Russia se mòstra ofensiva dal temps dals Juecs Olimpics que se passan en cò de lor grand vesin chinés. I poirián aver de tensions dins l’Orient russo mas es ren lo cas aüra. 
 
Quitament se la galejaia dins que i son mai de chineses a Vladivostòc que de russos... 
 
De segur, los mèdias russos presentan los moviments de tropas russas al ras de la frontiera amb Ucraïna coma un drech, e presentan aquò coma una necessària defensa fàcia a una agitacion ‘occidentala’ (= oèst europèa e estatsunitana, perqué Russia es tanben per part en Euròpa). 
 
Alemanha ven d’aver lo sieu novèl Cancelier, e doncas a ren de posicions fòrtas coma èra amb l’estatura de Merkel.
 
França viu un periòde preelectoral estranh amb Macron candidat-non candidat amb lo reviscòl dals Gilecos Jaunes, de partits d’extrèma drecha que penjan devèrs Russia. Cal recordar que lo FN-RN de la familha Ar Penn deu totjorn remborsar las bancas russas.
 
Al nivèl europèu, convòi de la Liberat antirestriccions que fa camin aüra a Brussels... L’union europèa es ren una union politica fòrta e unanima. Doncas deblessa aquí. 
 
Aquisicion definitiva dal Donbàs après Crimèa? Particion d’Ucraïna prevista per Potin? Lo plan sonat Russia Nòva sembla de non s’aplicar realament. Las Republicas de Donetsk e Loansk non son restacaias a Russia. Russia sembla que las restacarà jamai. 
 
E Russia a paur subretot que l’adesion ucraïniana a L’OTAN permete als ucraïnians de reconquistar Crimèa, territòri russo, russsofòne (e tanben tatar) a l’origina... Regalat a Ucraïna per Crochev dins las annaias 1950 (mercés al passatge a Stalin per los decopatges merdics entre nacions sovieticas, veire en Carabag, en Asia centrala...). 
 
Los estats baltes an, per fortuna, tengut lo còup gràcias a l’aligança dins L’OTAN. Perqué un país amb 6000 militars qué pòl fàcia a l’armaia russa? 
 
E òc semblam tornats en temps de guèrra. Avans la guèrra freia. 
 
Nos remanda que jamai l’unitat ni l’avenir d’un país es aquesit. Remanda al fach que Cossòvo, Catalonha, Escòcia, Tibet, Carabag... la tiera de païses que luchan còntra d’ancians empèris es lònga. 
 
Mas d’un autre costat guèrra economica entre Russia e los Estats Units d’America per lo mercat europèu de gas. Gas russe via Nòrd Stream 2 un oleoducte dirècte de Russia a Alemanha per la Mar dal Nòrd, evitant Ucraïna. Gas de safre de Texas e autre estatsunitan via superbatèls sus la mar granda. 
 
Longtemps Trump volguèt empachar la bastison de Nòrd Stream 2.
 
De saber tanben que lo complèxe militaroïndustrial estatsunitan paga de mèdias e d’ancians diplomatas per far la promocion de la guèrra. D’industrials parlant d’un excellent segond trimèstre a venir en matèria de produccion d’armament. 
 
L’enfant de Biden es membre dal Conselh d’administracion d’una entrepresa gasiera... ucraïniana. Aquel de còup.