Bandièra01 1180x150: Comuna de Tolosa

Opinion

Flanby se’n va a la guèrra

Joan-Marc Leclercq

Joan-Marc Leclercq

Musician de profession, autor d’un líber de conversacion suu gascon, d'un roman istoric "Ucraïna", d'un diccionari de rimas e de duas pèças de teatre.

Mai d’informacions
E haut, una auta guèrra!
 
Aqueste còp l’ahar es seriós, François Hollande a decidit d’engatjar son país dens un conflicte militar (de mès) contra una organizacion terrorista qu’es “un dangèr immense ende la securitat deu monde sancèr”. (París lo 15 de seteme de 2014).
 
Es vertat que, dambe un efectiu estimat entre 11 000 e 31 000 sòcis, pas nat avion, pas nat pòrta-avions, pas nat satellit, pas nat dròne, un bon vielh arsenau de kalashnikov, benlèu un parelh de carris de combat panats a l’enemic, l’equilibri de la planeta se’n tròba minaçat.
 
Vòli pas minimizar lo fenomèn dens lo parçan de l’Orient Mejan, auratz comprés que’m trufi, mès nòste bon president auré pas drin exagerat, escauhat per son discors davant un polit ligòt de caps d’estats? O benlèu volèva parlar deu monde deu comèrci deu petròli, o quauquarren atau.
 
Solide qu’aqueste monde de DAESH, (navèth nom balhat ara peus occidentaus a l’Estat Islamic) per contra, son braves trencacòths que nos bremban plan lo quite periòde de la Revolucion Francesa shens totun de n’arribar a la medisha brava resulta.
 
La decision d’Hollande sembla pas geinar degun. Totun, sèm dens una negacion totala de çò qu’es la Cincau Republica que pervei dens son esperit que l’entrada de l’armada   francesa dens un conflicte armat sia au mensh debatuda per l’Amassada Nacionala. L’article 35 estipula plan que “la declaracion de guèrra es autorizada peu parlament”. Benlèu que l’intervencion actuala es pas considerada coma una declaracion, mès lavetz practicament es un president tot solet, sostengut per 13% deus electors, que preng la decision d’engatjar las fòrças armadas. Aquò deuré agradar aus amators de democracia.
 
Com cadun ac sap, a cada còp qu’un país a enveja de n’invasir un aute, e quitament s’es pas una democracia parlamentària mès una dictatura, a besonh de l’adesion deu pòble, se que non la causa demoraré tròp mauaisida. Es atau qu’am agut los ahars deu Lusitania (Los Estats Units podoren s’engatjar dens la Purmèra Guèrra Mondiala contra Alemanha), de l’estacion de relais ràdio de Gleiwitz (Hitler podere invasir Polonha), de las vedetas deu Tonkin (Los Estats Units podoren entervénguer au Viêt Nam), de l’operacion Northwoods (engibanada ende atacar Cuba mès pas apitada fin finala), de las coaderas de Koweït-City, de las armas de destrusida massiva, las armas quimicas de Siria, etc …, citi pas que los cases d’engana confirmats oficialament.
 
Doncas, lo racionalisme nos conselha d’estar mauhisants, a mac de’s hòraviar, sus tot çò que pòt semblar justificar tròp aisidament una intervencion.
 
Los crestians d’Iraq vivon solide un in·hèrn e son acaçats de lors ostaus, se refugian en Turquia dens camps de las condicions miserables. Les cau ajudar. Mès lors trabucs an pas començat dambe l’avançada de DAESH, mès plan abans, tre la fin deu regime de Saddam Hussein (dictatura, solide, mès on vivèvan en patz) e l’arribada deus Americans que signèc la debuta de lor malastre.
 
La descapitacion deus tres ostatges es pas acceptable d’un punt de vista uman, mès totun una question demòran:
 
Dus soldats libanés son estats tanben descapitats dens condicions fòrça semblablas, mès quin medium a relaiat l’informacion? Pas nat en çò nòste. Se pausa lo problèma deu prètz de la vida umana segon la nacionalitat (véser una cronica precedenta) o la tòca de difusir o pas una novèla.
 
DAESH a postat las vidèos sus la telaranha, mès totun es pas de bon trobar. La purmèra estoc hicada sus You Tube e non pas sus un siti islamic, a maugrat deu hèit que França sembla estar negada per propaganda djihadista, segon los especialistas deu terrorisme. La tresau se tròba suu siti de Search for International Terrorists Entities. Èi cercat uns dias shens de trobar ren, çò que vòu pas díser qu’i aja ren tanpauc. Lo siti deu Telegraph, qu’es pas particularament lo purmèr jornau complotista vengut, contestèc a la debuta la veracitat de la purmèra vidèo. Mès los filmòts estón totis autentificats per … la CIA.
 
En tot descapitar los ostatges, DAESH a agit precisament e clarament a l’encontra de sons intereses pròpris, coma se tiravan una bala dens lo pè. Vòli plan que sian pas estratègues d’engèni (çò que lo periòde recent mostra pas), mès quan as ganhar terrenh, te cau assolidar tas posicions, e executar ostatge end’obténguer una intervencion deus paises mès poderós deu monde sembla pas d’un entenement deus rafinats. D’aquiu una contorsion intellectuala deus jornalistas e de la cordèra “d’especialistas” deu terrorisme que se son seguits sus l’antena deus grans mèdias nacionaus ende’ns explicar que los djihadistas avèvan descapitat los ostatges ende qu’America entervenguèsse pas e qu’America devèva entervénguer pr’amor los djihadistas avèvan descapitat los ostatges. Me trufi pas, es la vertat.
 
En combàter DAESH en Siria, la coalicion va forçadament ajudar sons adversaris, es a díser l’organizacion salafista Front Islamic (conegut tanben devath lo nom Aleppo) que conteng uns elements d’Al-Qaida, o la Coalicion Nacionala, miada peus los Frairs Musulmans, declarats “terroristas” peus regimes d’Arabia Saudita e Egipte, aliats deus Estats Units dens la benaleja. De tot biaish, aquò va sembrar una aliança crestian-chiita contra los sunitas.
 
Vesi doncas que lo Flanby va s’amusar de plan e le desiri un bon plaser.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Maime Limòtges
11.

Per completar la reflexion, vos aconselhe de vos chaptar lo numero de Le 1 Hebdo totjorn en quiòsc (enfin dacia deman) e que se tròba (en partida) sus internet : http://www.le1hebdo.fr/

Avia 'gut coma font d'informacion nonmàs la ràdio e queu jornau m'aprenguet plen de chausas. Vos fau un petit resumat de çò qu'i aprenguei, de çò que m'interessei dedins :
- Quò comença per 'na cronica decapanta de Tahar Ben Jelloun qu'esita pas a denonciar las responsabilitats daus governaments american e arabes dins l'emergéncia de DAESH - e qu'apela a intensifiar la lucha contra lo califat
- Ben Jelloun es pas lo sol a denonciar la politica americana e iraquiana dins l'emergéncia de DAESH, que ne'n sembla una consequéncia directa
- mai d'un comentator dins le 1 nòta lo sosten de la populacion sunnita a DAESH, per çò de la politica antisunnita daus americans e daus iraquians, sosten que fai que lo territòri contrarolat l'es mai per los aliats sunnitas que per DAESH se mesma
- parlen tanben dau finançament de queu movement, per los reiaumes dau Golfe e mai per lo contraròtle dau petròli (que venden per exemple a Al Assad, quitament si son enemics)
- un element interessant es tanben lo fach que lo djihad, lo califat, qu'es mai que mai quauquaren a destinacion daus musulmans fanatics d'Occident, per que venian far la guerra. Quò es pas daus arguments qu'interessen la populacion locala (sunnita e que chercha un protector facia au poder iraquian), populacion qu'acceptaria mau los combatents estangiers (occidentaus o magrebins). E sembla que la pòrta d'entrada dins queu califat, lo hub dau terrorisme islamic qu'es l'aeropòrt d'Istanbol, ente transiten tots.

De que alimentar d-enguera los debats !

Per çò dau vocabulari, la reflexion d'Andrieu es interessanta. L'i avia pas pensat.

  • 0
  • 0
Joan-Marc LECLERCQ
10.

#8
Adiu lo Maime,
Pausas questions de las bonas que son interessantas. Vaquí las meas soscadissas :

1/ Las vidèos de descapitacions son tostemps estadas trobadas per un siti que s’apèla SITE (Search for International Terrorist Entities) e non pas dirèctament sus sitis de l’organizacion islamista au quau sabi pas se la premsa occidentala a accès dirèctament o se son interdits dens los paises de la coalicion. Se non, aquò que poderé explicar, se las vidèos son pas d’eths, (çò qu’es una supausicion) l’abséncia de comunicat de desmentit conegut, mès es vertat qu’es una bona question. Dens l’istòria de las manipulacions, los comunicats de desmentit d’Iran sus la faussa revirada d’Ahmadinejad o d’Iraq sus las armas de destrusida massiva èran estada tanben amagadas, çò me sembla, caleré verificar.

2/ A la debuta, pensavi a la possibilitat d’una execucion devath faussa banèra (Suu cinisme deu oligarques, la Rason d’Estat es totjorn la mès fòrta), mès sembla que sia meslèu una faussa execucion tot cort. Dambe un grossiment de l’imatge e un ralentit, se vei clarament que lo terrorista talhuca lo còth de l’ostatge 12 o 13 còps shens que n’i aja la mendra pichona gota de sang que chiscle, lavetz que la sang deveré estar devath pression dens lo còth.

3/ Quauquarren de desconcertant, es que, a la debuta de sa captivitat, lo jornalista american èra, segon los mèdias coma Libération, presonat de l’armada siriana regulara (la de Bashar El Assad) e que s’es retrobat presonèr de l’Estat Islamic, lor enemic, çò qu’es pas banau. Aqueste jornalista, quan èra en Libia, avèva estat dejà ostatge d’un grop pro-Kadhaffi e contava aus mèdias la medisha istòria.

4/ Suu hèit de manténguer la miaça islamica presenta, sèm plan d’acòrd, es geopoliticament una necessitat.

Vaquí, lo debat es dubèrt, podèm hornir elements pauc a pauc ende’s hèr una idèia.

  • 0
  • 0
andrieu
9.

L'autor de l'article e los comentaris parlan de "descapitacion" e jamai d' "escotelatge" quitament se lo resultat es identic. Perqué ?
Aquel refús de nomenar las causas autan en francés coma en occitan son lo rebat de nòstra societat.
La descapitacion, utilizada per nòstra societat civilizada fins a un periòde recent – sens parlar de nòstres amics revolucionaris franceses – garda, se se pòt dire, la dignitat de la persona.
L'escotelatge, emplegat fins a un periòde recent tanben pels animals, considèra l'èsser uman coma un animal bon pel masel.

Aguèssem lo coratge d'emplegar lo mot dins los mèdia o las conversacions, fariá ressortir un pauc mai la barbariá d'aqueles sembla-musulmans qu'an decidit d'impausar la terror e la mòrt al nom d'un libre que, ne soi segur, coneisson pas que per çò que lors líders an dich.


  • 0
  • 0
Maime Limòtges
8.

#7 Quauques elements de reflexion en responsa.

1) Sus las decapitacions : JM laissa pensar que lo fach que podem pus trobar las videos pòt dire que n'i a pas 'gut d'execucions. Adonc, quò vòu dire que nòstres oligarches son mai que cinics. Co qu'es pas fau. Mas quò vòu dire tanben que las familhas se son laissadas manipular. Son mòrts o pas quilhs ostatges ? Si an pas estats tuats per los islamistas, per qui ? E mai DAESH laissa dire la CIA sens ren far ? Onestament pense pas que los islamsitas se laissariàn manipular tanpauc per la CIA. Auriàn pas reüssit a far saubre a la premsa occidentala qu'an jamai decapitat degun e qu'es una manipulacion americana ?

2) Sus la fòrça suposada daus occidentaus : mila còps mai fòrt, tròbe pas. Mila còps mai equipat, mai nombros, oc-es, mas a faugut 10 ans per tuar Ben Laden, los Talibans son totjorn actius e Al Qaida es tornada naisser localament. Mila còps mai fòrt mas en jamai reüssit a estabilizar Iraq o l'Afganistan. Mas bon, benleu, vòlen pas, an pas d'interes a destrusir completament la menaça terrorista islamsita, nonmàs la mantener. E tut securizar l'aprovisionament energetic (petròli, urani).

  • 0
  • 0
Joan-Marc LECLERCQ
7.

Adishatz,
Soi plan content de véser qu’aqueste article lheve autan de vam, mès tanben de questions a las qualas vau ensajar de respóner.

1/ La comparason dambe la Revolucion Francesa era shens de dobte exagerada (un ensai d’esperit plasent, marcha pas a cada còp) mès veng a l’esperit tot simplament pr’amor los Presidents de la Republica, quin que sian, l’an tostemps en referéncia, e totun, lo periòde de la Terror estoc tanben un periòde de trencacòths. Aurí devut escríver « Terror » au lòc de « Revolucion ». Se volètz.

2/ Soi pas musulman, cresi quitament pas en Diu, soi atèu, me sentissi libertari e doncas soi a l’opausat de çò que pòt estar l’islamisme, radicau o pas. Aquò empacha pas d’aver un esperit critic de cap aus que son supausats nos governar e nos representar. Benlèu que’m caleré consacrar la mitat de l’article en criticar los fondamentalistas de l’Estat Islamic, mès pensavi sincèrament qu’i avèva pas mestièr, lo mèdias occidentaus ac hèn fòrça plan, mès tornar equilibrar lo debat en espiar çò que truca en çò deus autes. Dens una entrevista en çò de Jean-Jacques Bourdin sus RMC, Dominique de Villepin, ancian ministre deus Ahars Estrangèrs deu govèrn Chirac, que’s pòt véser aquí : http://www.mondialisation.ca/video-de-villepin-le-terrorisme-islamique-a-ete-cree-par-les-occidentaux/5403154 teng un devís haut o baish que va dens lo medish sens.

3/ Contunhi de pensar que díser que DAESH es « un dangièr endeu monde sancèr » es un biaish de legitimizar las accions d’intervencion. Solide que’s pòt debàter aquò. Vertat qu’anirí pas passar mas vacanças en çò lor (As rason !), mès endehòra deus parçans que tengon, me sentissi encara en seguretat, quitament a Tornafuèlha.

4/ Mantengui tanben la critica deu non-respècte de la constitucion peu president qu’es justament supausat n’estar lo guardian. Se pensatz qu’aquò es « justificar la barbaria », n’èi pas nat argument. Se Hollande avèva consultat lo parlament, aurí pas parlat d’aquò, mès ac hascoc pas. Au moment quan se parla de rigor budgetària, l’utilizacion d’un Rafale a 10.000 euros lo quart d’òra auré causat benlèu un petit debat dens l’emicicle, se pòt imaginar en tot conéisher uns deputats.

5/ Èi pas jamès escrit que las persecucions deus Crestians èran « la fauta » deus Americans, aquò qu’es una interpretacion meslèu liura, mès díser que’n pòrtan una part de responsabilitat me sembla pas exagerat. Èi pas sonque dit que los « Aliats » s’en renden compte ara, pr’amor que lo moment lor agrada, lavetz que los trabucs comencèn i a fòrça temps, a una epòca quan los mèdias ne parlavan pas. La frasa « l’arribada deus Americans que signèc la debuta de lor malastre » es pas faussa, mès solide que pòt geinar. L’invasion d’Iraq peus USA estoc una catastròfa e una destabilizacion per la region sancèra, díser aquò es pas mentir, vesi pas pr’amor lor caleré lhevar lor part de responsabilitat qu’es fòrça pesuga e que’s desbromba plan sovent.

6/ Per çò qu’es deus filmòts de descapitacion, pensavi drin pègament que citar Lo Telegraph m’assegurava d’estar pas qualificat de « complotista » mès vesi que pas brica. Avèvi totun precisat : « çò que vòu pas díser qu’i aja ren tanpauc » mès vesi que servís pas brica tanpauc. Se las autoritats umanistas an suprimit las vidèos, pr’amor suprimisson pas totas las vidèos islamistas que son una plaga vertadèra sus la telaranha e que servisson d’enregimentar los joens ? Las autas enganas d’invasion citadas son pas sonque cases averats, èi pas mencionat çò que hè debat.

7/ Una organizacion islamista radicala argeriana qu’a pres un ostatge francés que miaça de l’executar se França deisha pas de trucar lors companhs en Iraq. Aquò me sembla logic. Mès executar un ostatge e atau se privar d’una moneda d’escambi o d’un mejan de pression, e au contra balhar a las armadas mès poderosas deu monde un pretèxte ende’vs bombardar m’ac sembla mensh. Solide ne podèm discutir, la teoria de Maime me sembla fòrça sensada, mès totun contunhi de pensar que la necessitat de confrontacion s’estanca quan l’enemic es mila còps mès fòrt.

Doncas vaquí çò que podi díser de mès. Soi totun curiós de saber se totis los legedors deu Jornalet practican una pensada globala, es a díser « negra e blanca », de « s’ès pas dambe nosautes, lavetz ès dambe los enemics » o se, coma jo, ensajan de destriar las causas una per una.

Sabi plan tanben que la question de l’islamisme chepica mès d’un e es viscut coma una miaça, una patida o un dangèr, çò qu’explica que los debats sian a còps « mascluts mès corrèctes » coma los aimam en çò nòste.

Amistats a totis,
JML

  • 6
  • 4

Escriu un comentari sus aqueste article