CAPÇALERA: HISTÒRIA DE LA CUINA CATALANA I OCCITANA
CAPÇALERA2: FAI-TE SOCI

Jornalet, gaseta occitana d'informacions

Divendres, 15 de novembre

Laurenç Revèst

Dijòus, 5.9.2019 03h00

Recòrdis d'enquistas


Comentaris 3 comentaris    
Dolent Fluix Bo Molt bo Fabulós (4 vòtes)
carregant En cargament


Trevar los chamins de Gavotina. Braconar la lenga. Se donar la pena per la trobar. E cu cercha tròba!
 
Annòt a la sosta de l'amic Glaudo Troin. Jornaias d'enquistas e seras d'amistat. L'ostalàs de familha. Los recòrdis e l'avenir. Las Arts tanben. Lo grasal e la recèrcha d'absolut.
 
Arrèst a la còla sant Micheu. De nèu. Los albergaires comprènon ren çò que sio vengut far. Peiresc, evocacion de Fabri de Peiresc e dal vilatge rebastit per de belgas.

Agachar lo laus de Castilhon despí Sant Julian de Verdon.
 
Granda bastia, Dinha, alberg de jovença. Impression de Grand Meaulne. De marginals, de barodaires. Ieu, solet. Navigo entre totes. Una frema que sembla una caraca cosina dins un canton coma dins un film dals Miserables de Victor Hugo. De lieches superpausats a breti.
 
A Baratièrs, Edoard nos acuelhe. De sera lo felen vòl agachar una partia de catch a la television. Lo paigrand li poiriá tant cuntar de causas. Mas sauprà ren. Passarà a costat. Pantais d'Estats units d'America.
 
A La Robina, un lotjament excellent. Un aras e tot es impecable. La mala plena de compras ja fachas per tenir la setmana. Captar una ràdio chinesa dal temps de l'enregistrament de la persona occitanofòna qu'enregistro.
 
A Barlas, enrodat de nèu al mitan d'alpinistas. Cercho autra causa que la montanha, lo mieu Everest. La lenga occitana.

Mancar de se prefondar sus lo chamin en esguilhar sus la nèu amb la veitura. Trobar un gropet de pangoniers simpatics que jugan a las cartas a Sant Vincenç das Fòrts.
 
A Chòrjas, un ancian qu'alberga de mond en cercha de reconversion. De mond an envasit lo sieu. Un pauc d'Africa o d'autra part. Mas sabon ren d'el. Ni de sa lenga. Ne'n saupràn ren. Pietat. Ai l'impression qu'es utilizat mas lo mond vòl ren çò qu'es el.
 
Sisteron, òste estandard, pròche de l'autovia. Impression d'èstre ont que sigue. Vivament tornar fòra. Sus lo terren.
 
A Vorona, la sosta de l'amic inestimable Arvèi a la Charreirassa. La vita de vilatge. L'ostalàs de familha e las istòrias. La musica.
 
Pròche Lo Perús, arribo, lo mond m'acuelhe. Un vendeire de maquinas de cordurar achaba de parlar per convéncer. Reparto amb de numeros de la revista Verdons.
 
A Sèrras, ai l'impression d'èstre a maison. Sio conectat sus Internet. Vau enquistar la vesina de l'alberg quasi. Consulto de recerchas fachas dins la region vesina sus lo vivaroalpenc.
 
Als limits amb Droma, juecs de bòchas. Païsatges de montanhas doças.
 
Al Poet sentiment d'aver perdut la lenga. Cerchar sensa trobar la persona perfiècha. Mas totes de bònas volentats, segur. Un pauc frustrat dins aquel sector de la valaia de Durança
 
A Briançon, ai l'impression que vau partir esquiar esto matin. Sio dins una cambra que sierve per los vacanciers d'ivèrn. La vista es bèla. Lo fòrt impressionant. La lenga i es mai dura de trobar.
 
A La Sala dins la valaia de Guisana un òme que m'a adobat de mòtes occitans que s'èra ja enavisat sus papier.
 
A Monestier los Banhs, un acuèlh "coma vai la bòta !".
 
A Nevascha, d'amont. Sentiment de fin. La fin. L'increïbla fin. Aver achapat lo nòrd. Coma, mendre segur, a Entrechau o a Mesèu aver chapat lo cambiament devèrs lo sud occitan.
 
Tot es lains la tèsta. Diaul. Ai l'impression d'aver viscut cent milas vitas en Gavotina.
 
 
 
 



 



publicitat
BANER1-2-3: DGPL TRADUCTOR



Comentaris

7 de setembre 06.26h

#2
País de Foish: "Quin va la bòta? Va plan quand tròta/Va plan coma l'ase quand tròta".


Valora aquest comentari:   votar positiu 1   votar negatiu 0
Respondre comentari replica Comentari inadequat   Formulari d'abús de comentari

6 de setembre 21.20h

"Coma vai la bòta". Pensavi qu'èra ua expression pròpi deu sud-gascon: "quin te va la bòta?". Qu'èi realizat qu'èra comuna tanben en catalan. E sauretz se i a d'autes parçans on seré emplegada?


Valora aquest comentari:   votar positiu 0   votar negatiu 0
Respondre comentari replica Comentari inadequat   Formulari d'abús de comentari

5 de setembre 20.40h

E que n'avets de rason en aquò de las mila vidas!!!!


Valora aquest comentari:   votar positiu 0   votar negatiu 0
Respondre comentari replica Comentari inadequat   Formulari d'abús de comentari

5 -10 -20 -tots
1




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat
BANER1-2-3: DGPL DICTADES

Perfil

Laurenç Revèst

Laurenç Revèst logo rss

Escrivan, traductor. Dialectològ, Doctor en lingüistica. President onorari dal Centre Cultural Occitan País Nissart e Alpenc.

mai d'informacions

contactar l'autor

Las mai...


Mai d'articles

Archius




Etiquetas

D'autres articles


Jornalet, gaseta occitana d'informacions