Bandièra01 1180x150: Comuna de Tolosa

Opinion

La ruca contra los mèdias nacionaus

Joan-Marc Leclercq

Joan-Marc Leclercq

Musician de profession, autor d’un líber de conversacion suu gascon, d'un roman istoric "Ucraïna", d'un diccionari de rimas e de duas pèças de teatre.

Mai d’informacions
Vaquí qu’un còp de mès soi enmalit. Es pas ma fauta, soi pas jo qu’èi començat, m’an atacat a un moment quan èri tranquille e pensavi pas a ren.

Èri a miar la veitura de cap a tres oras e mieja de la nueit. Plan cansat e content de tornar trobar mon leit, aluqui France Info. A aquera ora, te passan redifusidas entre dus tròces de musica. Aquiu, èra la repapiada d’una emission qu’es normalament en dirècte entre 20h e 21h, e que s’apèra Les Informés, animat per Jean-Matthieu Pernin (véser imatge).

En fèit d’informats, es un sarròt de convidats que batalan sus subjèctes d’actualitat. Los tèmas de politica politiciana interiora de l’estat francés (“E aqueth, se va presentar o pas a l’eleccion presidenciala?”) representan solide la part màger de las charradissas.

Los convidats son monde deus mèdias, de l’art, de l’economia e de la politica exagonaus.

Lo subjècte d’aquera nueit èra “Euròpa” e sustot lo referéndum que’s va debanar en Bretanha Grana ende saber se volen o pas demorar sòcis de l’Union.

E es aquiu que m’es apareishut d’un biaish encara mès veserder que de costuma lo varat entre lo pòble (vosautes e jo) e los elèits qu’an accès aus microfònes e a las cameras. Los convidats, èra pas una suspresa, èran totis a 200% a favor d’Euròpa shens, coma tostemps, comprénguer qu’una soscadissa se posca hèr suu subjècte. I a un mot end’aquò: “los Eurobadants”.

Quan ac disi, me pausicioni pas coma un adversari de l’Union Europenca, mès coma quauqu’un que’s ditz que’ns podèm questionar (tiò, tot es tostemps de questionar) s’èm pas davant un deficit democratic causat per un aluenhament encara mès pregond deus centres de poder per rapòrt au pòble.

Aquí dessùs, una jornalista (sabi pas com s’apèra, èi presa l’emission en cors) comença un devís que qualificarí de vergonhós.

Purmèr, coma de costuma, explica que los “eurosceptics” son monde simplòts que comprenguen pas çò que’s debana a l’entorn, dens una epòca on tot se bolèga tròp viste e que’us hè paur. A quitament utilizat lo tèrme de débile (pegàs) ende qualificar tota opinion auposada a l’Union. Puèi mesclèc tot en hasent créser que los sols Fronts - lo National e lo de Gauche - an una pausicion antieuropencas. Cau saber que pas un de las duas formacions politicas citadas an coma tòca de hèr sortir lo país de l’Union, lavetz que lo Cameron, totun pas classificat coma “populista” peus elèits mediatics, perpausa aquesta possibilitat.

Puèi, comencèc un exercici de demagogia tan beròi que’u caleré ensenhar dens las escòlas: ça digoc los avantatges d’Euròpa son evidents, mes son pas de bon explicar e, eths, jornalistas, ac saben pas hèr (talament es evident).
Son collèga ajustèc qu’endeu public, i a pas qu’Erasmus e lo Concors Eurovision de la Cançon que representan una escaduda europenca. Cau notar que pas l’una ni l’auta de las manifestacions an un rapòrt dambe l’Union, que participan fòrça paises non-sòcis (Soïssa end´Erasmus, per exemple)

Morala deus “informats”: los que critican l’UE son pas que cons, cau créser çò que los elèits dison shens qu’ac sàpian explicar. Aquò que bremba los bons temps de la religion omnipotenta e de l’ensenhament deu catequisme au sègle passat. Créser shens de demandar.

Mes çò que m’enmalicièc lo mès èra de véser qu’encara un còp, èm pas dens un debat d’idèias coma caleré dens una societat democratica, mes davant la dictatura d’un biais de pensar, mespresent e elitista, d’un gropet de sòcis de l’elèit parisenc aus quaus per nat opausant d’idèia podèva respóner.

De saber qu’aquò se torna debanar cada jorn sus cada mèdia nacionau, e comprenguètz lo nivèu de libertat d’expression deu quau gausissèm.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Fabre Muret
4.

Encara un còp d'accòrdi!
Aimariai plan de saber se UE ajudarà Catalonha per exemple a juntar l'"Europe des peuples" ? Lo sosten de Cameron de Hollande de Merkel a Rajoy.......
I cresi pas tròp. La part majòra dels occitans creson que l'UE impausa un sens democratrica e lo respècte de la diversitat ? . Sufis de veire çò que fan a Grècia. Los pòbles son liures dins UE? Caldrà plan un jorn se pausar la question?
Ambe Europa es la patz? Cresètz vertadièrament que las guèrras son acabadas?
L'informacion es completament fabricada , s'ausis pas cap qu'una campana, una idèa.
La vertat que França es pas democratica qu'o foguèsse un jorn, e qu'ara es pauc a pauc madura pel faicisme .

  • 1
  • 0
JCD
3.

#2 Que las ajudas per l'agricultura venián d'Euròpa o de França, quò es totjorn verai que l'agricultura francesa subreviu nonmàs gràcias a las subvencions.
L'argent d'Euròpa es un afar de redistribucion. Los estats riches paian per los estats paubres, quò es una perequacion que me sembla fondada.

  • 1
  • 0
antalya apraquital
2.

Per Euròpa i aguèc tres tractats josmesses al pòble.

1972 Alargament de la CEE a Danemarc, Irlanda e reialme unit.

1992 Lo tractat de Maastrich es adoptat amb 51,05 de votz per lo tractat.

De mon vejaire non se pòt adoptar un tractat que pòrta lo nom de Carles de Batz de Castèlmòre, coneigut jos lo nom de D'Artanhan.

2005 Lo tratat de Lisbona Arrefusat per 55% dels electors.

Aquel trctat amb tres linhas cambiadas foguèc aprovat pel parlament. un polit denegadís de la paraula del pòble.
Totis los partits politics en prautit la paraula del pòble qu'es un del fondament de la democracia en çò nòstre.

En 2015 d'apèi un escandilhatge lo meteis tractat de Libona saria arrefusat per 62% d'exagonal se me rementi plan.

Euròpa balha d'argent als nòstres agricultors
Euròpa ajuda las regions
Euròpa bastit de rotas e de ponts...
Aquò es per far polit e messorguier.

La part de balha l'exagona a Euròpa es de 19,6 Milhards d'euròs. 16% de las recetas de l'exagona....
Euròpa en torna a l'exagona 13,1 Milhards d'Euròs.
La diferencia es de -6?5 Milhards (Mens 6,5 Milhards).

Euròpa es quicòm de remirable bastit ajuda, fa miranda de pertot amb un budget negatiu de mens 6?5 Milhards.
Per aquò far segur qu'avèm de leiçons a encapar.
Euròpa trompa colhon.








  • 1
  • 0
agustin
1.

un conte dels melhors qu'ai legit subre lo sicut

  • 1
  • 0

Escriu un comentari sus aqueste article