CAPCALERA: la botiga

Jornalet, gaseta occitana d'informacions

Dimècres, 21 d'abril

Joan-Marc Leclercq

Dimars, 30.12.2014 03h00

Non combatam pas lo sistèma, contornegem-lo!


Comentaris 7 comentaris    
Dolent Fluix Bo Molt bo Fabulós (2 vòtes)
carregant En cargament


Dinc ad adara, benlèu sonque lo mahatma Gandhi ac avèva comprés.
 
Davant un adversari mès fòrt que non pas tu, ès pas segur de véncer, e doncas te cau mílhor estar mès finòt. Se que non, vas solide a la desbandada.
 
Es per aquò que’s desvolopa uei lo dia un corrent de pensada navèth que vòu lutar contra lo sistèma shens de l’acarar dirèctament mes meslèu en bastir quauquarren a costat. Aqueste biaish de concéber lo monde es ligat a un sentit ecologic fòrt. Lo constat que vam tot dret a benlèu una catastròfa se hasèm pas ren ende cambiar, s’i escad de mobilizar monde joens e motivats.
 
La tèrra occitana, rica de sas tradicions de susmautas e de dehensa de las libertats de pensar e de sa doçor de víver, es fòrça propícia aus desvolopament de projèctes d’aquesta mena.
 
Soi anat recentament visitar un amic parisenc que m’a susprés en me condar son projècte de se n’anar demorar au miei de las Cevenas dens un vilatge que se sonarà “La Ciutat Naturala” e qu’es encara de bastir. La tòca n’es de víver “shens de moneda” e d’un biaish ecologic. L’idèia estoc lançada sus la telaranha, numeroses volontaris se declarèn e un terrenh es dejà estat trobat, s’èi plan comprés manlhevat o balhat per una comuna plan contenta de véser navèths poblants reviscolar lo parçan.
 
Suu siti, d’on se pòt telecargar lo programa (www.lacitenaturelle.fr) se parla fòrça mès d’ecologia que non pas d’economia, mes la volontat de construsir quauquarren a despart deu capitalisme es present.
 
Volon bastir un vilatge de “geonaus”, en anglés earthships, en francés géonefs, sia: abitacions destinadas a l’autoconstruccion, dens la tòca d’apitar lotjaments que respèctan la natura a còstas mendras e autonòmas de las energias fossilas en s’apiejar sus la recuperacion e lo reciclatge de materiaus.
 
Lo programa pervei 1 mes de trabalh de bastida per ostau dambe 10 autoconstructors. 50 mètres carrats seràn disponibles per cada poblant e un casau de 100 mètres carrats serà assegurat.
 
Deu costat politic, aperat “ressorças umanas”, lo programma es pas tròp precís: “Nos perpausam d’organizar la gestion e lo part­atge de las tascas devath un fòrma cooperativa e re­spectuosa de las particularitats de cadun.” Lo mot mès important es “cooperativa” que’s pòt comprénguer peu monde qu’a un drin de coneishença sus las organizacions socialas.
 
Economicament, lo sistèma pensat es pas complètament ”shens de moneda” pr’amor que “en botar tot en plaça ende produsir los bens e servicis deus quaus am besonh … demòran encara dens lo monde actuau bens e servicis qu’èm obligats d’escambiar o de pagar.”
 
Per contra, existís dens lo programa una volontat de’s pairar deus sòus lo mès possible e d’apitar un foncionament sociau basat sus la gratuitat. Segon çò qu’es pervist, cau desvolopar l’autoproduccion, lo partatge, la recuperacion, la reparacion, la transformacion.
 
Los dinèrs serviràn pas que ende pagar (après estudis de las autas possibilitats): los materiaus de construccion, los produits culturaus, los servicis de léser, los desplaçaments, la santat e los utisses de totis.
 
Segon çò que’m digoc mon amic, las òbras van començar a la prima de 2015 ara que lo terrenh es trobat.
 
Me parlèc tanben d’un projècte pro similari de bastida d’un vilatge vegan, tanben en Occitània, mes avèva pas nat detalh aquò dessús.
 
Se ligam a tot aquò projèctes de la medisha traca coma lo movement Colibris o la Cooperativa Integrala Tolosana suu modèle de la Cooperativa Integral Catalana, o encara Uli Alto (au Bascoat), vesèm plan qu’un tipe navèth de transformacion de la societat es aviat shens de manifestacion ni rambalh per carrèras, demòra pas que de saber çò que vaserà sus la longor.
 
Mes au mensh es dejà concrèt. 



publicitat
BANNER1: IEO Arièja



Comentaris

3 de genièr 16.23h

Fasètz bien de tractar lo subjèct. Aquò nos pausa question e tant mièlhs.
Florir a costat de l'espinàs, lo mòl còntra lo dur : es una filosofia quò d'aquí, un biais de pensar amai de faire las causas.
Me siái avisat, mai d'una fes, qu'aquò donava a la gròssa melhora resulta. Vau mièlhs seguir sa via -mai siegue contrària- pròche "l'enemic" que non pas de se i acarar. Bombir las muralhas pòt entrincar en fàcia una reaccion de resisténcia testaruda amai d'ataca.
Mès de còps,... Legir la seguida


Valora aquest comentari:   votar positiu 1   votar negatiu 0
Respondre comentari replica Comentari inadequat   Formulari d'abús de comentari

31 de decembre 10.34h

Los sols babacols qu'aprengon la lenga en Arièja que coneishi son ... alemands.


Valora aquest comentari:   votar positiu 4   votar negatiu 0
Respondre comentari replica Comentari inadequat   Formulari d'abús de comentari

30 de decembre 18.41h

Tot aquo me ramenta Bodon, dins lo libre dels grands jorns, e son Marxilhat... S'acaba mau, se me soveno ben.
Sufis pas de far dins son canton coma se lo capitalisme existava pas per qu'accepte de desaparéisser. Lo fach qu'aquelos que se lançan dins aqueu tipe d'entrepresa sieien o pas occitans e occitanofons es segondari. Es lo principi qu'es problematic.


Valora aquest comentari:   votar positiu 3   votar negatiu 7
Respondre comentari replica Comentari inadequat   Formulari d'abús de comentari

30 de decembre 14.43h

Lei babacols de 68 venguèron tornar a la natura dins de vilatges o masatges despoblats. Vendeires de lach de cabra, grops de vidas comunitàrias, e meme mandarom devèrs Castelana...

Venguèron dins un Eldorado, un Far west per far totei tips d'experiéncias fòra de la societat occitanofòna, lo "sud", una terra de... colonizar ?


Valora aquest comentari:   votar positiu 8   votar negatiu 0
Respondre comentari replica Comentari inadequat   Formulari d'abús de comentari

30 de decembre 14.37h

Car Amic Joan Marc

Una grand part de l'interior d'Occitània se vuèja ...
Tos amics vendràn de França amb sa lenga e sa cultura e coma o crentan plan justament Cristian Forment e Terric Lausa se fotràn coma de l'an quaranta de la nòstra lenga e de la nòstra cultura occitanas tant en Cevenas coma endacòm mai.

Avèm ja vist lo film. Aquel monde vòlon tornar inventar l'aiga cauda sens téner compte de çò que sèm e de çò que volèm. Que o fascan mas dins son pais.

Dins l'estat fra... Legir la seguida


Valora aquest comentari:   votar positiu 7   votar negatiu 0
Respondre comentari replica Comentari inadequat   Formulari d'abús de comentari

30 de decembre 12.19h

Aqueste vilatge poiriá èsser l'escasença de desvolopar un nuclèu de parlants occitans, segons çò que sovent nos demòstra Domergue Sumien.
Ça que la, cranhissi que lo perfil d'aquel monde que vendràn aquí se fotràn completament de la lenga occitana. per experiéncia dempuèi las annadas 70 n'avem vist arribar e passar de monde de França per Cevenas, Corbièras, Pirenèus etc. que son venguts nos explicar que lo nòstre biais de far èra pas lo bon e que lor biais èra lo bon. Al fin... Legir la seguida


Valora aquest comentari:   votar positiu 10   votar negatiu 0
Respondre comentari replica Comentari inadequat   Formulari d'abús de comentari

30 de decembre 08.29h

I a pas cap de rason que bufe pas l'alen revolucionària sus aqueste biais de contestar l'òrdre. Mes una Occitània cevenòla-per començar- traucada coma un gruyère"vuèit" per de colonias de monde estrangèrs a nòstra cultura participariá a reviscolar lo país d'un punt de vista civilizacional ? Planteji onestament la question que i respondi pas.


Valora aquest comentari:   votar positiu 11   votar negatiu 0
Respondre comentari replica Comentari inadequat   Formulari d'abús de comentari

5 -10 -20 -tots
1




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat
BANER3: Ràdio Occitània

Perfil

Joan-Marc Leclercq

Joan-Marc Leclercq logo rss

Musician de profession, autor d’un líber de conversacion suu gascon, d'un roman istoric "Ucraïna", d'un diccionari de rimas e de duas pèças de teatre.

mai d'informacions

contactar l'autor

Categorias

Las mai...


Mai d'articles

Archius




D'autres articles


Jornalet, gaseta occitana d'informacions