CAPÇALERA: HISTÒRIA DE LA CUINA CATALANA I OCCITANA
CAPÇALERA2: FAI-TE SOCI

Jornalet, gaseta occitana d'informacions

Diluns, 9 de decembre

Joan-Marc Leclercq

Dimars, 8.12.2015 03h00

Peleja a l’entorn de la bandèra francesa


Comentaris 2 comentaris    
Dolent Fluix Bo Molt bo Fabulós (4 vòtes)
carregant En cargament


Ende hèr aunor a las victimas deus atemptats de noveme a París, lo govèrn francés a perpausat a sos ciutadans de botar una bandèra francesa a sa finèstra lo jorn de la ceremonia nacionala.
 
De son costat, Facebook a mes en plaça un logiciau que permetèva d’un clic sol de botar un filtre blau-blanc-roge sus sa fòto de perfiu. Deu men costat, me soi apercebut de çò qu’èran sustot mos contactes estrangèrs, es a díser en dehòra de l’Estat francés, que hiquèn aqueste filtre sus lor fòto.
 
De tira, suus hialats sociaus e endacòm mès, un debat deus peluts se dobriscoc a l’entorn de l’oportunitat (o pas) de prénguer aqueste simbèu, en mès de l’inevitable Marseillaise, la sola cançon que los ciutadans franceses an en comun dempuèi que França exterminèc los patrimònis culturaus musicaus populars au medish temps que sas lengas.
 
Hascoi jo remercar aimablament qu’èra benlèu pas lo simbèu mès adaptat ende hèr aunor a las victimas, vist que mès d’un tuat deu divés 13 èran estrangèrs e qu’uns quites assassins èran franceses.
 
Autas personas soslinhèn a bon dret que la firma nordamericana avèva pas hèit ren end’autes atemptats, coma per exemple lo de Beirot que’s debanèc la velha, mes que reservava son empatia a victimas occidentalas blancas.
 
Autes encara, benlèu los mès “en fòrma”, botèn lo dit suu hèit que França es un país imperialista e qu’aquera recuperacion èra pas acceptabla.
 
En un mòt, las criticas plavón sus l’idèia deu govèrn que perpausava tanben l’imatge d’un drapèu francés en hauta definicion ende’u poder telecargar deu siti oficiau de l’executiu. Solide, las reaccions se hascón pas aténguer, e los que son favorables au simbèu tricolòr contrataquèn dambe energia, o meslèu reganh. Lo debat s’engatgèc lèu.
 
E es atau que la legida deus comentaris vos n’apreng sus vòstes congenèrs fòrça mès viste que non pas un estudi sociologic apregondit. Un dessenh geometric tan simple es percebut de biaises tan diferents que se compreng a quin punt l’esperit uman pòt estar complèxe.
 
Daubuns veson dens la bandèra francesa lo simbèu de la Libertat e de la Democracia.
 
D’autes i veson una societat metissada de preservar.
 
D’autes encara França etèrna, blanca e crestiana.
 
End’autes, es lo simbèu de l’imperialisme o/e deu colonialisme.
 
N’i a tanben qu’i veson una muralha contra lo fascisme quan autes i veson una mena de fascisme. End’una part deu monde, èra pas lavetz que lo signe de dòu e d’aumenatge a las victimas de la barbària.
 
N’i a qu’i veson lo simbèu de l’universalisme (e ben òc) quan lors detractors i veson pas au contrari qu’una vision elitista e estreta d’un monde redusit a París intra muros.
 
Comprengoi lavetz pro lèu qu’aquesta mena de debat es pas brica possibla. Cadun vei una causa diferenta. Acabèi en díser qu’es un drin coma una charradissa suus Beatles e los Rolling Stones, suu sèxe deus ànjols, suu tè o lo cafè, sus saber se la galina a hèit l’uòu, sus la còca o la frangipana, suu Barça e lo Real Madrid.
 
La conclusion es que vau pas la pena de guastar son temps a discutir de simbèus. Fòrça partidaris de la bandèra francesa son opausats a l’imperialisme e au colonialisme, çò que, ende jo, es meslèu istoricament illogic, mes botèm, es atau. I veson pas nada tralha d’imperialisme e sovent, au contrari, i veson un signe d’egalitat e de libertat. Sèm aquí mès pròches de la fe que de non pas l’opinion.
 
Cau doncas pas debàter de simbèus mes debàter dirèctament de valors, es autant de ganhat.
 
Perpausèi coma simbèu un drapèu néguer en signe de dòu, dambe una “A” en majuscula que voleré díser Allez la France, entornejada d’un cèrcle que representa l’unitat. Benlèu vau mandar ma perpausicion a l’Elisèu. 



publicitat
BANER1-2-3: DGPL TRADUCTOR



Comentaris

12 de decembre 15.01h

Tot a fèit d'acòrd dab la toa conclusion!


Valora aquest comentari:   votar positiu 0   votar negatiu 0
Respondre comentari replica Comentari inadequat   Formulari d'abús de comentari

8 de decembre 10.28h

Un bon article per esplicar la dualitat dins lo v-un.
Partam de l'idéeia que la separcion de la França d'òc d'emben la França d'oil seria benefica per las doas partidas e laissam los republicans de drecha coma d'esquera far "la France, la France" sens jamai trobar d'arguments per apriondir la question.


Valora aquest comentari:   votar positiu 1   votar negatiu 0
Respondre comentari replica Comentari inadequat   Formulari d'abús de comentari

5 -10 -20 -tots
1




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat
BANER1-2-3: DGPL AN LAFONT

Perfil

Joan-Marc Leclercq

Joan-Marc Leclercq logo rss

Musician de profession, autor d’un líber de conversacion suu gascon, d'un roman istoric "Ucraïna", d'un diccionari de rimas e de duas pèças de teatre.

mai d'informacions

contactar l'autor

Categorias

Las mai...


Mai d'articles

Archius




Etiquetas

D'autres articles


Jornalet, gaseta occitana d'informacions