Bandièra01 1180x150: Comuna de Tolosa

Opinion

E jo qu’accèpti

Eth sentiment m’apetitís. Que pensi ara fotografia deth Dimenge de Rameus de 1999, damb ma mair joena e en tot arrir deth temps que jo gigoti era pauma, tot innocent, damb es mèns cosins. Aquera fotografia tan preciosa ei sauvada en ua caisha d’estam en humarau coma s'amaguèsse eth secrèt dera joenessa eternau. En quines vacances que sigue auem passat de hèr 34 fòtos en una pellicula a lançar 2000 fòtos en un terminau mobil, coma era sopa de tomata que s'apilòte en limandes infinides, arrés les vò e toti les aborrissen. Era setmana passada anè a ua des melhores hèstes d’anniversaris des darrèri ans, e arrés prenec sonque ua fotografia. Era gent desbrembe es hilats sociaus enes moments que reauments ei erosa. Non confien qu'es fòtos prenudes damb eth telefòn les sauven eth secrèt dera joenessa eternau.

 

Es fotografies sauven era preséncia, jamès plus era esséncia. Un selfie, ua “pose”. Tan mès soent en solitari qu'en grop. Non ei vertat. Ei un simulacre. Ei coma mos vedem quan i soscam, çò que jo projècti ei çò que tu projectaràs en jo. Inventam era vertat enes fòtos que hèm pr'amor que ja èm embarrassats, ja non mostram aquera espontaneïtat que viuerà entà tostemp. Mès non cau. Es mobils an ua auta manèra de panar-mos era anma.

 

Per Internet ja cor un aute jo, un hantauma damb toti es mèns clics e toti es mèns likes, tanben un aute o dilhèu eth madeish damb tot çò que diden de jo, damb toti es insults qu'an dirigit ara mia persona en convèrses privades per Facebook.

 

Aqueri hantaumes an tostemp existit. Se neurissen des prejutjats e des rivalitats, ei era ombra de tu madeish en ua auta persona. Se’n ditz “egregori”, “Gregòri” entàs amics, e se hè fòrt damb era energia mentau qu'arremasse de toti es que i pensen e òc, a vida pròpria. Com quan vèsses mèrda ena mar e tota finís ena madeisha isla. Quan penses tanben enlordes.

 

Internet les materialize, as Gregòris, aqueres preséncies der inconscient. Seram entièraments responsables de çò que digam e çò que pensam, pr'amor que tostemp i a quauquarrés que mos escote. Google ei un des Gregòris mès importants, responsable de plan d’auti Gregòris e pensades hugitiues. Non auem pensat qu’entà que Google Home arrespone li cau escotar abans.

 

En vint-e-quate ores, es mies convèrses e es sues repliques seràn reprodusides en petiti sismografs hèti de membranes de carbon. E provocarè tèrratrems damb es mies pensades en aire. E ja cap de pensada non poderà cap èster retirada o esmendada, tot serà definitiu. Tot aquerò serà chucat per ua broma de tempèsta numerica damb frases literaus sorgides dera mia boca. Ja non poderè amagar-me ath darrèr d'un pseudonim, pr'amor qu'Internet me senhalarà as mèns companhs e ara mia familha entà qu'açò non passe, pr'amor que partejarà era mia bugada mès lorda damb era mia agenda de contactes, en escambi d'arren, en escambi de partejar mès donades mies qu'arriben eth doble de luenh en opcions publicitàries. E jo qu’accèpti.



Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Black Blòc Joe
1.

Mos like, ieu los doni al Jornalet, sonque. E ja me sembla de còps mai que pro… Dels GAFA, me mefisi coma d'una rèba o d'un ebola…

  • 7
  • 0

Escriu un comentari sus aqueste article