CAPÇALERA2: FAI-TE SOCI

Jornalet, gaseta occitana d'informacions

Divendres, 22 de febrièr

Joan-Marc Leclercq

Dimars, 12.8.2014 03h00

De la dificultat de demorar pacifista... sus Facebook


Comentaris 23 comentaris    
Dolent Fluix Bo Molt bo Fabulós (4 vòtes)
carregant En cargament


Ma murralha de Facebook es meslèu militanta. Los imatges de gatòts e los “medishòts” (ensai de revirada deu mot selfy) i prenguen pas una plaça de las granas. Pr’amor deu perfiu de mons ciberamics, s’i tròban sustot aficats sorra-borra bilhets de propaganda a favor de l’occitan, de l’Esperanto, deu veganisme, de l’independéncia de Catalonha, de l’anarquisme, deu revengut universau, e informacions sus Iran o d’un grop de cultura jusiva o deus ucrainians de Tolosa.
 
Après una debuta d’estiu on superavan largament los tèxtes en portugués relatius a la copa deu monde de butabala, lo conflicte israelopalestinian se vengó convidar sobtament au mes de julhet e comencè de concurrenciar lo d’Ucraïna abans de nos negar d’informacions, de cridas e de propaganda.
 
De l’aute costat, l’espotiment de l’avion deu vòl MH17 prengó tanben una plaça de las bravas pr’amor deu juste esglàs que causè. Dens la setmana que seguiscó lo crash e l’acús tant per tant amagat de la diplomacia americana, informacions mès hòlas se crotzèn dambe un ritme sostengut e la frèbe be gahè la telaranha coma rarament per abans.
 
Ende hèr lo punt sus l’ahar un còp la tension caduda, cau saber que duas versions s’opausan:
 
— la deus Occidentaus qu’imputan la responsabilitat aus rebèlles de l’arribèra deu Donetz sostenguts per Rússia. Dison que seré estat un missile sòu-aire tirat dempuèi lo parçan qu’aucupan. Balhan coma pròva un enregistrament entre dus rebelles que comentan l’espotida per telefòne lo jorn medish.
 
— la deus Russes qu’acusan un avion caçaire ucrainian que seré estat apercebut e notat per contrarotlaires aerians espanhòus, en tot muishar que l’enregistrament mencionat mès haut seré un montatge (mès de duas votzes diferentas, sus Internèt se pòt legir la data de fabricacion que seré la velha e non pas lo medish dia)
 
E doncas podètz imaginar una murralha de hialat sociau assautada per imatge de dròlles de la listra de Ghaza* mòrts e sangplapats (deus quaus cau notar uns imatges de Siria reciclats), pròvas de mau verificar que lo Hamas se servís deus dròlles coma de paveses umans (tanben filmòts de Siria reciclats), de manifestacions d’Israelians a Tel-Aviv contra l’ataca de la lor armada, de rebelles ucrainians que panan l’aur suus còses inanimats de la victimas de l’avion, articles qu’explican que los rebelles an pas panat l’aur de las victimas, mès sustot la palma que se’n portè lo Vladimir Potin, l’estela de l’estiu dambe caricaturas de totas que’u mòstra en Hitler, en ors, en caçaire d’avions, en Hannibal Lecter, etc …
 
Cau díser qu’i avó duas maishantas setmanas quan las violéncia graficas e verbalas e l’òdi atenhón los soms.
 
Adara, la dificultat d’estar pacifista s’exprimís dens son esplendor tota. Au moment de commemorar la mòrt deu gran Jaurés, totis son mès pacifistas que non pas los autes. Mès quan un conflicte navèth se perfila, los pacifistas son qualificats de “behelants”.
 
Vaquí doncas, ende estar clar, çò que pòt estar la posicion pacifista suus conflictes màgers de l’estiu 2015:
 
— Ucraïna es l’enjòc d’una rivalitat entre dus imperialisme, lo deu vesin rus e lo deus Estats Units, qu’es pas brica lo vesin mès que s’es entitolat solet “gendarma deu Monde”. Nosautes sèm dens l’esfèra d’influéncia d’aquestes e totis los mèdias son ligats a la difusion de propaganda a lor favor. Lo ròtle deus Occidentaus es doncas estujat (finançament deu Maidan, ajuda militara, manòbras au ras deu territòri rus) e demòra pas sonque l’escenari deus Ucrainians contra los Russes. Aquò minora pas l’imperialisme rus, mès renvia los dus camps a egalitat.
 
— La guèrra dens la listra de Ghaza* es pas una luta de Jusius contra Arabis, mès de pòbles contra los poders. Los bellicistas de cada costat (Hamas, govèrn actuau israelian, Bibi Netaniahu purmèr) son aliats objectius e an besonh de l’aute ende guardar la man sus son pòble pròpri. La paur e la violéncia es un motor de manipulacion deus ciutadans. Totun, sus la telaranha, l’accion #JewsAndArabsRefuseToBeEnemies coneish una escaduda interessanta e es la pròva que totis seguissen pas lo ritme guerrièr au pas comptat. Es una galeria de fòtos que muishan monde de las duas comunautats dens una actitud amistosa, a còp amorosa (quitament dus òmis, duas hemnas o cobles mesclats).
 
Ténguer aquesta linha es pas simpla. L’òdi e la paur son de bon semiar e sovent los bellicistas son pas sonque personas normalas que floishan davant l’argumentari bellicós. L’engana mès tarribla estó la de la fòto deu rebelle ucrainian que tenguèva a la man un orset de peluisha au miei deus brigalhs de l’avion malaisian en la muishar aus fotografes. La legenda disèva: “Un terrorista mòstra fièrament lo trofèu de l’avion qu’an hèit càder.”
 
Quan se vei lo filme sancèr, la mentida es tot simplament monstruosa: lo tipe depausa lo joguet delicatament on l’avèva pres, se tomba lo capèth, hè un signe de la crotz e una petite pregària en memòria de las victimas de l’accident.
 
Se tenguètz un tau discors tròp de d’ora, es a díser quan los esperits son encara cauds, vos podètz hèr aperar, coma jo, per totis los lèds noms: a l’encòp sosteng de dictator, fascista ucrainian, comunista, terrorista, tanvau sionista o antisemita se cau.
 
Lo problèma veng de çò que lo monde plan sovent es pas dens l’analisi mès dens la peleja e la polemica. Pensan que cau causir un costat e ensajar d’esglachar l’aute biaish de pensar per mots utilizats coma carris d’assaut.
 
La volontat de patz passa purmèr per se medish. Quan lo monde a reglat sons problèmas d’agressivitat e s’i escad de’s mestrejar, lavetz que pòt escotar l’aute e començar de’u comprénguer e sustot de véser que tot es pas sancèrament blanc o néguer (Evidéncia sovent enonciada mès pas jamès practicada).
 
Que cau tamben ac voler. Es una auta istòria.
 
 
 
_____
* M’estimi mès d’escríver Ghaza dambe una “h” pr’amor qu’es la transliteracion de la letra غ que’s prononça coma una “r” parisenca e que s’apèra ghaïn



publicitat



Comentaris

21 d'agost 16.46h

#22 Beròi dit. Que’m desavieni totun dab la "cauda" e sonque…
La resulta n’ei pas la medisha, justament. Se la societat evolueish, per exemple cap a mei d'umanisme, qu’ei precisament pr'amor de la libertat d'expression. A trucas de parlar la ideas que hèn camin, senon en çò deus gavidaires, au mensh hens l’opinion. Pr’amor d’aquò los Estats totalitaris que s’estiman mei lo “Ta gueule” que non pas lo “Cause toujours”.
Quan exprimim librament çò qui pénsam qu'am to... Legir la seguida


Valora aquest comentari:   votar positiu 0   votar negatiu 0
Respondre comentari replica Comentari inadequat   Formulari d'abús de comentari

21 d'agost 14.21h

#21 Aquò es una bona analisi. Soi d’acòrdi sus mantun punts, lhevat que hèi jo la diferéncia entre duas nocions que son solide ligadas e vesinas, mès de desseparar.

La definicion deu mot « democrata » per un govèrn vòu díser « que preng en compte la volontat deu pòble », vosautes pensatz a la nocion « que deisha parlar las opinions alternativas », çò que, ende jo, es diferent. Es la diferéncia entre « libertat d’expression » e « democracia ». Èi plan notat totun qu... Legir la seguida


Valora aquest comentari:   votar positiu 1   votar negatiu 0
Respondre comentari replica Comentari inadequat   Formulari d'abús de comentari

20 d'agost 12.27h

Per estar ua republica de barbozas que n’i hè pas bon càder au marigòt, a l’ora qui pàrlam França n’ei pas ua autocracia triomfanta e arroganta com lo regim deu Potin. En França los assassins que deven tuar a l’amagat, en sosmac, e ne s’arrecaptan pas lo poder dinc a l’an de la gratèra. Ne vòlen pas estar coneishuts e ne s’amuishan pas lo piet nud a caçar lo tigre mentre que la gentalha e plaudin. Tot aquò que poderé cambiar se daubuns e prenossin lo poder, mes n’ei p... Legir la seguida


Valora aquest comentari:   votar positiu 0   votar negatiu 0
Respondre comentari replica Comentari inadequat   Formulari d'abús de comentari

17 d'agost 22.17h

Soi completament d'accòrdi ambe l'article.
A l'occitan d'esquèrra russofòba (coma n'i a fòrça ) coma al jornalista liure( coma n'ia pas gaire) li pareis pas de creire que Poutine volga pas los missiles de l'OTAN al ras de la Russia ( coma n'i a jà dins Pòlonha o Estonia ), dins aquel pais qu'es lo còr del monde slava . Sovenèm nos de la crisi de Cuba! De que n'en dison los jornalistas del monde liure d'aquelses missiles . E ben n'en dison ren levat que Poutine es un dangièr ...... Legir la seguida


Valora aquest comentari:   votar positiu 0   votar negatiu 2
Respondre comentari replica Comentari inadequat   Formulari d'abús de comentari

16 d'agost 22.59h

#18 Soi plan d'acòrdi dambe çò que dises, sustot a la debuta.
Per l'idèia que lo poder rus pòt "eliminar" opausaires, es plan conegut, mès pensi que Robert Boulin, Coluche, David Kelly, François de Grossouvre, Jean Hedern-Allier, Pierre Beregovoy, Jean de Broglie, lo jutge Borrel, Fernando Pereira an de qué parlar dambe la paura Anna Politkòvskaia au paradís.


Valora aquest comentari:   votar positiu 3   votar negatiu 0
Respondre comentari replica Comentari inadequat   Formulari d'abús de comentari

16 d'agost 22.20h

Aquesta idea segon la quau i a tostemps duas fàcias tà tota istòria qu’ei drin arrosegada.
Jo n’èi pas nada rason particulara de preferir Ucraïna o Russia o Chechnia… mes ja constati que lo Potin n’a pas esperat ua crisi dab l’Oèst tad impausar la soa ponha autorn d’èth per mejan de terror, assassinats e justícia arbitrària.
E tà çò de díser que França n’ei pas mei democratica (o mensh dictatoriau) que Russia, qu’ac caleré explicar aus manes de la prauba Anna Poli... Legir la seguida


Valora aquest comentari:   votar positiu 3   votar negatiu 0
Respondre comentari replica Comentari inadequat   Formulari d'abús de comentari

15 d'agost 21.56h

Ah, me soi desbrembat quicòm :
Quan m'atz pausada la question : "Son los govèrns occidentals mai democratics que Russia o pas?", èi responut "Non pas". Atz cresut que volèvi díser que considèri que lo govèrn rus es democratic. Me soi benlèu mau exprimit. Ende jo, es pas lo govèrn rus qu'es democratic, son los govèrns occidentaus que ne son pas tampauc. Comprengui que's posca interpretar diferentament.
Mercés.


Valora aquest comentari:   votar positiu 3   votar negatiu 1
Respondre comentari replica Comentari inadequat   Formulari d'abús de comentari

15 d'agost 21.37h

Claudi,
Vos escalfatz fòrça, vesi, mès au mensh avètz l'aunèstetat d'explicar (au tresau còp) que vòstra amigueta es ucraïniana, çò qu'explica un fum de causas. Soi segur que sa sòr patís vertadèrament de la situacion e jo compatissi dambe las populacions deu parçan quin que sia lor camp. Sabi qu'es de mau comprénguer ende vosautes, benlèu.

Per contra, se tornatz léger mon article, veseratz qu'èi citat las duas versions de l'esglaish de l'avion d'un biaish egau, shens de'm tr... Legir la seguida


Valora aquest comentari:   votar positiu 4   votar negatiu 0
Respondre comentari replica Comentari inadequat   Formulari d'abús de comentari

14 d'agost 18.43h

Informar de la propaganda dels uns e dels autres, e dèissar lo liure arbitre al lector s'amerita lo respècte, qu'es pas corrent.


Valora aquest comentari:   votar positiu 5   votar negatiu 0
Respondre comentari replica Comentari inadequat   Formulari d'abús de comentari

14 d'agost 17.28h

#13 Solide l'engatjament politic es bon,, mès pensi qu'en mestior de geopolitica e de guèrra entre duas suberpoténcias, la manipulacion es pas jamès tròp luenh.


Valora aquest comentari:   votar positiu 6   votar negatiu 0
Respondre comentari replica Comentari inadequat   Formulari d'abús de comentari

5 -10 -20 -tots
1
-
2
-
3 >




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat

Perfil

Joan-Marc Leclercq

Joan-Marc Leclercq logo rss

Musician de profession, autor d’un líber de conversacion suu gascon, d'un roman istoric "Ucraïna", d'un diccionari de rimas e de duas pèças de teatre.

mai d'informacions

contactar l'autor

Categorias

Las mai...


Mai d'articles

Archius




Etiquetas

D'autres articles


Jornalet, gaseta occitana d'informacions