Bandièra01 1180x150: Comuna de Tolosa

Opinion

Pedofilia e estatisticas

Joan-Marc Leclercq

Joan-Marc Leclercq

Musician de profession, autor d’un líber de conversacion suu gascon, d'un roman istoric "Ucraïna", d'un diccionari de rimas e de duas pèças de teatre.

Mai d’informacions
Ac cau díser tre la debuta, soi pas un gran admirator de l’armada, que serí meslèu antimilitarista, aquò vòu díser qu’èi pas ren contra los soldats, qu’èi un oncle militar, mes soi pas estrambordat per çò qu’es deu ròtle de l’institucion era medish.
 
A maugrat de mon edat, èi pas hèit lo servici militar que n’estoi exemptat.
 
Doncas podètz imaginar ma purmèra reaccion quan m’assabentèi deus acuses de forçaments sus dròlles perpetrats per soldats de la fòrça dita “Sangaris” a l’aeropòrt M’Poko de Bangui.
 
Indignacion e malícia, sustot de saber que l’òme que denoncièc l’ahar, Anders Kompass, sòci suèc de las Nacions Unidas, èra estat suspenut de sas foncions e riscava lo licenciament. Sa fauta estoc d’aver, pr’amor de la manca de responsa de la Hauta Comission deus Drets de l’Òme de Genèva, “alertat las autoritats francesas sens de’n referir a sa ierarquia”. Vist lo seriosèr deus hèits arcastats aus soldats, nos podèm demandar dens quina epòca vivèm, de saber que los sols maganhats son los “shiulaires” que balhan las informacions. Espèri qu’es pas sonque una decision administrativa d’usatge que serà levada lèu e que lo foncionari coratjós serà reabilitat.
 
Cau doncas que lo lum sia hèit plan viste sus aqueste ahar vergonhós que bota en scèna predators sexuaus (suspausats, que l’ahar es pas acabat) adultes, poderoses, rics, representant un país (ex-/neo-) colonialista e dròlles desarmats, paures, ahamiats d’un país expleitat e en guèrra. Sèm dens una caricatura hastiala.
 
Puèi, un còp passat lo temps de l’emocion, arriba lo de la soscadissa.
 
La pedofilia es una perversion sexuala condemnada per la lei, un disfoncionament de la libido que’s vira de cap aus minors.
 
Se pòt hèr una distincion clara entre los pedofiles “abstinents”, conscients deu dangèr de lor situacion, que poden eventualament demandar espontanèament ajuda a la medecina, los “situacionaus” qu’an pas planificat lo passatge a l’acte, e los “pervèrses” qu’intègran pas los interdictes sociaus o que’us contèstan quitament.
 
Dens lo cas de l’ahar que nos interèssa, sembla plan que s’agisca de cases de “pervèrses” qu’aurén utilizat un subterfugi ende pervénguer a lors fins, lo d’un escambi dambe neuritud.
 
Es ací que las estatisticas entervenguen.
 
La pedofilia pertòca pas, per astre, qu’una part minima de la populacion, de la quala una auta part encara mès petita se plaça dens la tresena categoria.
 
Es mauaisit de saber exactament quant militars son estacionats a l’aeropòrt de Bangui. L’operacion Sangaris (deu nom d’un parpalhòu) engatja dus mil òmes, mes que mian operacions un pauc de pertot en Centrafrica.
 
Lo hèit que sian implicats dens l’ahar quatòrze soldats, es a díser quatòrze pedofiles de categoria 3, pòt semblar a priori exagerat deu punt de vista deu nombre. Tot pòt partir d’un hèit isolat e multiplicat en seguida. Cau saber que la populacion crestiana refugiada a l’aeropòrt es haut o baish ostila a la preséncia francesa e hèr pravar l’escàndol pòt hèr lo jòc de miaires deus anti-balaka.
 
La preséncia de fòrças armadas dens un país, per contra, provòca gaireben tostemps lo creish o la creacion d’activitats de prostitucion d’adultes e “escambis de servicis” entre populacion locala e soldats a aqueste nivèu, tanben fòrtament reprensibles e escandaloses, e mès probable. Caleré pas qu’aquò escapèsse a l’enquèsta.
 
Au moment de l’ahar d’Outreau, digun s’èra pas esmavut de s’assabentar deu nombre incredible de pedofiles – òmes e hemnas – que demoravan totis amassa dens lo medish immòble. Seré estat lavetz un critèri de recrutament de logataris? Imagini l’anóncia dens lo jornau … Mes seriosament, l’intervencion d’estatisticas seré estada lavetz plan urosa.
 
End’acabar, dirí qu’en mestior de violéncias de cap aus dròlles, cau estar a l’encòp subervigilants end’acessar los minors mes tanben de s’ahalhar pas de tira dabans la gravetat e l’orror que poden representar actes que’s poden qualificar de barbares.
 
Deishèm trabalhar la justícia qu’esperam independenta. De tot biais, am pas la causida.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article