèt un dels fondators de la Calandreta d'Aurenja.

mai d'informacions

contactar l'autor

Mai d'articles

Archius




D'autres articles


Jornalet, gaseta occitana d'informacions